Seun (8) geopereer na hoewe-aanval 

Marlu Coetzee in die hospitaal. Foto: Verskaf

Die agtjarige seun wat ʼn operasie moes ondergaan nadat hy en sy pa tydens ʼn hoewe-aanval aangerand is, sal moontlik nie permanente skade weens sy beserings oorhou nie.

Dokters het tydens die operasie in die Garden City-hospitaal in Johannesburg plaatjies en skroefies in Marlu Coetzee se neus gesit.  Volgens sy ma, Dehlia, is sy “neusie baie mooi in plek vasgesit” en is dokters baie tevrede met sy vordering.

Marlu het ernstige beserings aan sy neus opgedoen nadat hy met ʼn voorwerp deur die gesig geslaan is. Sy oë is steeds erg geswel.

“Dit lyk nie of daar enige permanente skade gaan wees nie,” het Dehlia gesê en bygevoeg haar seuntjie kan in die stadium nie baie van die aanval onthou nie. “Ek het met hom gesels en gevra of hy kwaad of hartseer voel en hy het gesê sy hartjie is baie seer.” Volgens Dehlia het sy sy handjies gevat en saam met hom gebid.

Marlu het intussen ook al telefonies met sy pa, Mario (47), gepraat wat in ʼn Potchefstroomse hospitaal behandeling ontvang na die aanval Donderdag in die vroeë oggendure op Mario se hoewe in die Vyfhoek-omgewing in Potchefstroom. Mario het ernstige kopbeserings opgedoen.

Marizé (7), Marlu se sussie, was ook by tydens die aanval maar is nie beseer nie. Volgens Dehlia is sy egter nog baie getraumatiseer. “Sy hou aan sien hoe word haar pappa en boetie geslaan. Sy vra ook heeltyd waar gaan ons slaap en gaan ons veilig wees.”

Mario Coetzee

Paul en Nellie Coetzee, Mario se ouers, was ook in die huis ten tyde van die aanval. Volgens Paul het die aanvaller(s) ʼn kombuisvenster gebreek en die traliewerk gebuig om toegang tot die huis te kry waarna hy/hulle na die hoofslaapkamer is waar Mario en die kinders geslaap het.

“Ons het wakker geword toe die kinders en Mario skree,” het Paul vertel. Hy het gesê hy en sy vrou het gaan ondersoek instel en sy vrou is deur een van die aanvallers oor die kop geslaan en sy het geval terwyl hy die ligte probeer aansit het aangesien die huis pikdonker was.

Volgens Paul het sy vrou in ʼn stadium geskree dat sy die polisie gebel het en die aanvaller(s) het vermoedelik toe op die vlug geslaan. Nellie moes steke kry vir die wond aan haar kop.

“Toe ek buk om my vrou op te tel toe kyk ek in my seun se kamer in en sien net al die bloed.” Volgens Paul is sy seun vermoedelik met iets gekap en hy het snymerke aan sy bene, arms, kop en gesig opgedoen. “Sy oë was onmiddellik blou en dik opgeswel. Sy hele gesig was opgeswel.”

Paul het gesê Mario kan intussen sy oë op ʼn skrefie oopkry en dat hy met hulle kan gesels. “Dank die Liewe Heer dat hy nog hier is.”

Kol. Adele Myburgh, woordvoerder van die polisie, het bevestig niemand is nog in verband met die aanval in hegtenis geneem nie en gesê ʼn saak van huisroof word ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

66 Kommentare

jongste oudste gewildste
AmY

Hy gaan geestelike letsels oor hou.

Diertjie

Huisroof? Poging tot moord!!! Daai arme mense sal Nooit weer veilig voel nie. Ons bly ook op n kleinhoewe en is konstant in vrees oor wanneer dit ons beurt is.?

Melanie

Ag dis vreeslik hartseer! Ons bid vir julle en almal wat onder geweld deurloop.

Petro

Ai mense dankie tog jul leef dank ons Hemelse Vader mense ek baie kwaad toe ek dit lees die onopgevoede skuim kan nie werk nie nou word onskuldige mense se besitting gevat waarvoor hul hard werk sterkte jul

Marinda

Only time will tell Amy.

I think it is just horrible that children are being attacked by these cowards. And that’s exactly what they are COWARDS