Ses sterf op N1 buite Pretoria

Ses mense, drie van hulle kinders, het Sondagoggend in die ongeluk gesterf. (Foto: Medi-Egde First Responders/Facebook)

Ses mense is dood en nog twee beseer in ʼn ongeluk op die N1-hoofweg naby Hammanskraal, noord van Pretoria.

Charles Mabaso, woordvoerder van die Tshwane-nooddienste, het gesê die ongeluk is Sondag om 09:26 aangemeld.

In dié stadium lyk dit of ʼn ligte motorvoertuig agter in ʼn vragmotor vasgery het, het Mabaso gesê.

(Foto: @Ladyramie/Twitter)

Volgens ʼn verklaring van Medi-Edge-nooddienste het die twee voertuie egter reg van voor gebots.

Vier van die oorledenes is buite die voertuig op die toneel gevind. Hulle is vermoedelik uit die motor geslinger. Nóg ʼn persoon moes met lewenskake uit dié motorwrak gered word. Dié persoon is ernstig beseer, het Mabaso gesê

Die liggaam van ʼn vyfde persoon is later op die toneel gevind.

Drie van die oorledenes is kinders, het Mabaso gesê.

Die pad is vir verkeer gesluit. (Foto: Medi-Egde First Responders/Facebook)

Die vragmotorbestuurder het op die toneel gesterf en ʼn passasier in dié voertuig is ernstig beseer. Dié persoon moes ook met lewenskake uit die vragmotor bevry word.

Mabaso het gesê die N1-Suid is vir verkeer gesluit. Motoriste is gevra om alternatiewe roetes soos die R101 te gebruik om die ongelukstoneel te vermy.

Die polisie ondersoek die voorval.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

13 Kommentare

Roche ·

Die vrag motor bestuurder is in n ernstige toestand hospitaal toe vervoer. Hy is nie dood nie

Charl ·

Op n snelweg reg van voor gebots. Maw kop aan kop, hoe kan so iets gebeur, kar/trok moes dus beheer verloor het en oor die middelman gegaan het en aankomende verkeer gebots het

jennefer ·

Daar is ongelukkig enorm veel idiote wat van.die roete gebruik.maak.

PJ ·

Dis waar ek ry gereeld op dai pad maar vir een of ander rede glo klomp van dai bestuurders daar is geen reèls van toepassing op dai pad en as ek sè geen meen ek GEEN !!!!!

Foxi ·

Nee…ek verstaan nou nie hierdie berig nie. Mabaso sê van agter, die nooddienste sê van voor………

A Mac ·

Was daar dan vandag twee ongelukke op die pad? Gehoor van die een tussen Pertoport en Wahlmanstalafrit in ‘n noordelike rigting? Wat moet ons nou glo?

Elaine Hitchcock ·

Die pad is n nagmerrie. Mense jaag op jou af, ry verby op jou linkerkant, stoot weer in, gaan jou verby met spoed van maklik 150kms, taxi’s waar op geskryf is 100 is spoed, is oorlaai en ry ook ver no 120. Geen respek vir die wet nie.

Heidi ·

Ongeluk voor ons gebeur en dit was nie mooi om te sien nie. Die bestuurder van die ligte voertuig op n manier beheer verloor weet nie wat daar gebeur het nie oor d middleman gekom en Trok reg van voor getref en gerol tot voor ons. Ek het hulle gesien my hart is gebreek en ek het gehuil tot by my huis dis iets wat ek nooit sal vergeet nie. My hart gaan uit na hulle families en vriende

Katrina ·

Klink asof ‘n voor-band dalk gebars het, dan het mens geen beheer oor die voertuig nie, dieselfde het met my sussie-hulle gebeur jare gelede, toe ‘n voertuig uit die bloute reg voor hulle ingeswaai het, en hulle basies deur die klein voertuig gery met hulle bakkie. Al 5 die passasiers in die voertuig is opslag dood, my sissie, haar man en 2 kinders het met die genade van Bo net ernstige beserings opgedoen, waarvan hulle oor tyd herstel het. Die nooddienste het op die toneel vir my swaer gesê (hy was heeltyd by sy bewussyn) al die bande van die klein voertuig was lankal verby hul toelaatbare loopvlak, en dat as hulle self ook met ‘n kleinerige voertuig gery het, en nie met die (groterige) bakkie wat hulle wel in was nie, sou daar sterftes onder hulle ook gewees het.

Andre ·

As ek die foto van die onderstebo wrak so kyk lyk dit of die linker band geen loopvlak op het in die middel nie.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.