Skooltragedie: Matriekseun een van oorledenes

Roydon Olckers. Foto: Facebook

ʼn Matriekseun is een van die drie leerders wat Vrydag dood is ná ʼn strukturele ineenstorting by die Hoërskool Driehoek in Vanderbijlpark.

Roydon Olckers (17) en twee gr. 8-leerders, ʼn seun en ʼn meisie, is dood ná die loopvlak tussen een skoolgebou en ʼn ander kort ná 08:00 ineengestort het. Nicky Snyman, ʼn familielid van Olckers, het sy dood bevestig.

Die ander twee oorledenes se name is nog nie bekend nie.

Minstens vyf leerders het kritieke beserings opgedoen en drie van die leerders is per helikopter na nabygeleë hospitale vervoer vir dringende mediese behandeling, het Shawn Herbst, woordvoerder van Netcare 911, vroeër gesê. Meer as 20 leerders is beseer en hul beserings wissel van gering tot matig.

Panyaza Lesufi, LUR vir onderwys in Gauteng, het tydens ʼn mediakonferensie by die skool aangekondig dat die skool met onmiddellike inwerkingtreding gesluit is. Inspeksies sal by die skool gedoen word om seker te maak al die boustrukture is veilig voor die skool heropen sal word.

Foto: Verskaf

Die Federasie van Beheerliggame van Suid-Afrikaanse Skole (Fedsas) het intussen gesê hy is diep getref deur die tragedie.

“As ouer raak hierdie geweldige verlies my diep. As onderwyskollega van die personeel en beheerliggaam van die skool sal ons van Fedsas se kant af alles moontlik doen om ons lid te ondersteun,” het Paul Colditz, uitvoerende hoof van Fedsas, gesê. Die beheerliggaam van die skool is ’n lid van Fedsas.

Hoewel ’n ondersoek na die voorval reeds aan die gang is, is dit steeds alle rolspelers se eerste prioriteit om die skoolgemeenskap op emosionele vlak by te staan deur middel van traumaberading.

“Fedsas se hulpbronne en uitgebreide kennis op die gebied van onderwysbestuur is egter tot die beskikking van diegene wat die ondersoek lei, asook vir enige ander behoeftes waarmee ons bystand kan verleen.”

Colditz het gesê dit is verblydend om te sien hoe Suid-Afrikaners saamstaan in tye van nood. “Almal help waar hulle kan – van die Vanderbijlpark-gemeenskap tot die Gauteng-onderwysdepartement. Dit is in tye soos hierdie dat ’n mens opnuut besef dat ons eerstens mekaar se kollegas en vriende is.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

43 Kommentare

jongste oudste gewildste
Charlotte

Hartverskeurend. Mag die Vader die ouers
en gesinne van die 3 kinders styf vashou.
Ek huil saam met julle

Sandy

My innige innige simpatie gaan aan al die ouers wat kinders verloor het en die wie se kinders beseer is. Ek lees nie die rassehaat nie, want God sal met hulle deal. Die enigste ding wat ek wil se is dat die kinders, maak nie saak watter kleur, is onskuldig. Kids are innocent and off limits.

Blikke

Liewe Mammas en Pappas ek is so bitter jammer vir julle! Mag GOD julle die gemoedskalmte gee en die aanvaarding waarvoor nie een van ons voorbereid is nie. Ek bid vir U om genade en dat God julle sal onderskraag in hierdie moeilike tyd.

Liendempers

My hart is stukkend vir almal, die maats, die onderwysers, die ouers en familie. Ons bid vir julle.

Blikke

En as ek kon sou ek die BLF nou iets toegesnou het maar ek weet dat hierdie forum nie die aangewese plek daarvoor is nie. RUS IN VREDE…..julle verdien dit nie!!