Altesaam 18 skoliere is Vrydag in Peddie in die Oos-Kaap in die hospitaal opgeneem vir voedselvergiftiging, het die departement van gesondheid gesê.
“Die skoliere het simptome getoon soos naarheid, maagpyn en hoofpyn nadat hulle sjokolade geëet het wat ʼn smous vir hulle gegee het,” het Sizwe Kupelo, woordvoerder van die departement, gesê.
Die skoliere van Pumla High School word by die Nompumelelo-hospitaal behandel.
“Altesaam 24 mense het verlede week in Dutywa siek geword toe hulle die vleis geëet het van ʼn koei wat gevrek het,” het Kupelo bygevoeg. “Ses seuns is ook in die hospitaal opgeneem nadat hulle suurmelk gedrink het wat hulle by ʼn spazawinkel in Peddie gekoop het. Hulle is almal reeds ontslaan.”