Foto: SAPD
Konst. Noloyiso Rwexana, woordvoerder van die polisie, het gesê twee mans het Saterdag by die Harare-polisiestasie in Khayelitsha beweer hulle het op die N2 in die rigting van Macassar gery, toe hul Hyundai-vragmotor en sleepwa wat vol huishoudelike toerusting glo gekaap is.
Die mans het beweer ʼn voertuig het teen die vragmotor gebots en hulle gedwing om stil te hou. Die mans wat in vragmotor was het glo hierna die bestuurder van die voertuig gekonfronteer waarna hy glo ʼn vuurwapen op hulle gerig het.
“Die twee klaers het beweer hulle het te voet van die toneel gevlug. ʼn Kapingsaak is aanhangig gemaak en die saak is na die Macassar-polisie verwys vir verdere ondersoek.” Volgens Rwexana het voorlopige ondersoek aan die lig gebring dat die kaping nooit plaasgevind het nie en dat die mans glo onder eed gejok het.
Die ondersoek het die polisie na adresse in die Paarl en Milnerton gelei, waar die gesteelde goedere gevind is en ses verdagtes, tussen die ouderdomme van 26 en 35, in hegtenis geneem is. “Die totale waarde van die goedere waarop beslag gelê is, is sowat R200 000. Die verdagtes staan tereg op aanklagte van meineed en regsverydeling en sal binnekort in die Somerset-Wes-landdroshof verskyn.”
Lt.kol. Richard Koopman, Macassar-stasiebevelvoerder, het die beamptes geloof vir hul ondersoek na die saak en die inhegtenisname van die verdagtes. Hy het ʼn streng waarskuwing gerig aan gemeenskapslede om nie vals sake aanhangig te maak nie.
