Solidariteit NetWerk se vyfjaarwerkplan in ’n neutedop

solidariteit-netwerkvanwerk-lindie-strydom-paul-van-deventer-marthinus-visser

Lindie Strydom (regs) gesels met Marthinus Visser van Akademia en Paul van Deventer van Sol-Tech tydens die bekendstelling van Solidariteit se nuwe rigting. Foto: Solidariteit/Twitter.com

Solidariteit het Donderdag die organisasie se nuwe netwerk van werk met ’n vyfjaarbegroting van R4,5 miljard aangekondig.

Die Solidariteit NetWerk gaan ʼn omvattende alternatiewe skoolstelsel, ’n beroepskollege, universiteit, studiehulp, ’n jeugbeweging, ’n netwerk van beroepsgildes, mentorskappe, werkplasing, beskerming in die werkplek en voortgesette opleiding insluit.

Volgens dr. Dirk Hermann, bestuurshoof van Solidariteit, gaan die NetWerk die volle loopbaanpad saam met sy lede stap.

Hier is ‘n oorsig van die organisasie se planne wat sal strek van 2019 tot 2024:

  1. Solidariteit se missie, sedert 1902, is om goeie werk te verseker. In 2019 is die omstandighede anders, maar die opdrag is dieselfde.
  2. Die Vierde Industriële Rewolusie (4IR) word gekenmerk deur ontwrigtende kennis. Solidariteit moet sy lede toerus om in dié ontwrigtende wêreld ’n goeie werk te kan hê.
  3. Kennis en lewenslange leer is ’n voorvereiste om in die nuwe ekonomiese rewolusie te oorleef. Kennis is dus ’n kernelement in Solidariteit se NetWerk van Werk.
  4. Solidariteitlede in die algemeen, en die Afrikaanse- en Afrikanergemeenskap in die besonder, word ook gekonfronteer met die staat wat verswak, ’n onvriendelike staat met min begrip vir minderhede, en ’n versmorende rasse-ideologie. Die uitgangspunt van die Solidariteit NetWerk is meer gemeenskap en minder staat.
  5. Die doel van die Solidariteit NetWerk is om te verseker dat hierdie gemeenskappe die laagste werkloosheidskoers in die wêreld het. Solidariteit wil help dat almal wat wil werk, kan werk.
  6. Die beste belegging vir Solidariteit in Suid-Afrika is om sorg te dra dat sy lede werk. Dit is die grootste vermenigvuldiger wat tot voordeel van almal in Suid-Afrika is.
  7. Die Solidariteit Netwerk moet ook geborgenheid bied in omstandighede waarin mense vervreemd voel.
  8. Om dit te kan doen, moet Solidariteit self ook ontwrigtend dink. In die lig daarvan het Solidariteit besluit om ’n omvattende netwerk van werk te skep, wat die tradisionele vakbondwese totaal herontwerp vir die eise van die nuwe ekonomiese en politieke rewolusie.
  9. Die doel van die Solidariteit NetWerk is nie om self werk te skep nie, maar om mense wat wil werk, in staat te stel om te kan werk en werk te skep.
  10. Die Solidariteit Navorsingsinstituut se verslag oor emigrasie wys dat Afrikaners in die besonder weer meer kinders kry. Daar is dus ’n volgende geslag waarvoor beplan moet word.
  11. Die Solidariteit NetWerk bestaan uit:
  • Wêreldklas-skole

Die Skoleondersteuningsentrum ontwikkel ’n stelsel wat openbare skole ondersteun om uitnemend te bly, en wat Afrikaanse privaat skole van wêreldklas as antwoord sal bied op die kwynende aanbod van moedertaalonderrig.

  • Jeug

Solidariteit Jeug moet jongmense help om voor te berei vir die arbeidsmark, moet vir hul belange opstaan, en moet hulle by die groter NetWerk laat inskakel. ’n Instrument om jongmense met loopbaankeuses te help, is ontwikkel.

  • Studiehulp

Solidariteit Helpende Hand se Studiefondssentrum stel studente in staat om te kan studeer.

