Staatsrede: SA demokrasie bereik draaipunt

President Cyril Ramaphosa lewer die 2020 staatsrede. Foto: Jairus Mmutle/GCIS

Die Suid-Afrikaanse demokrasie het Donderdagaand ʼn belangrike draaipunt bereik toe die EFF die staatsrede vir langer as ʼn uur ontwrig het, en lede die gesamentlike sitting van die parlement op hul eie voorwaardes verlaat het.

Dit was ʼn aand waarop die middelpunt van die Suid-Afrikaanse politiek onteenseglik na links geskuif het, én na Afrosentrisme, in pres. Cyril Ramaphosa se staatsrede asook in die drama rakende die toespraak.

Wat die staatsrede self betref, het Ramaphosa dit afgeskop deur na oudpres. FW de Klerk te verwys slegs in terme van die adjunkpresidentskap wat hy ná 1994 beklee het – nie sy presidentskap voor 1994 nie.

Dit was ʼn verandering – vantevore is De Klerk se presidentskap deur sy opvolgers erken.

Die res van die staatsrede, wat onder andere deur die Springbok-rugbykaptein, Siya Kolisi, en Mej. Heelal, Zozibini Tunzi, bygewoon is, het gefokus op ʼn vorderingsverslag sedert verlede jaar se staatsrede, vervleg met ʼn oproep om nasionale eenheid, maar met ʼn Afrosentriese uitgangspunt.

Staatsrede 2020 (Foto: Maroela Media)

“Daar is tye dat ons nie die paal gehaal het nie en foute gemaak het, maar ons bly standvastig in ons oortuiging om ʼn vrye, gelyke en vreedsame gemeenskap te bou,” het Ramaphosa gesê.

Die president het erken dat die ekonomie al ʼn dekade lank nie na wense groei nie, dat werkloosheid toeneem, dat elektrisiteitsonderbrekings sakeondernemings en gewone mense ontwrig, dat staasbestuurde ondernemings sukkel en dat die fiskus onder druk is.

Hy het toegegee dat die regering nie alleen die land se ekonomiese probleme kan oplos nie, en dat die staat se beste pogings hiervoor nie goed genoeg was nie.

Ramaphosa het gesê Suid-Afrikaners het ʼn keuse om moed op te gee óf inklusiewe groei aan te gryp, en die regering kies laasgenoemde, met vanjaar as jaar om fundamentele ekonomiese groeibeginsels in te stel.

Hier is ʼn paar belangrike punte uit sy toespraak:

President Cyril Ramaphosa lewer die 2020 staatsrede. Foto: Jairus Mmutle/GCIS

Eskom

Oor Eskom het die staatshoof toegegee beurtkrag het die herstel van die ekonomie en die skep van werk teruggehou, en dat dit gebeur het weens ʼn jare lange versuim by Eskom om instandhouding te doen.

Onmiddellike stappe vir energievoorsiening sluit in die instel van die geïntegreerde hulpbronneplan (IRP) vir die opwek van krag uit hernieubare energie, natuurlike gas, hidrokrag, batterye en steenkool.

Noodplanne vir elektrisiteitsvoorsiening gaan binne drie tot 12 maande goedgekeur word, terwyl geen lisensie vir die opwekking van krag van minder as 1 megawatt vereis word nie.

Verdere planne vir hernieubare energie sal goedgekeur word, spesifiek wat sonkrag en windkrag betref.

In ʼn belangrike toegewing aan die DA sal goedbestuurde munisipaliteite toegelaat word om self elektrisiteit aan te koop van onafhanklike elektrisiteitsprodusente.

Wat Eskom se skuld betref, het die regering besluit om dit te takel op wyses wat nie pensioene of die banksektor sal bedreig nie.

Die ekonomie

Ook wat die makro-ekonomie betref, het Ramaphosa gesê die land is in die pekel, en dat die minister van finansies, Tito Mboweni, stappe om dit reg te stel sal aankondig in sy begrotingstoespraak, wat op 26 Februarie gelewer sal word.

Die regering sal staatsbeheerde ondernemings verminder en rasionaliseer sodat dit ekonomies lewensvatbaar bedryf kan word.

