Sisulu-taakspan eis byna R4 miljoen vir reis, wasgoed

Lindiwe Sisulu (Foto: Twitter)

Die Demokratiese Alliansie versoek dat twee snelreaksiespanne (NRRTT), wat deur die vorige minister van menslike nedersettings, Lindiwe Sisulu, opgestel is, ontbind moet word.

Emma Louise Powell, die DA se skaduminister van menslike nedersettings, sê die versoek is gerig aan Sisulu se opvolger, Mmamoloko Kubayi, en die minister van water en sanitasie, Senzo Mchunu.

“Lede van die twee omstrede NRRTT’s is persoonlik aangestel deur Sisulu – sonder dat hulle eens CV’s ingedien het. Dit sluit die voormalige #FeesMustFall-leier Chumane Maxwele, oud-PAC-leier Thami ka Plaatjie en oud-Cope-streekleier Mbulelo Ncedana in,” het Powell gesê.

“Daar word lankal vermoed dat minister Sisulu staatshulpbronne aangewend het om ʼn politieke oorlogskamer vir haarself op te rig – verbloem as ʼn ‘snelreaksiespan’. Hierdie bekommernis duur voort in die afwesigheid van enige konkrete bewyse van watter bestuursverwante uitkomste dié eenhede die afgelope twee jaar bereik het.”

Ondanks voortgesette versoeke deur die DA om die eenhede te ontbind, asook formele versoeke wat aan die Staatsdienskommissie en die openbare beskermer gerig is, jaag dié eenhede jaarliks steeds meer as R16 miljoen uit die belastingbetaler se sak – slegs vir salarisse.

“ʼn Parlementêre vraag deur die DA het nou onthul dat die NRRTT vir water en sanitasie sedert Maart 2019 die byna bankrot departement meer as R3,7 miljoen gekos het vir reis- en akkommodasie-uitgawes.”

Dit is buiten inligting wat gister deur die DA onthul is dat Sisulu se hoof-assistent, Mpumzi Mdekazi, op sy eie sedert Mei 2019 meer as R1,76 miljoen se reis-eise ingedien het. Mdekazi ontvang boonop ʼn salaris van R142 920 as ʼn lid van die raadgewende komitee vir die 15 dae wat hy per maand werk.

“Dit is ondenkbaar dat ʼn groep politiek-aangestelde kapitaalvrate toegelaat is om miljoene rand van die belastingbetaler se geld te spandeer op luukse reise, akkommodasie en persoonlike wasgoeddienste.”

Die DA is van voornemens om alle betrokke reis-eise aan die ouditeur-generaal voor te lê vir ʼn volledige ondersoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
Pablo

Die enigste kwalifikasie vir n pos in die ANC regering is BEEE en korrupsie. Geen ander kwalifikasie word benodig nie. En President Ramaphosa vertel die wêreld hy gaan dit verander. Zero kans dat dit gaan gebeur.

Hasie

Hou duim vas iets kom hiervan .

Strandloper

Verbasend…tog kom hul telkens daarmee weg!

Martie Smartie

En die soustrein stoom voort!! Met Sisulu in die heel voorste wa. Wat se jy hiervan Cyrrilll, mnr die treindrywer? Rol wiele rol, en ons sakke word vol!!

annie

… en Sisulu se ambisie is glo om misdrywe uit te roei? Sy glo duidelik sy is ‘n onaantasbare prinses… pappa se dogter…