‘Slegte nuus by petrolpompe wag’

Argieffoto

Ná die onlangse welkome dalings in brandstofpryse lyk die prentjie vir Maart baie minder rooskleurig.

Die Automobiel Assosiasie van Suid-Afrika (AA) sê op grond van die ongeouditeerde brandstofprysdata wat deur die Sentrale Energiefonds vir die eerste twee weke van Februarie uitgereik is, gaan ʼn styging in internasionale petroleumpryse ʼn negatiewe invloed op brandstofpryse uitoefen.

“Olie het vir die grootste deel van Januarie binne ʼn baie klein marge verhandel, maar sedert die begin van Februarie sien ons ʼn deurlopende styging,” het die AA gesê. “Veral in die afgelope week het hierdie tendens verskerp.”

Die swakker prestasie van die rand teenoor die dollar vertroebel die prentjie nog meer. “Die rand het van 1 Februarie van R13,20 teenoor die dollar gedaal tot R14,12 teenoor die dollar op 14 Februarie. Dit is nie goeie nuus vir brandstofverbruikers nie, veral nie wanneer die oliepryse ook styg nie.”

Die AA voorspel dat petrol in Maart met sowat 43c per liter sal styg, terwyl diesel na verwagting 62c per liter meer sal kos. Die prys van paraffien sal na verwagting met 47c styg.

“Indien die tendense in die oliepryse en die rand se prestasie nie stabiliseer nie, kan die prentjie nog donkerder raak voor die einde van die maand. Ons raai motoriste aan om ʼn verhoging in brandstofpryse by hul begrotings in te reken vir volgende maand.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Onnie

Ek het verwag dat die petrolprys weer sal styg. Want elke keer as hy daal kom haal hulle jou weer in met n klomp stygings. Dan is dit asof die prys nooit gedaal het nie.

Ig

Hier gaan ons alweer, Eskom kort geld. Die prys sal n maand voor verkiesing weer afkom

Pieter

Geluk Eskom! Daar is baie faktore wat’n rol speel, maar julle het beleggersvertroue ‘n deeglike knou toegedien met jul beurtkrag, wat ook die rand goed laat tuimel het. Iewers sal daar nog verantwoording gedoen moet word!

Johnnie

Hier kom dit hulle soek geld vir die ANC se verkiesing, geld vir Eskom, geld vir SAA, en sommer nog genoeg om in hulle gatsakke te sit voor hulle uitgevang word vir korrupsie.
die taxi bedryf sê ook niks nie want hulle word gesubsideer deur die regering vir brandstof, so hoekom sal dit hulle pla.

Genieve

Nou moet ons vir Eskom betaal belaglik