Skool gedwing om dubbelmediumklasse in te voer

In die eerste vier grade het die Hoërskool King Edward twee gekombineerde Afrikaanse klasse, vier gemengde Engelse klasse en vier hoofsaaklik swart Engelse klasse vir leerders wat nog nie Engels onder die knie het nie. Die onderwysdepartement sê dié “rasseskeiding” moet end kry. Foto: Facebook

Die gekombineerde skool op die Oos-Kaapse dorp Matatiele mag nie langer sy handjievol Afrikaanse kinders in parallelmediumklasse onderrig nie, maar moet onmiddellik dubbelmediumklasse in alle grade instel.

Nagenoeg 86% van die leerders aan die Hoërskool King Edward se moedertaal is Xhosa of Sotho, maar omdat die skool tradisioneel Afrikaans en Engels was, is parallelmediumklasse in die eerste drie grade behou sodat Afrikaanse kinders in afsonderlike klasse in hul moedertaal onderrig kon word.

Die Oos-Kaapse onderwysdepartement het op 14 Januarie ʼn dringende ondersoek na die skool se taalbeleid begin ná ʼn berig in die Sunday Times dat kinders kwansuis op grond van hul ras geskei word.

Verlede jaar het die skool 13 Afrikaanse leerders in die gekombineerde klas vir gr. R en gr. 1, en sewe in die gekombineerde klas vir gr. 2 en 3 gehad.

In die agt Engelse klasse vir dieselfde grade was sowat 27 leerders elk: vier klasse vir leerders wat King Edward se kleuterskool bygewoon het en vier van ander skole, hoofsaaklik leerders wat nog nie vantevore in Engels onderrig is nie.

Ouers het volgens die Sunday Times van 13 Januarie af gekla die Afrikaanse kinders kry meer individuele aandag in hul klein klassies as die ander kinders, terwyl swart ouers ook ontevrede was dat hul kinders in ʼn aparte klas onderrig word.

ʼn Hoëvlakspan van die onderwysdepartement het opdrag gekry om ʼn vergadering met ouers, belanghebbendes en die skool se beheerliggaam te belê om oor die kwessie te beraadslaag, sê Mali Mtima, woordvoerder van die Oos-Kaapse onderwysdepartement.

Dubbelmediumbeleid is die enigste werkbare opsie vir die skool.

Nadat die departement se taalbeleid aan die vergadering voorgehou is en die bevindings van hul ondersoek voorgelê is, het die vergadering besluit:

  • Die skool word 14 dae gegun om te herbesin oor die toewysing van onderwysers en die invoering van ʼn dubbelmediumbeleid as die enigste “werkbare opsie vir die skool aangesien vasgestel is dat leerderskeiding aan die skool nie regverdigbaar is nie en daarom hersien moet word”.
  • Die skool moet dadelik ophou om leerders te belet om tydens pouses in Afrikatale met mekaar te praat.
  • Die departement lig die skool in dat parallelmediumonderrig nie regverdigbaar is nie omdat die geringe getal Afrikaanse leerders aan die skool nie ʼn afsonderlike klas regverdig nie. Dieselfde moeite wat met Afrikaans gedoen word, moet vir Sotho-leerders gedoen word. Dis onaanvaarbaar om nie klasse in Sotho aan te bied nie, want daar is meer Sotho-leerders as Afrikaanse leerders in die skool.
  • Xhosa moet tot huistaal of eerste addisionele taal vir sy sprekers verhef word. Die eerste addisionele taal (Afrikaans) wat vir leerders aangebied word, is nie geregverdig nie. Die meeste leerders is Xhosasprekend; daarom kan daar nie ʼn uniforme benadering vir almal wees nie.
  • Die departement sal beweerde “subtiele” rassisme by die skool ondersoek.

Adv. Andrew Duminy, voorsitter van die skool se beheerliggaam, was nie Maandag beskikbaar om kommentaar te lewer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
BlinkStephaans

Maar die ontevrede ouers het darem seker geweet hulle skryf hul bloedjies in n afrikaanse skool in of hoe? Ek is seker daar is n skool nie te ver van die een waar die leerders vrylik hul moedertaal kan praat en in onderrig word. Dalk moet die slim departement eerder ondersoek instel waarom die kinders nie daar ingeskyf is… die standaard van onderwys dalk die op standaard nie?

Gertyda

Ja nee hier by ons word die kinders in zulu onderrig en toe ek sê ek het kinders om engels te laat onderrig is dit van hand gewys

Jane

Wel as ENIGE ouer so stupid is om sy kind daar te hou verdien hy alles wat na sy kant toe kom. Gaan sit die kind in ‘n skool waar hy in sy eie taal onderrig kan word. Al beteken dit hy moet koshuis toe gaan … moenie dat die staat jou so boelie nie. Dit is tog obvious dat kinders wat NET IN ZULU onderrig word in EEN KLAS SAL wees?? Wat het dit met rasseskeiding te doen? Dit is TAALSKEIDING of moet die wittes ook nou ZOELOE leer?

Charles

Ag my Hemel, kom nou man!!

Milan

Ek is bevoorreg dat my kinders in ‘n private skool skoolgaan en tree ek dus versigtig met my kommentaar. Private skole is die enigste alternatief. Die ANC regering sal nie ophou totdat Afrikaans en sy geassosieerde “Witheid” in totaliteit uit al sy instansies uitgewis is nie. Hoe meer kinders in private skole geplaas word, hoe meer bekostigbaar word dit vir ons.