Shivambu vra om verskoning ná onderonsie met joernalis

Floyd Shivambu (Foto: Siphelele Dludla/ANA)

Floyd Shivambu, adjunkleier van die Ekonomiese Vryheidsvegters (EFF), het om verskoning gevra vir ʼn “onderonsie” met ʼn joernalis op die parlement se perseel.

Volgens die Parlementêre Persgalery-vereniging het Shivambu Netwerk24 se verslaggewer, Adrian de Kock, aangerand toe hy ʼn vraag aan hom wou stel en foto’s wou neem.

Die organisasie sê hy is geskok oor die voorval en De Kock het alle reg om strafregtelike klagtes teen Shivambu aanhangig te maak.

Maroela Media het vroeër berig de Kock het saam met ander joernaliste buite die parlement gewag op nuus oor die DA se tugverhoor teen Patricia de Lille. De Kock het aan Netwerk24 gesê Shivambu en nog ander mans het daar aangekom en gevra vir watter saak hulle daar is. Volgens hom het Shivambu en die ander mans skielik geëis dat hy die foto wat hy van hulle geneem het, moet verwyder. Hulle het sy toerusting probeer gryp en hom rondgepluk. Ander joernaliste het die onderonsie afgeneem.

Shivambu het gesê De Kock het foto’s van hom geneem en daarop aangedring om met hom te praat terwyl hy dokumente ontvang het wat met ʼn vergadering van die parlementêre staande komitee oor finansies verband hou. Hy het nie besef hy is ʼn verslaggewer nie, het Shivambu verduidelik.

“Ek was haastig om by die komiteevergadering uit te kom, en ek aanvaar dat my ongeduld met die man onvanpas was,” het Shivambu bygevoeg. “Daar was ʼn onderonsie; dit was glad nie ʼn aanval op die joernalis of mediavryheid nie. Ek is jammer oor die voorval en glo dit moes anders hanteer geword het. Ek aanvaar volle verantwoordelikheid en vra om verskoning dat ek in ʼn onderonsie betrokke geraak het met ʼn persoon wat ek later uitgevind het is ʼn joernalis. Ek sal skriftelik ʼn amptelike verskoning aanstuur, want ek glo dit moes nie gebeur het nie.”

Shivambu het egter bygevoeg dat hy nie onderhoude oor die kwessie sal toestaan nie, want hy glo daar is belangriker dinge om te bespreek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
ontevrede leser

aa, eish, sorry, nou word alles onder die mat ingevee, SORRY, maak mos alles reg

Joshua

Nee wat, Shivambu, dis hoogtyd dat jul EFF see rassisme en haat in die howe aan die wereld uitgewys word.

Frans

Wat gaan nou gebeur? Ag ons los dit. Hy let mos om verskoning gevra!! Was die bordjies verhang, was daar nou staking en brande gewees.

Gestremde

Gaan staan in die hof en verduidelik jou storie daar Shivambo en ek beveel aan direkte gevangenisstraf want jy toon geen opregte berou nie en maak jouself saam met die EFF herhaaldelik skuldig aan die rassistiese gedrag. Mense wat berou het toon nie dieselfde gedrag oor en oor nie.

Gerrit

Verskoning is n goeie begin maar die wet moet sy gang gaan die fotograaf is aangerand en dit is n kriminele oortreding en die bewyse is op kamera so hy is skuldig en moet die gevolge dra.