Skoolkalender vir 2021 verander wéér

Argieffoto (Foto: Verskaf)

Indien die kalender in sy huidige formaat aanvaar word, sal onderwysers vanjaar minder as drie weke skoolvakansie hê indien naweke en openbare vakansiedae nie ingereken word nie. Leerders sal om en by 22 vakansiedae hê (ongeveer 38 indien naweke en vakansiedae ingereken word).

Die departement van onderwys het Donderdag die voorgestelde wysigings vir die 2021-skoolkalender aan die onderskeie onderwysvakbonde gestuur vir kommentaar. Die wysigings is aangebring aangesien die datum vir die heropening van skole vir die 2021- akademiese jaar met twee weke tot 15 Februarie uitgestel is.

Onderwysers en onderwysvakbonde het reeds hul ongelukkigheid oor die voorgestelde veranderinge uitgespreek en sal Vrydag aan ʼn konsultasievergadering met die departement deelneem om dit te bespreek.

Volgens die gewysigde kalender eindig die eerste kwartaal nou op 23 April. Die tweede kwartaal strek van 3 Mei tot 9 Julie, terwyl die derde kwartaal van 26 Julie tot 1 Oktober duur. Die vierde kwartaal strek van 11 Oktober tot 15 Desember.

Onderwysers moet egter etlike dae tydens die skoolvakansies by die skool wees om administratiewe take te verrig, insluitende 17 Desember.

Chris Klopper, uitvoerende hoof van die SAOU, sê onderwysvakbonde is baie ongelukkig oor hierdie wysigings. Dié ongelukkigheid spruit hoofsaaklik daaruit dat onderwysers nou net 19 dae vakansie het en moontlik reeds besprekings vir vakansie gemaak het wat nou sal moet verander. Klopper meen ook dit is “malligheid” dat onderwysers 17 Desember by die skool moet wees.

“Groot ontevredenheid heers onder die vakbonde en ons sal dit more met die departement bespreek. Ons verwag dat dinge warm onder die kraag gaan raak by more se vergadering,” sê Klopper.

Volgens Klopper het klagtes oor dié moontlike wysigings vanaf SAOU-lede ingestroom . Die lede voel grotendeels dat die minder vakansiedae die leerders en onderwysers gaan uitput.

“Lede is ook gefrustreerd omdat hulle voel die datums is nie vas nie en dat hulle nie hul jaar vooruit kan beplan nie. Met sprake van ʼn moontlike derde golf van infeksies wat later die jaar kan kop uitsteek, gaan daar weer ʼn onsekerheid oor die datums heers.”

Volgens Klopper moet talle ouers weer hul vakansieplanne verander en die moontlikheid bestaan dat hulle geld sal verloor.

Die SAOU vra dat lede enige insette of kommentaar oor die veranderinge aan die kalender na [email protected] stuur.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

32 Kommentare

jongste oudste gewildste
Racheltjie Debeer

Ag nee REGTIG!!!!!! Hou dit soos dit, stuur die kinders terug skool toe en hou op om belasting betalers se geld te mors. Ons kon alreeds nie in 2020 met verlof gaan nie weens die inperking en die rondskuiwery van datums. Nou verloor ons alweer geld in 2021 en die kinders verloor belangrike leertyd.
Dis totaal absurd!

Lola88

Ja…natuurlik sal die unies ‘n eier lê! So groot ellende dat jy net 19 dae vakansie kry…Meeste van ons kry net 19 dae. As hulle dan nie wil klas gee nie, hoekom wil hulle dan nog onderwyswers wees? Ons almal is verontrief deur hierdie hele tydperk, bietjie aanpas en bietjie opofferings maak vir ‘n jaar of twee in jou lewe, om ons jongmense se toekoms te vorm, kan tog seker nie die einde van jou wêreld beteken nie?

Liesel

Ja nee regtig hulle wou later begin. Hulle het 2 weke ekstra verlof klaar gekry

Wilhelm

Klink of Chris Klopper sal verkies dat skool toe bly vir 2021, dan hoef niemand hul vakansie planne te verander nie.

Andre

Ek wens ek was so gelukkig om van 17 Desember verlof te he!