Sommige partye dalk nie weer in parlement

roland-henwood

Roland Henwood, ‘n politieke ontleder verbonde aan die UP, is bekommerd oor die afname in die stempersentasie. Foto: Die Groot Ontbyt.

Daar sal ʼn verandering in die politieke landskap van Suid-Afrika wees na die amptelike uitslag van die verkiesing bekendgemaak is, maar dit sal nie die radikale of dramatiese verandering wees waarvoor party mense gehoop het en ander gevrees het nie.

Dit is die mening van Roland Henwood, ʼn politieke ontleder verbonde aan die Universiteit van Pretoria.

“Die indruk wat ʼn mens kry as ʼn mens die voorlopige resultate van die 2019-verkiesing bekyk, is dat daar ʼn soort konsolidasie van die middelpolitiek in Suid-Afrika plaasgevind het.

“Met die stemme wat tans nog instroom, lyk dit of die hoofstroompartye bly waar hulle is met die steun van die ANC wat effens afgeneem het, maar dit was te wagte.

“Die kleiner, harde radikale partye soos die BLF en die ATM kon nie juis hond haaraf maak nie en gaan nêrens heen nie. Selfs die EFF kon tot dusver ook nie daarin slaag om die groei in steun te kry wat die party aanvanklik verwag het nie,” sê Henwood.

Alhoewel dit nog veels te vroeg is om dit te bevestig, lyk dit vir Henwood of daar van die partye is wat nie ná die verkiesing na die parlement sal terugkeer nie. “Cope en die UDM self lyk of hulle in die moeilikheid is met die min steun wat hulle tot dusver in hierdie verkiesing ontvang het.”

Ernstige afname in stempersentasie

Die 10%‑afname in die stempersentasie is egter vir Henwood ʼn groot rede tot kommer.

“Dit is ʼn dramatiese afname. Dit lyk of net 64% van kiesers wel gaan stem het en dit voorspel niks goed vir die demokrasie of die toekoms van verkiesings in Suid-Afrika nie.

“ʼn Mens sal moet vasstel hoekom dit gebeur het. Is dit omdat kiesers besig is om vertroue in die demokratiese prosesse te verloor of stel hulle eenvoudig net nie meer belang nie. Die verskynsel kan ook te wyte wees aan hoofsaaklik ANC‑kiesers wat die party straf en besluit het om net nie te gaan stem nie omdat hulle nie tevrede is met dit wat die party doen nie. Hierdie is alles elemente wat ʼn mens sal moet ondersoek.”

Henwood sê met die uitslae wat steeds besig is om in te stroom lyk dit of die DA vir eers in die Wes-Kaap aan bewind sal bly. Die ANC behoort met ʼn baie klein meerderheid aan die stuur van sake in Gauteng te bly, terwyl die EFF nou die amptelike opposisieparty in Mpumalanga sal wees na die party die DA daar uitgestof het.

Hy sê dit lyk tans of nie een van die nuwe partye werklik ʼn indruk op die kiesers kon maak nie. “Dit is juis vir my die punt van konsolidering. Ons sien wel dat die ACDP en die VF Plus die kleiner partye is wat met hierdie verkiesing tot dusver beter gevaar het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Ellisras

Elke stem tel. Maar as jy soos die mense van Marken(ek noem nie name nie) wegbly. Dan is dit sleg vir die demokrasie. Dit is sleg vir die saak waarin jy glo. Dit is sleg vir Volksgenote wat op jou staatmaak om die verkeerde te keer.

Dries du Toit

Dit is wel bitter verblydend dat die twee enigste partye wat die Bybel hoog op hulle prioriteits lyste en in hulle beleid laat vergestalte gee die enigste partye is wat gegroei het. Vind my liewer saam met daardie partye in die helhool van SA as elders tussen die massas van die linkse liberale ontkennende gemors wat die wereld regeer

Boerboel

VF PLUS het baie beter gevaar.

Oom Koos

‘n Mens moet maar seker aanvaar dat daar ‘n groot aantal kiesers in Suid-Afrika is wat maar altyd vir die bewindhebbende party sal stem of hulle nou afgeskeep word of nie.

Stemmetjie

Kyk maar na die uitslag. Waar die ANC die vrotste diens lewer is waar die ANC weer die meeste stemme gekry het. Hulle wil so vrot en arm lewe .