Soweto skuld Eskom R17 miljard

Argieffoto (Foto: baptisteh, Pixabay)

Die wanbetalingskultuur van elektrisiteitsverbruikers in Soweto is seker die grootste oorsaak dat Eskom feitlik op sy knieë gedwing is, het die VF Plus Donderdag gesê.

Luidens ʼn verslag van die Gautengse departement van samewerkende regering en tradisionele sake (CoGTA) wat aan die Gauteng-wetgewer se CoGTA-komitee voorgelê is, skuld Soweto Eskom meer as R17 miljard wat die helfte van die land se skuld aan Eskom beloop.

“Soweto se wanbetaling duur reeds jare lank en politici probeer sonder veel sukses om kragverbruikers te oorreed om gedeeltes van hul skuld te betaal,” het Amanda de Lange, lid van die VF Plus in die Gautengse wetgewer, in ʼn verklaring gesê. “Dreigemente om die kragtoevoer af te sny dien ook geen doel nie. Inwoners hou vol die ANC het in hul verkiesingsbeloftes aan kiesers gratis elektrisiteit en water belowe. Die kultuur van nie-betaling het nou ʼn nalatenskap van die ANC-struggle geword.”

Intussen worstel die nasionale kragvoorsiener om finansieel te oorleef en het in 2018 ʼn laagtepunt beleef. Die situasie word vererger deur ander nie-betalers, fiskale ongerymdhede, bedrog en wanbestuur.

“Dit wil voorkom asof Eskom ook geen werkbare plan het om die R34 miljard in te vorder wat onderpresterende munisipaliteite aan hom skuld nie. Daarbenewens is Eskom se operasionele kapasiteit ook nie na wense nie en ongeoorloofde tariefverhogings oor jare, het geen verligting gebring nie,” het De Lange bygevoeg.

Verdere druk word op die betalende middelklasburger geplaas om die skuldlas en verantwoordelikhede van nie-betalers en onderpresterende munisipaliteite te dra in ʼn omgewing waar munisipaliteite se skuldlas die afgelope agtien maande met sowat 80% gestyg het.

“Alhoewel die ANC-regering ‘n reddingsboei aan die skuldgeteisterde Eskom probeer uitgooi, is die fiskale en operasionele skade reeds baie groot en is daar min hoop dat ‘n volhoubare finansiële ommekeer bewerkstellig kan word. ʼn Aksieplan om Soweto se agterstallige skuld op ʼn dringende basis in te vorder, is donker.

“Die kwessie is ‘n kopseer vir die departement van samewerkende regering, maar daar moet streng maatreëls ingestel word om te midde van toenemende verarming van verbruikers alternatiewe kragvoorsiening aan huishoudings te lewer.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Eben

En wie moet ons bedank vir die situasie?

Theoman

Dis waar ek kan onthou hoe self mandela voor die verkiesing in 1994 mense van gratis water en krag belowe het, bo en behalwe al die ander bog beloftes waarvan nooit iets van gekom het nie.

James

Ag moet nie worry nie, maak net die krag duurder vir die wat betaal en belowe nog gratis krag aan die previously disadvantaged vir nog 25 of 250 jaar..

Anoniem

Dan moet ons almal ophou krag en water betaal….dis mos ook n belofte aan ons..of sny die krag en water af soos by ander plekke…

Arno Scheepers

Begin AL die probleme in Suid-Afrika nie maar in soweto nie??