Solidariteit ‘xenofobies, bitter’ oor Kubane – regering

Minister Lindiwe Sisulu (Foto: Verskaf/Departement van internasionale betrekkinge en samewerking/Katlholo Maifadi)

Die departement van menslike nedersettings, water en sanitasie sê Solidariteit se voortgesette hofstryd teen die regering oor die invoer van Kubaanse ingenieurs grens aan vreemdelinghaat en bitterheid teenoor die mense van Kuba.

Solidariteit het vandeesweek aangekondig dat hy nié sy beplande regsaksie teen dié departement in verband met die ingenieurs sal onttrek nie, maar eerder “verskerp”.

Die vakbond het Dinsdag tydens ’n mediakonferensie gesê hy het inligting bekom wat hom daartoe in staat stel om voort te gaan met sy hofaansoek om die besluit van die minister om 24 Kubaanse ingenieurs in te voer, ongeldig te laat verklaar.

Volgens Solidariteit dui dié inligting daarop dat die departement die publiek oor die kwessie probeer mislei het.

Die departement het egter Dinsdag in ’n verklaring gesê inligting wat Solidariteit onthul het, is wel deur die departement by die hof ingedien en dui dus daarop dat hy dit nie vir die publiek probeer wegsteek het nie.

Volgens die departement wil Solidariteit met sy hersieningsaansoek “goedkoop politieke punte aanteken”.

Solidariteit het bekendgemaak dat hy ondertekende dienskontrakte onder oë gehad het, wat bewys dat die Kubaanse ingenieurs wel deur die Suid-Afrikaanse regering in diens geneem is en dat hulle salarisse met byvoordele gaan ontvang. Dít nadat minister Lindiwe Sisulu herhaaldelik gesê het dié ingenieurs is nie werknemers van haar departement nie en sal nie salarisse verdien nie.

Volgens die kontrakte gaan die Kubane wel ingenieursdienste lewer en nie bloot as mentors optree – soos Sisulu al in die verlede gesê het – nie. Die ingenieurs gaan ook R300 000 per jaar meer as ʼn plaaslike ingenieur betaal word, indien byvoordele ingereken word.

Solidariteit het ook bekendgemaak dat belastingbetalers ongeveer R75 miljoen vir die Kubaanse projek gaan opdok, en nie R64 miljoen soos vroeër aangevoer is nie.

Die departement sê hy sal nie sy jarelange verhouding met Kuba verbreek nie.

“Die Kubane het ʼn deurslaggewende rol tydens Suid-Afrika se bevrydingstryd gespeel. Die historiese bande tussen die twee lande is al voor 1994 gevorm,” het die departement gesê.

“Die departement wag in spanning vir die hofstryd sodat die saak vir eens en vir altyd afgehandel kan word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Elize

“goedkoop politieke punte aanteken”. Nee liewe minister ons praat hier van duur en baie. R75miljoen het baie nulle en kom die belastingbetaler duur te staan.
Ek sweer die van ons wat nie uitgemoor word nie sal omkom van ‘n hartaanval!! Die magtelose woede raak net te veel.

marius

Jul rasse kaart is al lankal deur vis motte verorber ….

Vernon

Ek vertrou sy gaan omverskoning vra na hierdie Sigaar-rokers nie die mas gaan opkom nie…selfs nie eens die SAW kon n duik maak nie….Dis juis sy en haar ANC wat bitter is,want hulle weet die wit ingenieurs sal die spul kan regruk!

Bertie

Liewe Minister. Julle is besig ‘n haatveldtog teen die witmense – mense wat 80% van die belasting betaal wat jy so kwistig uitmors. Die witmense in hierdie land ondervind nou vreemdelinghaat van die ANC. Ons geld is goed genoeg, maar ons word soos riool behandel. Genoeg is genoeg!

Persheks Adri

Daai is presies die ANC taktiek om stemme te werf. Stel huidige nie BEE ingenieurs aan wat die werk verstaan. Hoekom mense en goedere in voer? Dis dom verby