“Hy was soos ʼn sponsie en die lelike goed wat vir hom of sy maatjies gesê is, het hy alles opgesuig en nooit êrens gaan uitdruk nie.”
Só sê Arina Odendaal oor haar 12-jarige rooikopseun Herman wat verlede Sondag sy eie lewe geneem het by sy gesin se huis in Kestell in die Vrystaat. In ʼn briefie wat hy agtergelaat het, het hy gesê hy voel alleen, dat hy nie vriende het nie en dat hy ʼn loser is.
Dis sy hare, sproete en die nr. 10-skoen wat hy gedra het wat hom glo die teiken van boelies gemaak het.
“Dis nie een ding wat ʼn kind breek nie. Dis ʼn klomp goed. Dis vir my hartseer dat ons so ʼn oop verhouding gehad het, maar dat hy nooit daaroor kon praat nie.”
ʼn Roudiens is Vrydag vir Herman in die NG Kerk Kestell gehou. “Dit was baie seer om vir my kind goodbye te sê. Maar dit was regtig ʼn mooi diens en ʼn viering van sy lewe.”
Sy glo dat God in daai oomblik voor sy dood met Herman gepraat het en vir hom gesê het sy werk op aarde is klaar en dat hy nou moet huis toe kom.
“Hy was ʼn baie spesiale kind en het ʼn noue verhouding met God gehad. Hy sou nooit ander te na kom of seermaak nie al was hy in staat om homself te verdedig.
“Soveel maatjies het briefies en boodskappe gestuur na sy dood. En so baie van hulle het dankie gesê dat hy namens hulle teen boelies opgestaan het. Hy het baie houe vir hulle gevat. ʼn Vuishou word vinnig gesond, maar ʼn hou met die mond is baie erger.”
Die boom waar Herman sy lewe beëindig het, is verlede Maandag afgesny. Daar is ʼn houtkruis geplant met klippies, wat Herman se maats gebring het, wat om die kruis gepak is. By die stam kom daar nou ʼn grasgroen takkie uit. “Hier in die middel van die Oos-Vrystaat waar dit vrek koud is. Daar waar dit lelik, rou en seer is, kom daar tog vernuwing en groei.”
Odendaal glo dat die afsonderingstydperk weens die Covid-19-pandemie ook ʼn invloed op haar seun se gemoed gehad het. Hy was rugbymal en toe is die rugbyjaar ewe skielik daarmee heen. Die skool het weer begin, maar die klasse was nie meer dieselfde nie en daar was baie werk. “Mens besef nie wat die afsonderingstydperk aan ʼn kind se psige doen nie.”
Odendaal voel dit is belangrik om te praat oor wat gebeur het. “Mens moet eerlik wees daaroor en dit nie onder die mat invee nie. Ek dink nie mens kom ooit daaroor nie. Jy kan daarmee cope as jou geloof sterk is en die Here vat jou hand en wys vir jou ʼn pad.”
Vir haar en haar man is dié pad ʼn bewusmakingsveldtog oor boeliery. Sy is nie kwaad vir die kinders wat haar seun geboelie het nie. “Ek weet nie wie sy boelies was nie. Dit wat hulle aan hom gedoen het, kom uit ʼn donker plek in hul harte wat beteken hulle moet ook baie seer hê. As jy seer het en nie ʼn uitlaatklep daarvoor het nie, gaan jy die volgende ou seermaak. Dis ʼn bose kringloop.”
Sy wil dié kringloop breek. Kinders wil nie noodwendig met hul ouers, onderwysers of ʼn berader praat nie. “Hulle wil met mense van hul eie ouderdom praat.” Odendaal gaan skole kontak en voorstel dat hulle ʼn sogenaamde “buddy system” in plek stel waar kinders in elke graad uitgewys word en ʼn kenteken dra sodat ander kinders weet hulle kan met hom of haar praat.
