Sewe in hof ná Mooinooi-vroue verdwyn

Die sewe verdagtes wat in die Brits-landdroshof in Noordwes verskyn in verband met die verdwyning van Joey en Anisha van Niekerk (5 Januarie 2018). Foto: Landi Slatter

Sewe verdagtes het Vrydag in die Brits-landdroshof in Noordwes verskyn in verband met die verdwyning van Anisha (30) en Joey (32) van Niekerk wat in Desember verlede jaar in die Mooinooi-omgewing vermis geraak het.

Aaron Sithole (23), Alex Mudau (36), Moses Rakubu (33), Koos Strydom (53), Vincent Strydom (29), Maruschka Opperman (18) en Jack Mokotedi het op aanklagte van moord, ontvoering, roof, die onwettige besit van ʼn vuurwapen en dwarsboming van die gereg verskyn.

Mokotedi se naam is voorheen weerhou omdat daar onsekerheid was of hy minderjarig is of nie, maar die staatsaanklaer in die saak het intussen bevestig dat hy nie minderjarig is nie.

Die sewe verdagtes se aansoeke om borgtog is tydens die  hofverrigtinge bespreek.

ʼn Regsverteenwoordiger vir drie van die beskuldigdes het aan die hof gesê dat daar ʼn fout op die klagstaat is. Volgens hom lui die klagstaat dat een van die verdagtes reeds in November 2017 in hegtenis geneem is en eers op 15 Desember 2017 in die hof verskyn het.

Die staatsaanklaer het toegegee tot hierdie fout. Die regsverteenwoordiger beweer die betrokke beskuldigde is eers op 12 Desember in hegtenis geneem en het toe op 15 Desember in die hof verskyn. Hy het daarop gewys dat dit steeds langer as die wetlike 48 uur is waarbinne ʼn verdagte moet verskyn en geëis dat dié verdagte se saak van die rol geskrap word.

Die sewe verdagtes wat in die Brits-landdroshof in Noordwes verskyn in verband met die verdwyning van Joey en Anisha van Niekerk (5 Januarie 2018). Foto: Landi Slatter

Landdros Stanley Maribi het gesê die verdagte se regspan sal eers aan die hof bewyse van die datum van sy inhegtenisneming moet lewer voordat so ’n versoek oorweeg kan word.

Maribi het die saak tot 10 Januarie 2018 uitgestel wanneer al sewe verdagtes na verwagting formeel om borgtog sal aansoek doen.

“Alhoewel dit as onregverdig geag mag word teenoor dié wat al langer in aanhouding is, kan dit net sowel tot hul voordeel wees. Die hof voel almal se aansoeke moet gelyk aangehoor word. Ons sal wag totdat van die verdagtes se regshulpverteenwoordigers ook voorberei het en reg is om met die borgtogaansoek voort te gaan,” het hy gesê.

Van die verdagtes se regsverteenwoordiger kon nie vandag se hofverrigtinge bywoon nie omdat hy glo aan die streekshof verbonde is en dus nie beskikbaar was nie.

Die openbare galery in die hof was volgepak met familielede van die twee vermiste vroue en gemeenskapslede in swart geklee. Buite die hof het ʼn groep mense plakkate vasgehou waarop daar staan: “Vrede vir Anisha en Joey. Bring hulle veilig terug. Stop misdaad in Suid-Afrika.”

Maroela Media het vroeër berig Joey en Anisha is op 10 Desember omstreeks 07:30 vir die laaste keer in die Mooinooi-omgewing gesien waar hulle saam op ʼn kleinhoewe woon. Hulle was op pad na Pretoria om Joey se pa se roudiens by te woon, maar het nie hul eindbestemming bereik nie en is sedertdien nie weer gesien nie.

Hul uitgebrande Nissan X-Trail-sportnutsvoertuig is later in die Magaliesburg-omgewing gevind. Vroeër vandeesweek is beendere gevind wat die polisie vermoed moontlik die oorskot van Anisha en Joey kan wees. Die beendere is vir forensiese toetse gestuur om die oorsprong daarvan te bevestig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

33 Kommentare

jongste oudste gewildste
Dis Hartseer

Dat mens jou eie mense so kan doodmaak, mag julle sit vir altyd, eintlik verdien julle wat hierdie twee vrouens deurgegaan het! DOODSTRAF! Sies man!

Smirre

Ek sien ek mag niks sê wat kan lei tot haatspraak , kru en presoonlike aanvalle nie, dus weerhou ek my om enige opmerkings te maak.

wicus

DIE MAN MET TATTOOS LYK MAAR GAGGA,

Christelle

Dis Hartseer ek stem volkome saam met jou!

E.K. die eerste

Sien daar is vroulike verdagte van maar 18 – kry sy nie skaam? Is daar nie IETS in haar wat sê ek moet uitkom met enige inligting wat kan help nie? Sy moet IETS weet as sy nie self betrokke is nie. Komaan doen die regte ding!