  • Universiteitstudie

Akademia moet ’n wêreldklas privaat universiteit as antwoord bied, met studiesentrums landwyd en ’n groot kampus met koshuise, sportvelde en ’n studentelewe.

  • Beroepsopleiding

Sol-Tech bied ’n wye reeks ambagte aan en gaan sy aanbod uitbrei op ’n splintenuwe kampus wat gebou word. Die Bo-Karoo-opleidingsentrum is ’n nuwe inisiatief wat verantwoordelikheid neem vir bou-opleiding.

  • Voortgesette leer

S-Leer bied voortgesette beroepsopleiding wat CPD-punte vir voortgesette leer vir professionele beroepe insluit.

  • Werkplasing

’n Werkplasingsplatform gaan op die Solidariteit NetWerk geplaas word, Ajani (ʼn privaat maatskappy) plaas Sol-Tech-studente by goedgekeurde werkgewers, en gildes gaan verantwoordelikheid neem om jongmense in beroepe te plaas.

  • Arbeidsverhoudinge

Solidariteit se groot taak is steeds om belange in die werkplek te beskerm, wat insluit erkenning op grond van belang en beskerming teen die staat se rasse-ideologie.

  • Arbeidsreg

Arbeidsreg bly ’n belangrike wapen om lede se regte te beskerm. Groot klem word gelê op die regte van minderheidsvakbonde en op litigasie teen onbillike rassediskriminasie.

  • Beroepsgildes

Solidariteitlede gaan nie net volgens werkplek nie, maar ook volgens beroepsgildes georganiseer word. Gildes help jongmense om tot die werkplek toe te tree, en gildes vorm netwerke, fasiliteer verdere opleiding en tree as waghond op.

  • Kapitaalmobilisering

Kanton is ’n eiendomsbeleggingsmaatskappy wat deur ’n vennootskap tussen kultuur en kapitaal leefruimtes vir Afrikaans skep. ’n Goeie voorbeeld gaan die bou van die Akademia-kampus wees. Instellings soos die Solidariteit Beleggingsmaatskappy en Solidariteit Finansiële Dienste speel ook ʼn groot rol.

  • Openbare belang

Solidariteit gaan steeds aktief intree vir die openbare belang met ʼn spesifieke fokus op belastingmisbruik, die staat se rasse-ideologie en onderwys en opleiding.

  • Werkverwante produkte

Solidariteit Finansiële Dienste ontwikkel werkverwante produkte soos mediese versekering, pensioen- en beleggingsbeplanning.

  • Normalisering van die arbeidsmark

Solidariteit het ʼn projek op Orania begin waardeur toegang vir jonges op intreeposvlakke gegee word met die oog om hulle toe te rus om vinning opwaarts te beweeg.

  1. ’n Omvattende stelsel word ontwikkel om die verskillende instellings van die NetWerk aan mekaar te koppel. Hierdie stelsel sal ook ’n lojaliteitskomponent hê. Wat Discovery (Vitality) met die mediese bedryf gedoen het, gaan die Solidariteit NetWerk met die wêreld van werk doen.
  2. Die Solidariteit NetWerk gaan die totale loopbaanpad saam met sy lede stap – vanaf skool, deur studies, tot in die werkplek en selfs met aftrede. Dit is die mees omvattende werkdiens van enige vakbond ter wêreld.
  3. Daar word voorsien dat die vyfjaarbegroting, dit is die gesamentlike bedryfs- en kapitale begroting, van al die aktiwiteite van die NetWerk R4,5 miljard gaan wees.
  4. Die NetWerk stuur ’n sterk boodskap uit dat ’n toekoms hier gebou gaan word. Die deelnemers sê: “Ons gaan nêrens heen nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Heinrich

Nou dit is hoe dit gedoen moet word!

Marius

Bly my geld word goed ge spandeer met die regre mense en vir my volk.

Santie

I rest my case Mr Lesufi.

Ben

10uit10
Dankie Herman. Harde werk sal ons saam doen en toekoms skep. Ek en nageslag gaan nêrens nie bky hier. Kom ons wys hoe word dit gedoen.
Ek is vandag trots.

Lana

Geweet dis net ‘n kwessie van tyd!!!
Dankie.