“Daardie maatjie gaan nie als vir juffrou of ma vertel nie, maar kan vir ʼn onderwyser sê daar is ʼn probleem sodat hulle die kind kan dophou. Daar moet vertroue wees.”
Odendaal gaan haar seun se glimlag en die vroegoggend koffie mis. “Sy mondhoekies het altyd so opgetrek as hy glimlag. Hy het verskriklike mooi maniere gehad en was ʼn vreeslike dankbare kind.” Hy het elke oggend vir sy ma koffie aangedra voor sy moes werk toe ry.
“As ek kon, sou ek enigiets doen om my kind terug te kry. Ek kan nie. Maar ek kan ander mense help. En deur ander mense te help gaan dit vir my en my gesin genesing bring.”
Luister as jou kinders met jou praat, sê Odendaal. Let op daarna as hulle ewe skielik begin stiller raak en in hulself keer. Of as goed wat altyd vir hulle lekker was, nie meer dieselfde reaksie ontlok nie. Moenie te veel druk op jou kind sit nie.
“Ek sê altyd: of my kind nou eendag ʼn loodgieter, ʼn dokter, ʼn aktrise of ʼn prokureur is, maak nie saak nie. Solank jy ʼn goeie mens is wat omgee vir ander en ʼn goeie hart het.”
Dis baie hartseer
RIV engel kind, ek ken jou nie maar ek weet hoe dit voel om as kind geboelie te word.
Ek het ook as kind baie oor selfdood na gedink, gedink dis beter. Gewonder wat die lewe inhou as almal jou lelik behandel, ek weet tot vandag toe nie hoe ek deur dit is nie.
Maar dit gee my hoop met die ouers se beplanning oor hoop deur boelies, liefde en omgee vir kinders wat vasgevang is in dieselfde omstandighede. Ongelukkig besef daardie boelie kind nie wat hulle veroorsaak nie. Vir hulle is dit vermaak wanneer almal saam lag. Hoop elke dag kinders kan besef hoe seer hulle n ander kind kan maak, maar jy is veilig by ons Hemelse Vader en RIV…
Ai -dis baie tragies – Boelies het geen idee wat hulle aan n kind doen nie, en hoe gaan n mens dit ooit stop? Rus sag Herman!
Baie hartseer. Sterkte aan ouers. RIV
ai kindjie , rus in vrede, wanneer gaan elke skool ‘n plan in plek he met boelies, dit gebeur en gebeur, maar ons sien geen plan daarvoor nie
Marcia, jy kan maar gaan kyk, in meerderheid van gevalle, is dit die boelies se ouers wat op Beheerliggame en Ouerrade is, wie se sakke baie diep is as dit by die skool kom. Dis hoekom boelies meeste van die tyd wegkom met hulle dade.
Dis nou die hoeveelste kind hierdie wat in ‘n kort tydjie selfmoord pleeg oor ‘n geboelie, hoeveel kinders moet nou nog hulle eie lewens neem voor ouers en skole gaan wakker skrik?
My 11jarige is in ‘n geweldige twee stryd. Hy wil bitter graag terug skool toe, maar ek moes die afgelope ruk kort kort hoor hy wil nie teruggaan skool toe nie agv ‘n boelie. Wel, na ek hierdie berig gelees het, is my “mind” opgemaak. ‘n Sekere boelie se dae is getel, kom die 24ste Augustus.
Ek het reeds in 2009 self ‘n boelie aangetree toe my oudste in Gr2 was. Die juffrou wou nog keer, toe laat ek haar duidelik verstaan sy het haar kans gehad om iets te doen, nou bly sy stil, ek hanteer dit nou. Dit was die laaste gewees van daardie boelie.
Sover ek aangaande is behoort geen skool ‘n “beheer-liggaam” te he nie! Dit behoort die hoof en onderwysers se werk te wees om die skool te “beheer”
Baie sterkte aan Herman se familie.