Vervoer

Wat die SAL betref, het die regering besluit enige nasionale lugdiens moet selfstandig ekonomies lewensvatbaar wees. Hy het belowe dat die sentrale treinspoor tussen Kaapstad en Khayelitsha, en die spoor tussen Pretoria en Mabopane opgeknap sal word teen ʼn koste van R2,8 miljard.Die Durbanse hawe gaan ook op groot skaal verbeter word, veral wat die goedereterminaal betref.

Onderwys

Nege nuwe verdere onderwys- en opleidingskolleges (voormalig tegniese kolleges genoem) word in Sterkspruit, Aliwal-Noord, Graaff-Reinet en Ngungqushe in die Oos-Kaap, en in Umzimkhulu, Greytown, uMsinga, Nongoma en KwaGqikazi in KwaZulu-Natal gebou.

ʼn Nuwe universiteit wat sal fokus op wetenskap en innovering word vir die Ekurhuleni-metro aan die Oos-Rand beplan. Weens die patetiese stand van studentebehuising en koshuise by universiteite gaan R64 miljoen bestee word aan die opgradering daarvan.

Misdaad

Gegewe die uitwerking van misdaad op toerisme gaan bykomende polisie by bekende toeriste-aantreklikhede ontplooi word. Bendebekampingseenhede van die polisie gaan in die Wes-Kaap, Oos-Kaap, Vrystaat en Gauteng versterk word. Duisende nuwe polisielede word tans opgelei. Sterker wetgewing teen huishoudelike en geslagsgeweld is ook op pad.

Landbou

Op landbougebied sal die pluimvee- en suikerbedrywe binnekort weet wat hul invoertariewe en werkgeleentheidsvooruitsigte sal wees.

Die president het steeds geen finale bewoording vir die ANC-voorstel oor onteiening sonder vergoeding ter verandering van die Grondwet aangekondig nie, maar het gelyk of hy daarvan wegbeweeg en eerder op die inhoud van die tans minder omstrede Onteieningswetsontwerp fokus.

Die regering sal vanjaar 700 000 ha staatsgrond beskikbaar stel vir landbou. Tot dusver het die regering 44 000 ha staatsgrond beskikbaar gestel vir die oplossing van geskille oor grond. “Vanjaar sal ons 700 000 ha staatsgrond beskikbaar stel vir landbou,” sê Ramaphosa.

Die regering sal veral jong mense, vroue en mense met gestremdhede prioritiseer wanneer die grond uitgedeel word. “Ons sal dit egter verpligtend maak dat begunstigdes van grond eers opleiding ontvang, voor grond aan hulle oorhandig kan word.”

Ramaphosa het erken dat boere baie swaar kry weens die droogte in groot dele van die land. “Boere het hul oeste en kuddes verloor en baie werkers is hul lewensmiddele kwyt.”

Ramaphosa sê die regering werk saam met navorsingsentiteite om strategieë te ontwikkel om die uitwerking van die droogte te verlig. Dit sluit in die ontwikkeling van sade wat droogte kan weerstaan en die verwydering van indringerplante.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

23 Kommentare

henndrik ·

Niks positief nie net meer dieselfde wat ons weet nie werk nie want dit is bewys

Deon ·

Alles wat ons weet en klomp beloftes en tjol soos in die verlede. Dis amper meer interresant t om te luister en sien hoe hulle die EFF hanteer het. Ek voel als is net weer lee woorde.

DieKriek ·

“Die regering sal 700 000 ha grond beskikbaar stel vir landbou”. Nou hoekom, vra ek met trane in my oë, is dit nodig om mense se grond af te vat sonder vergoeding?

netekalleen ·

mooi gese, ek vra dieselfde en die antwoord is omdat hulle kan en niemand het die mag om hulle te stop nie want als is in chaos gelee in ons land

Pofadder ·

Die EFF erodeer die ANC van links, en kry na net twee verkiesings reeds 11% van die stemme. Aan die regterkant is die DA ‘n fiasko, en die VF geen bedreiging nie. Die VF gaan nie ooit meer as sowat 2 of 3% van die stem te kry nie. Die VF het in die laaste verkiesing dieselfde stemme as in 1994 gekry – net oor 2% – en is daarom grotendeels polities irrelevant vir die ANC. Die regterkant is geen probleem vir die ANC nie, en al sy uitdagings le links – daarom die onherroeplike skuif links om verdere verlies na veral die EFF te probeer verhoed. Dit is ‘n tragedie vir hierdie land.

