Silo’s val soos domino’s

Foto: Western Cape Truckers/Facebook

Foto: Western Cape Truckers/Facebook

Veertien silo’s wat nagenoeg 11 500 ton kanolasaad geberg het, het Dinsdagoggend by Sentraal-Suid Koöperasie se aanleg in Swellendam ineengestort.

Henk de Beer, hoofbestuurder: bedrywe van die Sentraal-Suid Koöperasie, het aan Maroela Media het gesê die eerste silo het omstreeks 09:30 inmekaargestort. “Dit het ʼn domino-effek veroorsaak en die ander dertien silo’s het gevolglik platgeval. Dit het binne ʼn oogwink gebeur.”

Volgens De Beer is dit ʼn “wonderwerk” dat niemand tydens die voorval dood of beseer is nie. “Soos jy kan dink is dit gewoonlik daardie tyd van die oggend baie besig, maar ons is geseënd dat niemand beseer is nie, want dit het letterlik binne sekondes gebeur.”

De Beer het gesê al veertien silo’s was vol en dat daar nou gepoog sal word om die saad te herwin en dit elders te berg. “ ’n Latere proses sal wees om die strukturele skade en die silo’s self te herstel. Dit is bietjie van ʼn uitdaging om die saad te herwin aangesien dit nie maklik is om kanolasaad te berg nie. Ons moet ook probeer om voor volgende jaar se oesseisoen weer bergingskapasiteit te skep.”

Volgens De Beer kan die ineenstorting nie in dié stadium aan enige spesifieke oorsaak toegeskryf word nie. “Ingenieurs sal ʼn ondersoek doen om te bepaal wat tot die ineenstorting gelei het.”

De Beer het gesê die saad word gebruik om kanola-olie te vervaardig, maar dat die ineenstorting gelukkig nie ’n invloed op verskaffing sal hê nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.