Sewe sterf in brand

Die polisie in Koster, Noordwes, het ʼn verdagte in hegtenis geneem nadat twee vroue en vyf kinders in ʼn brand gesterf het.

Brig. Leonard Hlathi, woordvoerder van die polisie, het gesê die polisie is omstreeks 00:35 na die Reagile-township naby Koster ontbied ná berigte dat ʼn plakkershut aan die brand is. Met die polisie se aankoms op die toneel is hulle meegedeel dat daar steeds mense in die brandende plakkershut is.

Die nooddienste is ook na die toneel ontbied en die brand is geblus. Die oorskot van twee vroue en vyf kinders is in die puin gevind. Volgens Hlathi was die kinders tussen twee en 15 jaar oud. Die een vrou was in haar 70’s en die ander vrou in haar laat 30’s of vroeë 40’s. Nog drie mense wat in die plakkershut was toe dit aan die brand geraak het, kon daarin slaag om te ontsnap.

Hlathi het intussen bevestig dat ʼn 49-jarige man in hegtenis geneem is en op sewe aanklagte van moord tereg sal staan. Die verdagte is glo ʼn ekskêrel van een van die bejaarde vrou se kleindogters.