Die Vrystaatse polisie is op die spoor van minstens ses verdagtes wat na bewering vandeesweek by ’n plaasaanval buite Dewetsdorp betrokke was.
Die egpaar Gert (81) en Joye Pienaar (75) is Maandag in die vroeë oggendure in hul huis op hul plaas oorval en aangerand.
Brig. Motantsi Makhele, woordvoerder van die polisie, het die voorval aan Maroela Media bevestig.
Volgens Makhele het die verdagtes na bewering die egpaar in hul huis oorval en vuurwapens op hulle gerig. Die verdagtes het op kontant aangedring.
“Die verdagtes het die slagoffers se hande met ’n telefoonkoord vasgemaak. Die slagoffers is met ’n stomp voorwerp en selfs met ’n vuurwapen aangerand,” sê Makhele.
Die verdagtes het daarna met twee vuurwapens en ’n onbekende bedrag kontant op die vlug geslaan.
Joye kon daarin slaag om haarself los te wikkel en hulp by ’n naburige plaas te ontbied.
Niemand is nog in verband met die voorval in hegtenis geneem nie.
Enigeen met inligting omtrent die voorval word versoek om dit by ao. Ngabomo Thandazo by 083 712 0576 aan te meld.