Ses vermeende huurmoordenaars aangekeer

Foto: SAPD, KwaZulu-Natal

Ses mans, wat na bewering betrokke was by politieke sluipmoorde, polisiemoorde, kitsbank-ontploffings, transitorooftogte en taxi-verwante voorvalle, is in KwaZulu-Natal in hegtenis geneem.

Kol. Thembeka Mbhele, woordvoerder van die polisie, het Woensdag in ʼn verklaring gesê beamptes van die taktiesereaksie-eenheid, nasionale ingrypingseenheid, die polisie se eenheid vir openbare orde en die lugvleuel, werk onverpoosd om die sinnelose moorde in dié provinsie te voorkom. Die span is tans ontplooi in die noorde van KwaZulu-Natal waar vyf persone ʼn week gelede dood is.

“Die lede het Dinsdag ʼn deurbraak gemaak deur ses vermeende huurmoordenaars, tussen 34 en 52 jaar oud, in hegtenis te neem,” het sy gesê. “Die mans het vermoedelik tussen Gauteng en KwaZulu-Natal opgetree en was betrokke by taxi-verwante voorvalle, polisiemoorde, kitsbank-ontploffings, transitorooftogte, politieke sluipmoorde, gewapende roof en kapings. Hulle is net buite Richardsbaai in hegtenis geneem en het sewe ongelisensieerde vuurwapens en ammunisie in hul besit gehad.”

Mbhele het gesê die polisie sal die verdagtes ondervra en die vuurwapens word gestuur vir ballistiese toetse.

Genl.maj. Bheki Langa, waarnemende provinsiale polisiekommissaris, het die polisiebeamptes geloof vir die inhegtenisnemings. “Ons is vol vertroue dat die inhegtenisneming van hierdie mans ʼn bydrae sal lewer om voorvalle van geweld in die provinsie te beperk. Ons loof die lede van die gemeenskap wat besluit het om met ons span saam te werk en hierdie oortreders aan te keer. Dit wys dat ons gemeenskappe nog vertroue het in die polisie, en dat misdadigers verag word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

6 Kommentare

Muffin ·

Knap gedaan SAP. Ek hoop net nie hulle is oor n week uit met R500 borg nie.

Elisabeth Kruger ·

Ons salueer die Gemeenskap en die Polisie, kom ons maak SA n veilige land.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.