Slenter teiken oudsoldate

'n Skermskoot van 'n Facebook-blad waarop die slenter ook glo versprei word.

‘n Skermskoot van ‘n Facebook-blad waarop die slenter ook glo versprei word.

Talle oudsoldate is glo deur ʼn slenter gevang wat hulle na bewering sou help om te registreer vir veteraanvoordele van die regering.

Die slenter, wat glo deur ene Gerhard Smit behartig is, waarborg militêre veterane wat tussen 1960 en 1994 in die Suid-Afrikaanse weermag gedien het, hulle sal verskeie voordele van die Departement vir Militêre Veterane (DMV) ontvang sodra hulle by die departement geregistreer is.

In die dokumente wat Smit glo aan oudsoldate stuur en waarvan ʼn kopie in Maroela Media se besit is, vra Smit ʼn fooi van R500 om mense by die DMV te registreer en die voordele te eis. Hy beweer in die dokumente hy doen dit om mense te help wat ver van Pretoria af bly en nie self daarheen kan reis om te registreer nie. Hy waarborg in die dokument hy sal, wanneer die fooi betaal is, mense se name op die DMV se voordeleregister laat plaas.

Smit het beweer almal wat geregistreer is, sal mediese en behuisingsvoordele ontvang en geregtig wees op werksgeleenthede en skadevergoeding vir post-traumatiese stres. Hy beweer ook veterane wat meer as R10 000 per maand verdien, sal ʼn lompsom-uitbetaling van die departement ontvang, terwyl oudsoldate wat minder as R10 000 per maand verdien, ʼn pensioen van R3 200 per maand sal ontvang.

Hy is ook glo die persoon wat díe aanbod met ʼn Facebook-blad, War Veterans Law Clinic, versprei. ʼn Inskrywing wat op 7 Desember gepubliseer is, lui egter dat die administrasiefooi net R200 is en dat die hy geregtig sal wees op 25% van die geld wat hy vir oudsoldate “wen”.

Die DMV het intussen in ʼn brief aan die Raad vir Militêre Veterane Organisasies bevestig dat hulle ʼn klagte teen Smit en sy helper, ene Dave Steynberg, aanhangig gemaak het. Volgens die brief is die polisie en die nasionale vervolgingsgesag (NVG) besig om die saak te ondersoek, maar niemand is nog in hegtenis geneem nie.

Maroela Media het die DMV om kommentaar genader, maar wag steeds op terugvoer. Besonderhede oor veteraanvoordele is egter op die departement se webtuiste beskikbaar.

Nadat die DMV op sy Facebook-blad die publiek teen Smit se slenter gewaarsku het, het talle Facebook-gebruikers gereageer en gesê hulle is deur Smit genader oor die aanbod.

Dit kom voor asof Smit se selfoonnommer afgesny is en Maroela Media kon hom nie vir kommentaar bereik nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Christo

As iets te goed lyk !

Pierre Celliers

Sy naam is ook nie Gerhard Smit nie. Los maar, niemand gaan hierdie
Skelm ooit aankeer nie!

Braam Maree

Ek is nou eers bly dat nie een van die dom Soldate op die grens in my Peleton was nie. Sulke goed word gewoonlik in die Staatskoerant afgekondig. Dink oud Soldate dat die ANC Regering regtig vir julle geld sal gee. Ek hoop die gieriges het sommer baie geld verloor.

wipgat

Het so n email ontvang, toe ek sien jy moet R500 vir hulle oorbetaal… Toe weet ek dit is maar net nog n scam.

GERRIT

WEET JULLE AS DIE VETERANE ORGANISASIE NET MEER INFORMASIE WIL BEKEND MAAK WANT DAAR IS 1000 DE OUD SOLDATE WAT NOG NOOIT EERS VAN DIE SO- GENAAMDE ORGANISASIE GEHOOR HET NIE.

Daar is geen daadwerklike riglyne. VAN WIE om te kontak waar moet jy jouself aanmeld. watter soldate kwalifiseer. Is daar voordele. wat is die voordele en honderde ander vrae on- beantwoord.