Solidariteit Beweging kondig vandag sy ‘blyplan’ aan

Foto: Reint Dykema

Die Solidariteit Beweging gaan Donderdag tydens sy Toekomsberaad ʼn omvattende blyplan in Pretoria bekend maak.

Die groter Solidariteit Beweging, waaronder Solidariteit, AfriForum, Helpende Hand en die FAK, sal tydens die tweede Toekomsberaad sy toekomsplanne vir dit wat van 2020 tot 2030 aangepak gaan word, bekend maak.

Donderdag se Toekomsberaad volg op die eerste een wat in 2015 gehou is, waartydens planne vir 2020 beraam en bekend gemaak is. Die doelwitte wat in 2015 gestel is, is egter reeds voor die einde van hierdie vyfjaartermyn bereik en verdere toekomsplanne is nou van wesenlike belang.

Die multimiljardrand-plan wat Donderdag bekend gemaak sal word, sluit opleidingsinstellings, skole, veiligheidsnetwerke, werkplanne, kultuurplanne, ʼn maatskaplike strategie, media-instellings, internasionale steunwerwing en meer in.

Daar word beplan om bykans R8 miljard kapitaal vanaf 2020 tot 2030 daarvoor te mobiliseer. Daar word voorsien dat tienduisende mense elk ʼn bietjie sal gee. Solidariteit-lede gee reeds R10 per maand.

ʼn Nuwe eiendomsbeleggingsmaatskappy, Kanton, gaan ook gestig word waar beleggers teen ʼn opbrengs in die eiendomme kan belê. Daar word ook beplan om Virseker verder uit te bou en ander sake-inisiatiewe word in die vooruitsig gestel.

“Ons is bekommerd daaroor dat talle mense emigreer en/of vervreemd is van die land. Baie Afrikaners voel nie meer tuis nie. Talle voel dat, hoewel hulle nie die land verlaat het nie, die land hulle verlaat het,” het Flip Buys, voorsitter van die Solidariteit Beweging, gesê.

“Die doel van ons 2030-plan is om Afrikaners en die breë Afrikaanse gemeenskap weer tuis te laat voel in Suid-Afrika. Ons gaan bou om te bly. Staatsbestuur in Suid-Afrika het misluk en die tyd van selfbestuur het aangebreek.”

ʼn Konsentrasiestrategie maak ʼn groot deel van die 2030-plan uit. Die Solidariteit Beweging het 30 ankerdorpe geïdentifiseer waarheen Afrikaners natuurlik trek. Daar word voorsien dat 67% van Afrikaners in 2030 in dié ankerdorpe sal wees en 95% van Afrikaners sal binne twee uur se ry van die ankerdorpe woon.

“Afrikaners en Afrikaanssprekendes se probleem is nie hulle getalle nie, maar hulle yl verspreiding. In die 30 ankerdorpe gaan ons die gemeenskap help om gemeenskapsdienste soos skole, mediese klinieke, veiligheidstrukture, tersiêre en maatskaplike strukture, opleidings- en werknetwerke te vestig. Hoe meer gekonsentreerd Afrikaners woon, hoe meer kan die gemeenskap self verantwoordelikheid neem. Ons konsentrasiestrategie is nie vreemd nie. In die res van die wêreld is dit algemene praktyk,” het Buys gesê.

Die plan maak ook meer inligting oor Akademia, die Beweging se nuwe hoëronderwysinstelling, die bou van die nuwe Sol-Tech-kampus, asook planne om ʼn nuwe Afrikaanse skoolstelsel saam met vennote te ontwikkel bekend. ʼn Ander kernelement van die blyplan is veiligheid.

Volgens die Solidariteit Beweging is al sy planne binne die raamwerk van die Grondwet wat aan taal- en kultuurgemeenskappe die reg gee om verenigings of ander organe van die burgerlike gemeenskap te stig. In die verslag skryf die Solidariteit Beweging dat hy nie besig is om homself te isoleer nie, maar dat die Beweging juis optree in reaksie op isolering en uitsluiting deur die owerheid.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

62 Kommentare

jongste oudste gewildste
leon

Julle is so 20 jaar te laat. Ons en kinders is klaar gevestig waar ons nou woon en sal terugkeer nie eens oorweeg nie.

Kobus

Sonder ‘n politieke plan is die oefening futiel. Die pyn van uitwissing word net uitgestel.

Hoekom

Ek wil net weet hoekom , virseker gedryg het om te ontrek by afrikaans is groot as steve daar gaan op tree.
https://maroelamedia.co.za/debat/briewe/steve-hofmeyr-aig-en-virseker-die-krag-van-kultuur-en-kapitaal/

Jacques

Ek hoop dat die Solidariteit beweging besef dat die ANC die ankerdorpe sal teiken vir meer “diversiteit” om dit sodoende te laat faal. Hoe gaan dit vermy word?

Abigail

Ek sal graag wil weet waar op n kaart die ankerdorpe voorkom om n geheuebeeld en geheelbeeld te vorm. Met nuutste getalle per dorp soos dit werklik tans daar uitsien. N lys met 3 kolomme wat ek bekom het se getalle en projeksies lyk foutief, en/of verouderd.