Sielkundige waarneming gevra vir pa wat dogter glo verkrag, vermoor

Die staat het gevra dat die man, wat glo vreemde gedrag toon, vir sielkundige waarneming gestuur word. (Foto: Nasionale Vervolgingsgesag)

WAARSKUWING: Hierdie berig bevat inhoud wat sommige lesers kan ontstel.

ʼn 27-jarige Oos-Kaapse pa wat daarvan beskuldig word dat hy sy tweejarige dogter verkrag en vermoor het, bly agter tralies nadat hy vir ʼn tweede keer in die hof verskyn het.

Die man van Zwelitsha het verlede Maandag vir die eerste keer verskyn, nadat inwoners hom in hegtenis geneem en aan die polisie uitgelewer het. Hy word daarvan beskuldig dat hy sy 20 maande oue dogtertjie verkrag het. Die peuter is ná die beweerde voorval na ʼn hospitaal gehaas, waar sy dood is.

Die aanklaer het verlede week gevra dat die man vir sielkundige waarneming gestuur word, omdat hy aggressief is en vreemde gedrag toon. Dit sluit in dat hy hom in die aanhoudingselle met ontlasting besmeer, sê Luxolo Tyali, woordvoerder van die Nasionale Vervolgingsgesag (NVG) in die Oos-Kaap.

Die man het boonop Maandag aan die hof ʼn ander naam verskaf.

Aanklaer Justice Tsala het gister aan die hof gesê die plaaslike gesondheidsentrum het gevra om ʼn brief aan die Mthatha-streekhospitaal te stuur, sodat hy daar sielkundige waarneming kan ondergaan.

Nadat die beskuldigde van sy regte ingelig is, het hy aanvanklik gesê hy wil sy eie verdediging behartig omdat sy “geloof nie toelaat dat iemand namens hom lieg nie”. Terwyl ʼn tolk besig was om hierdie stelling te vertaal, het die man van plan verander en gesê hy het nie geld nie, maar benodig die dienste van ʼn “behoorlike en eerlike prokureur met ʼn bewese geskiedenis”.

Landdros Fika Mgudlwa het die saak uitgestel sodat die man regshulp kan bekom. Die hof het geen bevinding oor die sielkundige waarneming gemaak nie.

Volgens Tyali moes die polisie die beskuldigde daarna na die aanhoudingselle terugsleep, nadat hy geweier het om die hofsaal te verlaat. “Hy het daarop aangedring dat ʼn regsverteenwoordiger dadelik beskikbaar gestel word sodat sy saak afgehandel kan word.”

Volgens die NVG het die beskuldigde voor die dogtertjie se dood glo gewelddadig teenoor familielede opgetree en na bewering selfs probeer om sy ma te verkrag.