Só bêre ANC glo poste vir pêlle

(Argieffoto ter illustrasie.)

Notules wat by vergaderings van die ANC se komitee oor ontplooiings geneem is en tot 2018 terugdateer, is glo klinkklare bewyse dat dié party sekere poste op die rade van staatsbeheerde ondernemings (SBO’s) vir hul kamerade uithou.

Die DA het Vrydag verskeie notules aan die media vrygestel waarin dit blyk dat CV’s van ANC-kaders in ʼn ander databasis as dié van ander aansoekers gestoor word.

Maroela Media het vroeër die week berig dat die staatskapingskommissie dié notules ná maande lange druk deur die DA bekend gemaak het.

Dr. Leon Schreiber, die DA se woordvoerder oor staatsdiens en administrasie, sê die notules wys tussen 3 Desember 2018 en 17 Mei 2021 het die ANC se kaderontplooiingskomitee met die aanstelling van senior staatsamptenare by minstens 96 verskillende staatsdepartemente, agentskappe en die rade van SBO’s ingemeng.

“Tydens vergaderings van die ANC-kaderontplooiingskomitee op 11 Mei, 3 Augustus en 26 November 2018 het die komitee poste vir ‘ANC-kaders’ en ‘stoere ondersteuners’ van die ANC op die direksies van SANParke, die kleinsakeontwikkelingsagentskap (SEDA), Transnet, Denel, die Suid-Afrikaanse Lugdiens (SAL), die Suid-Afrikaanse Bosboumaatskappy (SAFCOL), Lughawensmaatskappy van Suid-Afrika (ACSA), Sanral en die Nasionale Adviesraad vir Innovasie gereserveer.

“Dit lewer die duidelikste bewys nog dat kaping van die staat om die belange van die ANC eerder as die mense van Suid-Afrika te dien, onverpoosd onder die presidentskap van Cyril Ramaphosa voortgaan.”

Benewens die ANC-kaderontplooiingskomitee van 11 lede, impliseer die inligting verder dat huidige ministers Pravin Gordhan, Blade Nzimande, Mmamoloko Kubayi-Ngubane, Lindiwe Zulu en voormalige minister Edna Molewa uitdruklik SBO-raadsetels vir die ontplooiingskomitee “bespreek”.

Schreiber meen dit is egter waarskynlik dat direksiesetels insgelyks gereserveer word vir partykaders in direksies regoor die nasionale regering. Hy sê die notule van die vergadering op 11 Mei 2018 wys daarop dat “die ontplooiingskomitee ingestem het om teen 19 Mei 2018 name van mense wat ontplooiing versoek, vir oorweging in staatsbeheerde ondernemingsrade aan Pravin Gordhan deur te stuur”.

“Net so is daar tydens die vergadering van 3 Augustus 2018 ‘ooreengekom dat die lede [vermoedelik van die ontplooiingskomitee] hul voorstelle moet indien, en dat die verkorte CV’s by die minister [van vervoer] ingedien word’.”

Schreiber sê dit dui daarop dat die ANC-ontplooiingskomitee oor ’n lys CV’s beskik wat aan die komitee voorgelê is deur partykaders wat spesiale oorweging vir indiensneming in die direksies van SBO’s deur mense soos Gordhan en Nzimande ontvang.

“Trouens, tydens die vergadering van 11 Mei 2018 het Lindiwe Zulu blykbaar voorgestel dat hierdie werkreserveringsdatabasis geformaliseer word om die besonderhede van ‘alle ANC-lede wat in elke posisie in die regering, ondernemings en direksies ontplooi is’ te stoor en dat die name van diegene wat voorheen ontplooi was, nagevors moet word.”

Die DA sê verder dat die ANC se “deurlopende werkreserveringskema” grof teen vaardige aansoekers wat nie stoere ANC-ondersteuners of -kaders is nie, diskrimineer.

“Oor ’n tydperk van slegs ses maande tussen Mei en November 2018 het die ANC se nasionale kaderontplooiingskomitee poste vir partyvriende in die direksies van sommige van ons land se grootste SBO’s, waaronder die SAL, Transnet en Denel, gereserveer – ten spyte van die feit dat hierdie entiteite reeds deur ANC-kaders in finansiële vergetelheid geplunder is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

32 Kommentare

jongste oudste gewildste
Pierre

geen verslag nodig om dit uit te wys nie almal weet dit al jare lank

Diline

ANC is ‘n spul Kommuniste. Dis egter nie nuus vir ons almal – dis so duidelik soos daglig dat die ANC Kaders beheer uitoefen oor ALLES en ALMAL in hierdie land. Glo dat selfs die Howe en NVG ook deur hulle beheer word. Dit is weereens net ‘n bewys WAAROM die hele land in duie gestort het.

Papsak

Gemors !!!!!!!

Misky

Okay en wat nou? Wat kan en gaan nou gebeur? En wat gebeur met Ramamparra wat dit alles toegelaat het en elke dag steeds lieg vir ons?

Vryheid, Gelykheid & Geregtigheid

Elke Suid-Afrikaner wat eerbaar Suid-Afrika en goeie Suid-Afrikaners se belange op sy hart dra, moet onverwyld onafhanklik en gesamentlik aktiewe opbouende aktiviste vir demokrasie wees. Raak betrokke om die menigde ANC-stemvee wat in afhanklikheid aan die ANC en tradisionele leiers verslaaf is, te bevry van die ANC slawejuk vóór die volgende Algemende Verkiesing in 2024.