Só werk nuwe paspoort vir kinders

Argieffoto

Die regering het ’n nuwe kinderpaspoort bekend gestel wat voortaan vir oorsese reise deur alle Suid-Afrikaanse burgers onder die ouderdom van sestien jaar vereis sal word.

Die kinderpaspoorte vervang die uiters ongewilde stelsel dat die kind se onverkorte geboortesertifikaat as reisdokument dien, soos die afgelope paar jaar die geval was, en bevat onder meer die besonderhede van albei ouers of die kind se voog(de).

Om ʼn kinderpaspoort te kry, geld die volgende vereistes:

* Die tersaaklike aansoekvorm (DHA-73) moet korrek ingevul word.

* Die kind se Suid-Afrikaanse geboortesertifikaat moet getoon word en ’n afskrif daarvan moet die aansoek vergesel.

* Twee kleurfoto’s van die kind wat aan paspoortregulasies voldoen, moet aangeheg wees.

* Die voorgeskrewe paspoortgeld.

* As die ouers getroud is, moet die kind en albei ouers teenwoordig wees wanneer die aansoek by die naaste kantoor van die departement van binnelandse sake of die naaste Suid-Afrikaanse ambassade of konsulaat ingedien word. Albei ouers moet die paspoortaansoek onderteken. Dit is belangrik om te besef dat ’n toestemmingsbrief en afskrif van die afwesige ouer se identiteitsdokument nie meer aanvaar word nie – die enigste uitsonderings waar albei ouers nie saam met die kind teenwoordig hoef te wees nie, word hierna uiteengesit:

* As die ouers geskei is en volle ouerlike regte betreffend voogdyskap is nie aan slegs een ouer oorgedra nie, moet albei ouers en die kind teenwoordig wees wanneer die aansoek ingedien word, en albei ouers moet die aansoek onderteken.

* As een ouer oorlede is, moet die oorspronklike doodsertifikaat by die indien van die aansoek vertoon word en ’n kopie van die doodsertifikaat moet die aansoek vergesel.

* As die kind buite die huwelik gebore is, word die biologiese moeder se toestemming en teenwoordigheid vereis by die aansoek. Indien die ongetroude vader die regte van ’n ongetroude vader uitoefen soos gestipuleer in art. 21 van die Kinderwet, is die vader se toestemming ook nodig, en in so ’n geval moet albei ouers teenwoordig wees by die indien van die aansoek en die aansoek onderteken.

* As die kind in die sorg van ’n voog(de) is wat nie die kind se ouers is nie, moet die voog(de) en die kind teenwoordig wees by die aansoek, die voog(de) moet die aansoek onderteken, en bewys van die toekenning van die voogdyskap deur die hooggeregshof moet saam met die aansoek ingedien word.

* As enige ouer nie opgespoor kan word nie of as ’n ouer weier om teenwoordig te wees by die aansoek, die aansoek te ondersteun of die aansoek te onderteken, of as ’n dispuut oor enige van hierdie aspekte ontstaan, moet die kwessie deur ’n uitspraak van die Kinderhof besleg word. Die Kinderhof se uitspraak moet saam met die aansoek ingedien word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Anneke Barnard

Waar kan ek die hele artikel 21 van die Kinderwet te lese kry? Kan iemand dalk help?

As ek dit Google, kry ek alles behalwe.

johan

Wat is nuut hieraan, al in 1998 vir kinders paspoorte gekry ?

Rene

Nadat ek so gesukkel het om my kind se paspoort gedoen en gekry het nou verander hulle dit!!! Regtig nie eens 6 maande terug nie!! Nou kos dit net weer geld!!

marous

Kan hierdie mense niks anders doen as om die wiel oor en oor en oor uite vind nie ? Nee want hoe gaan hulle dan weer biljoene uit wurg ? Pateties!

Petrisha

Wanneer sal dit in werking tree? Nou moet ek weer die roete doen nadat ek die unabridged birth certificates en paspoorte als in orde het…. REGTIG besig om ons geld en tyd te mors!