Sibanye verbind hom tot veiligheid

Argieffoto

Sibanye-Stillwater het Woensdag erken dat die agteruitgang van veilige werksomstandighede by sy ondergrondse bedrywighede nie aanvaarbaar is nie, en het homself verbind om veiligheid te verbeter en te herstel.

ʼn Gedenkdiens is Woensdag gehou vir vyf mynwerkers wat gesterf het as gevolg van blootstelling aan gas en hitte by Sibanye se Kloof Ikamva-myn nadat hulle verlede week ʼn verlate skag betree het.

Die departement van minerale hulpbronne het die waarnemende hoofinspekteur van myne opdrag gegee om ondersoek in te stel oor Sibanye se veiligheidstandaarde, aangesien 20 mynwerkers reeds sedert Februarie vanjaar in nege voorvalle gesterf het.

Neal Froneman, uitvoerende hoof van Sibanye, het gesê die maatskappy is “ontsteld” oor die verlies van hul werkers die afgelope paar maande. “Dis vir ons almal baie sleg as ons werknemers beseer word of sterf as gevolg van veiligheidsvoorvalle. Alhoewel ons nie die skade kan herstel wat plaasgevind het nie, sal ons steeds die families na die beste van ons vermoë bly ondersteun in hul rouproses,” het hy in ʼn verklaring gesê.

“Die veiligheid van ons werknemers bly ons primêre doelwit en, as dit nie veilig is om te werk nie, verwag ons dat die toestande herstel sal word voor die bedrywighede sal hervat. Daar is omvattende bewyse dat goedgeorganiseerde werksplekke veilig en produktief is; en dit is ons doelwit.”