Só lyk matriekuitslae vir 2017

Angie Motshekga Foto: DOC

Angie Motshekga, minister van basiese onderwys, het Donderdagaand die uitslae van die 2017 Nasionale Senior Sertifikaat-eksamen bekendgemaak.

Die matriekslaagsyfer vir 2017 is 75,1%, ʼn verbetering van 2,6% op 2016. Dié slaagsyfer sluit progressie-leerlinge in wat outomaties deurgesit is. Wanneer die progressie-leerlinge uitgesluit word, is die slaagsyfer 76,5%, ʼn verbetering van 0,3% vergeleke met 2016.

Wanneer daar na die provinsies se slaagsyfers gekyk word met progressie-leerlinge ingesluit, het die Vrystaat koning gekraai met 86,1%. Gauteng is in die tweede plek met 85,1%, gevolg deur die Wes-Kaap met 82,7%.

In die vierde plek is Noordwes met 79,4%, gevolg deur die Noord-Kaap met 75,6%, Mpumalanga met 74,8%, KwaZulu-Natal met 72,8%, Limpopo met 65,6% en die Oos-Kaap met 65%.

Die hoogs presterende distrik in die land is die Fezile Dabi-distrik in die Vrystaat met ʼn slaagsyfer van 90,2%, gevolg deur Thabo Mofutsanyana in die Vrystaat met 90% en Tshwane-Suid in Gauteng met 89,8%.

In die vierde plek is Ekurhuleni-Noord in Gauteng, gevolg deur Tshwane-Noord, Gauteng-Wes, Johannesburg-Wes, Sedibeng-Oos, Johannesburg-Oos en Overberg in die Wes-Kaap.

Altesaam 535 484 voltydse kandidate het die Nasionale Senior Sertifikaat-eksamen by 6 844 lokale reg oor die land geskryf. Altesaam 117 223 deeltydse kandidate het die eksamen geskryf.

Altesaam 161 081 onderskeidings is behaal, insluitend kritiese vakke soos rekeningkunde, wiskunde, ekonomie en fisiese wetenskappe. Met altesaam 25 574 openbare skole in die land het Motshekga gesê daar is 62 154 onderskeidings in die 12 sleutelvakke behaal. Dit is ʼn daling van 4,6% van 2016.

Altesaam 5 040 onderskeidings is in rekeningkunde behaal, 6 726 onderskeidings in wiskunde en 7 861 onderskeidings in fisiese wetenskappe.

“Altesaam 314 943, of 78,5% van die kandidate, het hul matriek met ʼn graad- en diploma-toelating geslaag en kan in aanmerking kom vir naskoolse studies by hoëronderwysinstansies,” het Motshekga gesê.

“Die 86 364 kandidate, of 21,5%, wat sertifikaattoelating gekry het, kan by tegniese en beroepsgerigte opleidingskolleges (TVET) en ander vaardigheidsopleidingsinstansies inskryf.”

Matrieks sal egter tot Vrydagoggend moet wag om hul individuele uitslae te kry. Die uitslae sal van 06:00 op Maroela Media beskikbaar wees, asook in koerante en by skole vir al die provinsies behalwe die Wes-Kaap.

Die matriekuitslae is nou hier beskikbaar:

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
snoefie

hoeveel van die kinders gaan (sug) brein kanker universiteit toe neem?

Koos

So daar is druipelinge in die “progressie” leerlinge groep….deesdae is dit nie maklik om matriek te druip nie….so die lummels word sommer net deurgesit…cry my beloved country!!

Tokkie

Ek is jammer ek kan net doodeenvoudig niks glo wat hierdie regering of enige staatsinstasie publiseer nie – ek het sopas die top prestreerders se name gesien – ek weet van leerders wat briljante studente was hierdie jaar – hoekom is hulle name nie gepubliseer nie ?

Hanna

Nou wonder ek of hierdie “progressie” leerders ook gaan toustaan by die universiteite en aandring op gratis tersiere onderrig? EFF gaan mos almal help wat matriek deurgekom het ( met of sonder verdienste). Sal maar moet sien…

Wdp

Ons land se kinders word al hoe slimmer en die ekonomie gaan al hoe meer agteruit!