Dit is tyd dat ouers hul kinders leer om ander te aanvaar soos hulle is en om te aanvaar dat ons nie almal dieselfde is nie. Vir ‘n 12-jarige om sy lewe te neem, is darem maar verskriklik en ek kan nie dink hoe hy binne moes voel nie.
Verskriklik hartseer !
Dit is baie hartseer. Kinders en selfs onderwysers boelie kinders. Dit is nie maklik om elke dag daar mee saam te leef nie, veral tydens skoolure. Verder verg dit ‘n geestelike aanpassing van die kind om dit te oorkom, dikwels ten koste van die samelewing as die kind dit baasraak. En as die kind die boelies begin aanvat, kry die kind die skuld as ‘n kwaadstoker.
Ai hoe loop die trane vir ‘n pragkind wat ek glad nie geken het nie :( RIV seun, en my simpatie aan jou geliefdes
Dis diep seer. Baie sterkte aan familie. Mag GOD jul vertroos
Sterkte aan familie en vriende. Om geboelie te word is ‘n baie negatiewe ervaring. Nie alle mense is opgewasse daarteen nie
Is daar ‘n sielkundiges aan elke skool in Suid Afrika verbonde? Iemand anders as ‘n onderwyser wat ‘n kind meer kan gaan praat? Die lewe vir ‘n kind, en nog meer vir ‘n jong skoolkind is soe moelik in Suid Afrika. Mag jy nou rus in wrede Herman Odendaal. En aan alle bullies stop dit. Jou woorde en aksies het gevolge!
Dit is hartseer om te dink dat ‘n kind van 12 sy eie lewe neem omdat die wreedheid van sy wêreld te veel geraak het. Innige meegevoel met sy ouers en ook sy maats. Ouers en ook onderwysers moet meer oplettend wees waar dit kinders aangaan. Die dolle gejaag van ons elke dag se bestaan haal ons oë weg van dit wat belangrik is. Die Buddy-stelsel is ‘n goeie idee.
Ai, dit bly vir my een van die hartseerste dinge in die lewe ooit. My dogter self word telkemale deur boelies geteiken. Daarom is sy nou deesdae in Homeschooling, want ek wou DIT wat met Herman gebeur het , met alle magte in my verhoed. Dis iets aat my nog altyd bang gemaak het. Ek is baie jammer vir julle, en weet waardeur julle gaan . Sterkte is al wat ek kan sê.
IVM raad of eerder die oplossing: Ruan Buitendag, seun van die hoof van Laerskool Arboretum in Richardsbaai, het ‘n paar jaar terug die “Boelie Boks” dink ek dis genoem, begin. Waar jy in absolute anonimiteit ‘n briefie kan skryf indien daar teen jou of selfs iemand anders soos ‘n maat deur boelies geteiken word. Die boks was beskikbaar in die kantoor area, waar jy net die nota of briefie gaan ingooi. En dan word die boks weekliks of gouer indien nodig deurgegaan en sodoende word dit aangespreek. Ek kan nie dink eintlik aan ‘n beter manier nie. Sodoende word die kind nie noodwendig bekend gemaak nie, tensy hy wil .
Die trane loop oor ‘n pragtige seun wat ek nie geken het nie. My hart gaan uit na sy ouers en familie. Dankie vir dit wat u wil doen.
Die probleem is nie by die sogenaamde boelies nie. Die probleem is by die ouers van die boelies wat nie hul eie kinders dissiplineer nie en dink hul bloeitjie kan niks verkeerd doen nie. Kyk wat het dit aan die arme kind gedoen. Baie tragies. Dit kon verhoed gewees het.
Die boelies (lees skoolkinders) gaan eendag die knie moet buig voor Iemand. Jou sondes haal jou in, al is dit eers in die hiernamaals.
