Solidariteit pak rasseboelies

dirk-hermann

Dirk Hermann

Solidariteit het besluit om ’n massaveldtog oor selektiewe rassisme en teen rasseboelies van stapel te stuur.

’n Massaklag teen die verskynsel, wat by die Suid-Afrikaanse Menseregtekommissie (MRK) aanhangig gemaak gaan word, maak deel uit van die veldtog. Die massaklag gaan ook die idee dat net wit mense rassisties is, die nek inslaan en die MRK gaan gevra word om hom daaroor uit te spreek.

As deel van die veldtog gaan Solidariteit Maandag ’n klag teen ’n senior offisier van die Suid-Afrikaanse Polisiediens (SAPD), generaal-majoor Sandra Malebe-Thema, by die MRK in Kaapstad indien. Dit volg ná ’n voorval wat op Maandag 7 November by die SAPD se Opleidingsakademie in Oudtshoorn plaasgevind het. Malebe-Thema het opleidingspersoneellede na die verhoog ontbied en vernederende opmerkings oor hul kleredrag en gewig gemaak. Sy het ook verskeie rassistiese opmerkings jeens die personeellede gemaak.

Solidariteit se kommentaar op die konsepwet oor haatspraak en haatmisdade vorm ook deel van die veldtog. In sy kommentaar op die wetsontwerp vra Solidariteit dat politici en staatsamptenare swaarder gestraf word as hulle skuldig bevind word aan haatspraak en die aanstigting van haatmisdade.

“If Whites don’t return the land peacefully I cannot guarantee what will happen to them” is ’n uitspraak wat Malema onlangs gemaak het. “Malema kan nie aanhitsing tot haatmisdaad pleeg en skotvry daarvan afkom nie. Sy rooi oorpak moet verruil word vir ’n oranje oorpak,” het dr. Dirk Hermann, bestuurshoof van Solidariteit, gesê. “Malema is ’n nar, maar ’n gevaarlike een wat kinders sal seermaak. Hy is ’n rasseboef wat nie deur die gemeenskap aanvaar behoort te word nie.”

Hermann het gesê Solidariteit is moeg vir die dubbele standaarde wat in Suid-Afrika geld wanneer dit by ras kom. Ter motivering van die konsepwet teen haatspraak en haatmisdade het die adjunkminister van justisie, John Jeffery, voor die Verenigde Nasies se komitee vir die uitwissing van rassediskriminasie gesê dat dit meestal wit mense is wat lelike en onaanvaarbare dinge oor swart mense sê. Sonder om enige bewyse aan te voer, het hy ook beweer dat die meeste haatmisdade deur wit mense teen swart mense gepleeg word. Solidariteit het ter stawing hiervan ook die video-opname van hierdie uitsprake deur Jeffery bekendgestel.

As gevolg van hierdie selektiewe rassisme word disproporsionele dekking gegee aan vorms van rassisme van wit mense teenoor swart mense.

Penny Sparrow, ’n gewone lid van die publiek wat nie in ’n gesagsposisie is nie, word oor en oor verguis oor onaanvaarbare opmerkings wat sy oor swart Suid-Afrikaners gemaak het. Levuyo Menziwa, ’n EFF-studenteleier se opmerkings dat hy “f**en whites met ’n bazooka of ’n AK47 wil doodskiet, is lank reeds vergete.

“Solidariteit het ’n soektog op sosiale media gedoen oor rassistiese opmerkings wat teenoor wit mense gemaak word. Die omvang en gewelddadige aard daarvan het ons geskok. Selektiewe rassisme veroorsaak dat wit mense byna gedemoniseer word en dit stook swart-op-wit-rassisme aan. Suid-Afrika sal rasse-uitsprake moet ontras en alle vorms van rassisme moet verwerp,” het Hermann benadruk.

Andile Mngxitama van die Black First Land First-beweging beweer dat swart mense nie rassisties kan wees nie. In ’n onlangse TV-gesprek het Andile dit onomwonde soos volg gestel: “If we don’t accept the principle that blacks can’t be racist and criminalise racism without accepting that fact, then you are going to end up locking up black people… and that is my biggest fear.”
“Sulke uitsprake moet verwerp word. As die idee, dat net wit mense rassiste is, vertroetel word, sal dit bloot groter rassisme en woede van beide kante ontlok,” voeg Hermann by.

“’n Gerekende ekonoom soos Chris Hart word deur Standard Bank geskors omdat hy gesê het dat slagoffers van apartheid 25 jaar later ’n gevoel van ‘entitlement’ en haat teenoor minderhede koester. President Jacob Zuma mag sê swart mense het meer regte omdat hulle die meerderheid is. Wit mense het minder regte, want hulle is die minderheid. Volgens Zuma is dit hoe ’n demokrasie werk. Geen openbare stemme het daarteen opgegaan nie. Hy mag ook sê dat alle probleme begin het toe Van Riebeeck hier aangekom het.

“Terwyl Suid-Afrikaners tereg hul afkeer teen die Doodskis-2 uitspreek, hou die EFF ’n plakkaat omhoog wat lui: ‘Kill Whites’. Daaroor is daar stilte.

“Net ’n week voor hierdie voorval sê Julius Malema wit mense moet geslag word, maar nog nie nou al nie. Volgens hom moet Afrikanermans hul plek ken. Koerante het daaroor berig, maar daar was geen openbare stemme wat daarteen opgegaan het nie. Dit is selektiewe rassisme.

“Ons is moeg vir selektiewe rassisme en gaan nie meer stilbly nie. Ons gaan nie toelaat dat wit mense gedemoniseer word en as ’n minderheid blootgestel word nie. Ons beplan ’n omvattende massaklag by die MRK wat deur duisende mense gesteun sal word. Die klag gaan toon dat die grootste aanstokers van selektiewe rassisme politici en staatsamptenare is. Dit is mense in gesagsposisies wat die massa beïnvloed. Dit wat ons op sosiale media sien, is die gevolg van die elite wat onverskillig met ras omgaan. Die politieke elite moet aan ’n strenger maatstaf gemeet word. Ernstige menseregteskendings begin altyd met politici se onverantwoordelike haatspraak,” het Hermann afgesluit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
CJ

Dankie Dirk.

Jean

Wens al wat n blanke in Suid Afrika is en so ook die kleurlinge wil hul agter die MANNE van Solidariteit,Afriforum, skaar, fisies en finansieel, die enigstes wat veg vir die minderhedes se bestaansreg in Suid Afrika!!!!! Die res te ruggraatloos stil polities korrek gebreinspoel wat lei tot alle minderhedes in Suid Afrika se ondergang!!! Staan op of word uitgevorseer mense! Dankie Solidariteit.

Leo

Dankie solidariteit, ons sal moet begin stem dik maak met fermheid!

Chrisjan

Dankie.

foxi

Dankie Solidarireit, julle probeer veg vir oorlewing!