Seun (7) kritiek na val van trein

Foto: Netcare 911

Foto: Netcare 911

ʼn Sewejarige seun, wat Woensdagmiddag van ʼn bewegende trein af geval het, was só erg beseer, dat hy sy eie bloeiende kopwond met sy skooldas moes toebind voordat hy na veiligheid gekruip het.

Chris Botha, woordvoerder van Netcare 911, het gesê die kind het glo by die Devilwood-treinstasie in die Shongweni-vallei in KwaZulu-Natal op die trein geklim. ʼn Groep kinders in die trein het glo in die deur gestaan sodat dit nie toemaak nie toe die trein wegtrek.

“Toe die trein deur ʼn tonnel gery het, is die kind uit die trein gesuig en sy kop is hard teen die betonmuur geslaan,” het Botha gesê. “Hy het ernstige kopbeserings opgedoen, maar was baie dapper en het sy skooldas gebruik om sy gapende kopwond toe te bind. Hy het toe uit die tonnel probeer kruip om hulp te kry.”

Volgens Botha het ʼn groep motorfietsryers in die omgewing gery en hulle het die kritiek beseerde kind langs die treinspoor sien lê. Hulle het onmiddellik die nooddienste ontbied en paramedici moes op baie moeilike terrein deur suikerrietvelde ry om by die seun te kom.

“Die paramedici het besef die paaie was te sleg om die kind per ambulans te vervoer en ʼn mediese helikopter is ontbied. Die seun is met die helikopter na ʼn spesialishospitaal in Durban geneem,” het Botha gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

5 Kommentare

christine ·

Hi O siestog arme arme kind. Tog so onskuldig. Laat ek eerder “Gedagte vir die dag” lees.

Jeanette ·

Hi ek kry hom so jammer, hoop hy word gou gesond, hoekom het hulle nie gekyk dat die deure toe is van die trein voordat hy weg trek nie , dankie vir die mense wat vir hom hulp gekry het.

VLINDER ·

Jy sal sien hul se, kinders het in die deur gestaan sodat dit nie toemaak nie. Dis n alledaagse ding met treine. Het dit al baie gesien. Die deure trek hul inelkgeval oop as dit toe is.

Ma se Hart ·

My seuntjie is 7 jaar oud en ek kan net dink aan die vrees wat deur daai lyfie moes gegaan het. Die feit dat hy, ondanks beserings, oulik genoeg was om te besef hy moet die bloeding stop, sê net vir ons dat ons hier met ‘n intelligente wesentjie te doen het. Ai, dis so hartseer. Ek hoop hy herstel volkome.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.