Ek het nie eers woorde nie… my hart is so seer, en Herman, jy sal dit nou nooit weet nie, maar jy is vreeslik pragtig!! daar was absoluut niks met jou verkeerd nie, dis die samelewing wat lelik is. Mag Jesus jou toevou is sy liefde en jou laat mooi verstaan hoe spesiaal jy vir baie mense op aarde was en dat almal rou oor jou. Baie sterkte mamma en pappa.. my hart bloei vir julle.
Dis bitter tragies, hoeveel kinders gaan nog selfmoord pleeg agv boelies? Dis tyd dat ouers en skole wakker skrik, die handskoene uittrek en hierdie probleem daadwerklik aanspreek.
Klein boelies, word groot boelies, word ‘n vroueslaner, ‘n kindermishandelaar, ‘n gesinsmoordenaar. Buig die boompie terwyl hy jonk is. Te veel ouers hou hulle blind vir hulle kinders se vieslike maniere, want hulle gee nie om nie, of stel bloot net nie belang nie, of trap die Spelterapeut en sielkundige se drumpel deur want hulle is te bang of te swak om dissipline toe te pas, en dan moet ander kinders met hulle lewens boet.
Jy kan maar gaan kyk, ‘n boelie kry sy voorbeeld by die huis, of hy word self geboelie, of sy opvoeding laat veel te wense oor.
Net nie woorde nie…maar net 12jaar oud…tragies skokkend…sterkte aand ouers..dis n moeilike pad vorentoe
Dis vir my erg skokkend. Ek het n Seun en Dogter van daai ouderdom. As hulle moet geboelie word belowe ek ek sal daai kinders self gaan uitsort! Ek sien nie n Boelie as n kind nie maar as n volwassene en ek sal hom so hanteer. Hy en sy ouers kan dan maar kom kla. Boelies se ouers sal dan ook uitgesort word.
Sjoe dis so hartseer, kan nie anders as om trane in my oë te kry nie. Wat ‘n pragtige seun. Baie sterkte van die gesin en familie in hierdie hartseertyd.
So jammer te hoor. Aan die ouers en familie baie sterkte. Mag God julle met Sy liefde en beskerming omvou.
Ai my hart breek vir die kind en sy ouers.
Boelies besef nie watter skade hulle doen nie. Ek sit self met emosionele skade agv. boelies op skool – en ek is al oor 40!
Ergste is dat die Boelies meestal sulke boeliegedrag het omdat hulle elders in hulle lewe die slagoffers van boelies/mishandeling/emosionele skade is en hulle boelie dan ander kinders om te probeer beter voel oor hulleself.
Dit is ongelooflik hartseer. Mag Vader God elkeen van die Odendaal-gesin omvou met Sy liefde en vertroosting.
My hart breek in ‘n duisend stukke…..ek sal vir jou bid mamma…..want om ‘n kind op so manier aan die dood af te staan is afgryslik. Mag die Here sy arms van vertroosting om jou en jou gesin sit en julle troos.
Ek is ook op skool geboelie (verbaal baie erg).
Ek het in ‘n stadium niks van myself gedink nie, en vandag, meer as 30 jaar later sukkel ek steeds met my selfbeeld.
Ek het by daai tyd geglo kinders gaan eendag ophou boelie. Ek was verkeerd!!!
En nou gaan daai boelies seker beading kry???
Dis baie trragies en ons gebede gaan uit na sy ouers en familie. Boeliegedrag in skole is tewyte daarraan dat dissipline in ons skoolopvoeding ontbreek.
Ag liewe grootman, jou dood definieer wat ons noem tragedie. Ons leef vasgevang in n waarlik stukkende en gebroke wereld. Ons samelewing en alle strukture wat eens gehelp het om ons moreel en maatskaplik rigting en koers te gee le aan flarde. En nou lees ons van kinders wat selfmoord pleeg oor hulle geteister word deur ander kinders. Wat word van ons mensdom? Mag die glimlag van God oor jou skyn Herman, en ook jou ouers en familie bekwaam om te leef in die lig van jou afwesigjeid.
Dis so jammer.. was so ‘n aantreklike seun…