SOE verslag ‘gebrekkig, ongegrond’ – Mkhize

Dr. Zweli Mkhize. (Foto: Elmond Jiyane/GCIS)

Zweli Mkhize glo die spesiale ondersoekeenheid (SOE) se ondersoek na die omstrede kontrak tussen Digital Vibes en sy voormalige departement, het onbillik geskied. Mkhize hou ook vol dat die SOE se verslag waarin hy nou geïmpliseer word, “gebrekkig en ongegrond” is.

Nietemin het hy besluit om as minister van gesondheid te bedank “om sekerheid en stabiliteit in hierdie belangrike portefeulje te bring,” lui sy bedankingsbrief aan pres. Cyril Ramaphosa.

Die nou voormalige minister het Donderdag bedank, enkele ure voordat Ramaphosa verskeie skuiwe in sy kabinet aangekondig het. Dr. Joe Phaala is in Mhize se plek aangestel.

Mkhize stel dit egter in sy bedankingsbrief duidelik dat hy nie die saak daar gaan laat nie en sê hy gaan ’n aansoek by die hooggeregshof indien om die SOE se verslag te laat hersien.

“Meneer die president, dit is ongelukkig duidelik dat die SOE met ’n voorafbepaalde uitkoms en geslote gemoed gewerk het in die ondersoek,” lui Mkhize se bedankingsbrief aan Ramaphosa.

Mkhize beskuldig die SOE onder meer daarvan dat die eenheid tydens sy ondersoek reeds tot gevolgtrekkings gekom nog voordat Mkhize se kant van die storie aangehoor is.

“Ek is van mening dat dit belangrik is dat ’n hof ’n onafhanklike gevolgtrekking maak rakende die wettigheid van die ondersoekproses en die gevolgtrekkings en bevindings wat gemaak is.

“Die optrede en gevolgtrekkings van die SOE kan nie geïgnoreer word of onveranderd gelaat word nie.”

In ’n beëdigde verklaring, wat Maroela Media onder oë gehad het, sê die SOE dat Mkhize en sy seun, Dedani, glo voordeel getrek het uit die omstrede R150 miljoen-kontrak wat die nasionale departement van gesondheid aan Digital Vibes vir kommunikasiewerk toegeken het.

Die VF Plus meen Mkize het ná volgehoue druk besluit om eerder te bedank voor die vernedering om deur die president afgedank te word.

Philip van Staden, die VF Plus se woordvoerder oor gesondheid, sê dié party sal egter nie toelaat dat Mkhize se bedanking hom vrystel van vervolging nie.

“Deur die korrupte daad waarby Mkhize betrek word, is geld wat vir die bekamping van die virus bedoel is, gesteel. Dit kon daartoe bygedra het dat gesondheidswerkers en staatshospitale verlede jaar met die uitbreek van die pandemie sonder voldoende mediese toerusting en beskermde kleredrag gelaat is.

Dit het op sy beurt lewensverlies onder gesondheidswerkers en pasiënte tot gevolg gehad. Hieroor moet rekenskap gedoen word.”