Soen die boer, sing Malema

Julius Malema, leier van die EFF, spreek die skare toe in Inanda, KwaZulu-Natal tydens Vryheidsdagvieringe op 27 April 2015 Foto: @econfreedomZA, Twitter

Julius Malema, leier van die EFF, spreek die skare toe in Inanda, KwaZulu-Natal tydens Vryheidsdagvieringe op 27 April 2015 Foto: @econfreedomZA, Twitter

Julius Malema, leier van die Ekonomiese Vryheidsvegters, het Maandag die skare by ʼn Vryheidsdagbyeenkoms in Inanda, KwaZulu-Natal, gelei om “soen die boer” te sing.

Hy het gesê wit grondeienaars se “dae is getel”, maar het hulle genooi om by die EFF aan te sluit in ʼn stryd vir gelyke grondeienaarskap. Malema het verlede jaar in die sop beland toe hy die omstrede “skiet die boer”-lied gesing het.

Die skare, geklee in rooi, het die pawiljoen volgepak nadat hulle ʼn gratis ete en EFF-T-hemp ontvang het.

Net voor Malema se toespraak, het EFF-voorsitter Dali Mpofu gesê “Die Stem moet val”, voordat hy die nasionale volkslied daarsonder gesing het.

Malema het die skare opgesweep met die woorde “down with Zuma”.

Alhoewel sommige van die sprekers uitgejou is omdat hulle nie Zulu gepraat het nie, het Malema gesê hy gaan in Engels praat sodat sy boodskap met die wêreld gedeel kan word. “Ons moes vandag ʼn trotse nasie gewees het, maar ek staan voor julle, skaam om ʼn Suid-Afrikaner te wees,” het Malema gesê. “Ons is nie trots op dit wat tot hier toe gebeur het nie. Ons het diegene wat vir vryheid geveg het, in die verleentheid gebring. Toe dit moeilik was, het hulle die land verlaat en na ander Afrikastate gegaan sodat hulle kon terugkom om vir ons te kom baklei. Hulle is verwelkom en het skuiling en hulp ontvang sodat hulle kon baklei vir my en vir jou. Ons is vry, maar ons kyk neer op diegene wat gehelp het om ons te bevry. Vandag vergeet julle die Afrikane wat in Mosambiek en Lesotho vir ons gesterf het. Ons moet skaam wees.

“Julle is onkundig, want vandag se regering stook onkunde. Hulle weet dat julle teen hulle sal opstaan, die dag wat julle die waarheid ken. Dit is in die belang van die kolonialis en imperialis dat ons ons geskiedenis ignoreer.”

Malema het gesê selfs al neem mens al die uitlanders weg, sal die mense steeds werkloos wees. “Dit is die ANC wat HOP-huise verkoop, so moenie ons broers en susters van Afrika beskuldig nie,” het hy gesê.

“Jy bly in ʼn plakkershut, jy moet jou regering blameer en die mense vir wie jy gestem het, blameer. Die ANC het net hul stemme in hierdie provinsie vermeerder. As julle kwaad is, dan moet julle vir die ANC kwaad wees, nie die uitlanders nie. Die mense van Mosambiek het nie vir Zuma gesê om ʼn ‘firepool’ te bou nie.”

Malema het gesê die mense moet die ANC beskuldig vir hul swaarkry. “Julle is in plakkershutte sonder water en elektrisiteit. Julle kinders ontvang nie behoorlike opleiding nie. Die ANC is aanspreeklik. As jy die misdadigers soek wat jou huise en werk steel, gaan soek by Luthuli House.”

Hy het gesê die mense van KwaZulu-Natal verdien beter. “Ek kon sien dat sommige van ons mense nog nie demokrasie ervaar het nie, toe ek die plakkerskampe besoek het. Ons vier politieke vryheid, maar ons wil brood op ons tafel hê. Ons wil dakke oor ons koppe hê en gratis opvoeding vir ons kinders. Deur opvoeding sal ons ekonomiese vryheid betree.

“So lank as wat jy nie die grond en die minerale daarin besit nie, is die vryheid wat jy het, nie volledig nie. Ons moet die struggle voortsit. Mandela het geweet dat politieke vryheid nie genoeg is nie. ons moet steeds veg vir ekonomiese vryheid en ons mense algehele vryheid bied.”

Malema het gesê hy het met wit mense in Kaapstad vergader wat wou weet of hulle ʼn tuiste in Suid-Afrika het. “Ek het vir hulle gesê daar sal altyd blyplek wees vir diegene wat bereid is om die land met almal te deel. Tans is dit dieselfde as wat dit was tydens apartheid. Die enigste verskil is ons swart president wat die voorregte van wit Suid-Afrikaners beskerm. Wit mense geniet die vryheid. Al waaroor hulle besorg is, is om nog geld vir hulself te maak. Die lewe van ʼn swart persoon is nog steeds goedkoop, en ons moet baklei vir die menswaardigheid van ʼn Afrikaan.

“Wit Suid-Afrikaners, julle is ons dit verskuldig om saam met ons bande te smee om te baklei vir ekonomiese vryheid vir almal. Ons wil ons hulpbronne en land terughê. Suid-Afrika is in die hande van wit mans en hulle moet weet hulle dae is getel.”

Malema het gesê hy sal steeds die ANC aanspreeklik hou in die parlement. “Ons moet seker maak die ANC werk hard vir hul geld in die parlement. Ons kan nie toelaat dat hulle slaap nie. Wanneer Zuma oor die volgende vyf jaar aan die parlement dink, moet hy bewe. Dis nie ʼn ANC-goedkeuring nie. Ons sal die uitvoerende komitee aanspreeklik hou. Baleka Mbete het my nie na die parlement toe genooi nie. Daardie Zuma-handpop gaan sterf aan ʼn hartaanval,” het hy gesê.

Daar was ʼn groot polisie-teenwoordigheid toe die nagenoeg 2 000 partyondersteuners op die John Dube-stadion toegesak het. Lede van die polisie se openbareorde-eenheid het met ʼn waterkanon gereed gestaan.

Bron: Jeff Wicks, News24

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

31 Kommentare

jongste oudste gewildste
Tom

Ons weet presies wat hy eintlik wil sing. Niemand hier is idiote nie. Die hele storie in die land het in n gekkespul ontaard. Dis so belaglik as wat dit hartseer is.

Zandre

Ja-nee, down with all the commies, but kiss the commies, sien dis hoe dit werk… Behalwe nie een van blankes het al ooit gesing “kill” enige een nie. Maak nie saak wat ons blankes doen nie, ons is rassiste.

Blaar

Ja, sure…blankes moet GEE wat julle voor gewerk het, dan sal ons ketaters maak of ons julle nog n ruk verdra, terwyl ons besig is om julle stelselmatig uit te moor. Maar bly tjoepstil daaroor want net-nou kom dit uit wat werklik aan die gang is.

Kowie

Malema jou dae is getel.

chris

Los die mannetjie uit .Hulle wil so graag die witman weer betrek by die geweld .Laat hierdie mense maar hulle eie huisskoonmaak ons het niks hier te verloor nie.