Sol-Tech se R300 miljoen-kampus in gebruik geneem

Die nuwe Sol-Tech kampus is Vrydag ingehuldig. (Foto: Mia Slabbert)

R10 op ʼn slag. En Vrydag is die nuwe Sol-Tech-kampus, wat eindelik R300 miljoen gekos het en verlede maand klaar gebou is, in gebruik geneem.

“Sol-Tech is ʼn lewende monument. Dit is gebou uit die gemeenskap deur die gemeenskap en is hoofsaaklik finansier deur die maandelikse R10-bydraes van al ons lede,” sê sê dr. Dirk Hermann, bestuurshoof van Solidariteit.

“Elkeen se bietjie het saam ʼn sterker toekoms vir ons kinders gebou.”

Hermann sê opleiding is per definisie toekomsgerig.

“Dit kyk vorentoe en berei die jeug voor om te bou aan hul toekoms en ook aan ʼn toekoms in ons land. Terwyl ander vlug na groener weivelde oorsee, in hulself keer en net na hul eie welsyn wil omsien of selfs heeltemal opgegee het, bou ons ʼn instelling om die jeug te bemagtig sodat hulle welvaart vir hulself en hul gemeenskap binne Suid-Afrika kan skep. Die monument is ʼn verklaring dat ons hier is om te bly en om te bou.”

Bouwerk aan die moderne kampus het in September 2019 begin toe die eerste sooi gespit is. Daar is minder geld bestee as waarvoor aanvanklik begroot is en die projek is vroeër afgehandel as beplan.

Die eerste studente het verlede maand reeds aangemeld, ten spyte van die uitdagings wat die Covid-19-pandemie en die inperkingstyd veroorsaak het.

“Hierdie kampus is ʼn merkwaardige prestasie vir die gemeenskap. Dit is ʼn tasbare resultaat van waartoe ʼn gemeenskap in staat is as hy sê: ‘Ons sal self’,” sê Hermann.

“Ons vier hierdie mylpaal vandag saam met elke lid en skenker wat tot hierdie mylpaal bygedra het en is saam met hulle trots daarop. Ons jong mense is veerkragtig. Al wat ons moet doen, is om te sorg vir wind onder hul vlerke.

“Hierdie kampus en Sol-Tech is die wind onder ons jong mense se vlerke – kom kyk gerus.”

Die Solidariteit Ambagsgilde het ook aangekondig dat 26 Maart voortaan bekend sal staan as Nasionale Ambagsdag.

Die gilde se “Jou yster”-toekenning sal ook jaarliks op dié dag gedoen word aan ʼn ambagsman wat ʼn besondere bydrae in die ambagsbedryf gemaak het.

Die eerste toekenning is vandag aan Leon van Wyk, ʼn lektor by Sol-Tech, gedoen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

44 Kommentare

jongste oudste gewildste
Marisa W

Fanflippentasties!!

Belinda

Welgedaan!

Probeer verstaan

My seuns sal julle oor ‘n paar jaar sien.Welgedaan.

Gert

Mooi man wel gedaan

Nico

Dit maak mens soooo Trots. Welgedaan.