Seun geskors ná hy juffrou met water gooi

‘n Skermskoot van die video wat op sosiale media versprei word.

Die leerder wat ʼn onderwyseres by die Kimberley Boys’ High School met water gegooi het, is geskors.

ʼn Video van die voorval het op sosiale media die lig gesien. Die video wys hoe ʼn leerder die onderwyseres nader en tot die skok van sy klasmaats ʼn bottel water op haar uitgooi. Sy staan op en ruk die bottel uit die seun se hand voor sy die klaskamer verlaat.

Geoffrey van der Merwe, woordvoerder van die Noord-Kaapse departement van onderwys, het gesê die voorval het op 2 November by die skool plaasgevind. Beamptes van die departement het die skool besoek ná die voorval en gesê die situasie word gemonitor.

Die departement het intussen besluit om die gr. 9-leerder te skors hangende die uitkoms van ʼn amptelike dissiplinêre verhoor. Die leerder sal sy eksamen by die distrikskantoor aflê sodat die ondersoek ongehinderd kan voortgaan.

Die departement het die voorval ten sterkste veroordeel. “Dié soort gedrag in ons skole is onaanvaarbaar en ons doen ʼn beroep op ouers om te voldoen aan hul primêre verantwoordelikheid om goeie waardes en norme aan hul kinders te leer.”

Andrew Louw, DA-leier in die Noord-Kaap, het die provinsiale LUR vir onderwys intussen versoek om dringend in te gryp rakende veiligheidskwessies by die skool.

“Daar is geen dissipline in skole nie en dié soort blatant minagtende gedrag kan nie geduld word nie.” Volgens Louw moet daar dringend ingegryp word om dissipline binne die klaskamer te verskerp en om die veiligheid van onderwysers en leerders te verseker.

“Die kwessie van veiligheid by skole in die Noord-Kaap is kommerwekkend en daar moet spoedig gereageer word op vroeë waarskuwingstekens.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

92 Kommentare

jongste oudste gewildste
Anoniem

Weet nie hoe wil hul he dissipline in skole en klaskamers moet verskerp, as die dissipline juis deur hulle weggeneem is nie??

Rita

Sulke dinge gebeur en sal al meer gebeur omdat kinders nie meer gedissiplineer mag word nie. Buig die boompie terwyl hy jonk is, maar nee, dan tas jy sy menseregte aan net sodat hy vrye reg het om ander mense se menseregte aan te tas!

IK

Natuurlik niks te doene met rassisme!! Die onderwyser het hom natuurlik op een of ander manier getart. Maar maak die bloedjies groot vir nóg erger dinge in die toekoms. Goddank ek het nie in pa en ma se voetspore gevolg . . .

Ivana Viljoen

Ja kyk, bring die rottang terug. Boere sielkunde is al wat werk vir ongedissiplineerde, ongeskikte kinders. n Goeie pakslae het nog nooit skade gedoen nie.

honourable member

Kinders het nie meer respek vir hulle ouers of onderwyers nie. Dis omdat hulle regte so in hulle koppe ingeprent word dat hulle nou wil maak soos hulle wil en hulle weet hulle kom niks oor nie. Dis hoekom hierdie land besig is om te vergaan.