Kokkie ·

Pofadder, jy skiet die VFPlus af. Gee asseblief vir ons jou oplossing. ‘ If you can’t beat them, join them’ ???????

Leon ·

Om die staatsrede in een sin saam te vat:
Ons (die ANC) moet die Outokrasie verder uitbrei.

Werner ·

Ou de Klerk hoop jy sien nou hoe met n veraaier gewerk word jou rolletjie by hulle is nou uitgespeel

minnie muis ·

bla -bla -bla na 25 jaar en nog steets arrogant , hul glo hul self…. maar dan in vorige tyd ws die meeste huursoldate en geen opleiding nie en na 94 is hulle geweer gevat in het hul n pen gekry om vas te hou…. maar hul ken nie van debiteure en krediteure nie, en dat jy nie mag geld vat wat nie joune is nie !!!!!!!!!! wie kan tog dit vir hulle vertel , maar stadig anders verstaan hul nie en in al 11 tale

Mieke ·

Vir die afgelope 25 het die ANC alles tot niet laat gaan. Hoe op dees aarde gaan hulle nou dinge herstel? Hulle resultate speeek vanself.

Wielspore ·

Point of order, CR se toespraak bevat wel positiewe elemente soos staats instellings wat nie effektief funksioneer wat eerder aan die privaar sektor oorgegee moet word, energie opwekking van minder as 1MW wat nie lisensies nodig het, staatsgrond gaan beskikbaar getsel word vir landbou.
Die regering kan nie alles regmaak, wat was jou bydrae tot ons land vandag.

Luister ·

My bydrae? Ek het met hande afgekap, gestaan en kyk hoe die regering die land afbreek met my en ander se belasting geld.

minnie muis ·

ek betaal belasting vir 30 jaar … en nou laat verdwyn hulle die geld en voel goed daaroor

Johan Venter ·

Ek het hom voor die TV uitgevreet en vertel waar hy oral die pot misgesit het, dat hy die land versaak het en veral met sy slimstad wou ek weet of die slaagsyfer 30% sal wees. Ook wou ek weet of hy die slimstad vir Moody’s gaan wegsteek, want netnou gradeer hulle die stad af. Ek hoop hy het my gehoor.

Woeter ·

Wow wag n bietjie so dit is basies klaar n uitgemaakte saak dat Grondonteiening sonder vergoeding gaan plaasvind nog voordat die grond wet gewysig word!!!

Ons loop wragtig dieselfde pat as Zimbabwe. Kyk maar eers gaan Moody’s Suid-Afrika “downgrade” in Maart dit sal meer as $ 10 miljard (R147 miljard) uitvloei veroorsaak.

Banke weet reeds dat wanneer Grondonteiening sonder vergoeding kom gaan dit ‘n R1,6 biljoen gat in hul boeke slaan. Die SA ekonomie kan dit nie bekostig nie.

Dan vra mens mos mensself wat gaan die ANC doe. Wel hulle gaan die Reserwe Bank nasionaliseer wat die vermoe het om geld te print. Dit is die begin van HYPERINFLASIE.

Mense beter begin spore maak land uit se righting. Panama het hulle “Friendly Nations Visa” program, Portugal het hulle “Non Habitual Resident” program. Maar moet nie vir n dinges dink Australie of Amerika gaan Suid-Afrikaners of selfs Afrikaners Vlugtelings status gee nie.

Erika ·

Ek en Liefie het ons regtig slap gelag -Dit was n volslae klug….Mense het hulle tipies soos “hooligans” gedra
Geen Positiewe verskil nie

Charl Albertus ·

Die Afrikaner moet begin onttrek uit die nasionale ekonomie en geslote ekonomieë vorm. Ek is seker dat selfs die Afrikaners wat op die linker banke sit moet nou al stadig tot ‘n besef kom dat die skrif teen die muur is. Is daar enige blanke Suidafrikaner wat nog dink dat daar redding moontlik is?

Daar is geen omkeer strategie nie en nog minder die wil om een te vind. Die ANC, BLF, EFF, soos in Zim, sal eerder hul nageslag opoffer as om toe te laat dat ‘n westerling raad tot redding verskaf.

Mag die linkse ‘n les neem uit die klap in FW se gesig. Hy is nou onwelkom beide kante van die pad en word op niemandsland gewerp.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.