Spar-baas kap terug ná KVBA-uitspraak

(Argieffoto: Spar)

Die Giannacoupolous-groep, eienaar van verskeie Spar-winkels, voer aan die arbitrasie van bykans R12 miljoen wat hy aan werkers moet betaal, is deel van ʼn “georkestreerde vlaag aanvalle” op hom wat deur die Spar-gilde van Suidelike Afrika en die Spar-groep gedryf word.

Die Kommissie vir Versoening, Bemiddeling en Arbitrasie (KVBA) het die groep beveel om R11 935 478 vir onder meer onwettige aftrekkings en oortyd te betaal. Die departement van arbeid het die beslissing verwelkom.

“Die departement het ʼn huursoldaat geword en dit is duidelik dat die tydsberekening van die optrede teen ons meer as net toeval is,” het Harry Giannacoupolous, een van die groep se aandeelhouers, gesê.

“Die departement is nie meer ʼn onafhanklike instelling wat ondersoekers en inspekteurs inspan om sakeondernemings te oudit en klagtes te ondersoek nie. Inteendeel, die amptenare verontagsaam die einste wette wat hulle van ons verwag om na te kom.”

Die groep sê hy verskaf werk aan bykans 3 000 mense en dat die stappe teen hom ʼn bespotting van Suid-Afrika se arbeidswetgewing maak. Hy sê voorts al sy winkels voldoen aan arbeidswetgewing en dat die departement deeglik bewus is daarvan.

Volgens Giannacoupolous teister inspekteurs sy werkers, al vra hulle om uitgelos te word en al sê hulle, volgens Giannacoupolous, dat hulle geen klagtes het om aan te meld nie en gelukkig by hul werkplek is.

“Dit het ʼn punt bereik waar my personeel gedreig het om die reg in eie hande te neem en self met die inspekteurs af te reken,” het hy gesê.

Die groep sê daar is sedert verlede jaar verskeie ernstige maar ongegronde bewerings en valse beskuldigings teen ʼn hele aantal Spar-winkels en ander kleinhandelaars gemaak. Al dié winkels behoort aan die Giannacoupolous-groep. Hy sê in Junie verlede jaar is 31 van sy Spar- en Tops-winkels geteiken en voldoeningsbevele is uitgereik vir verskeie van die sogenaamde oortredings.

Die groep sê hy het probleme wat uitgewys is, gepak en dokumente daaroor aan die departement verskaf. Geld wat werkers toekom, is ook sonder versuim aan hulle betaal.

Die Giannacoupolous-groep sê hy het in die media verneem dat arbitrasie teen hom toegeken is.

“KVBA-kommissaris Thanduxolo Mafanya het duidelik nie die wet gevolg nie omdat dit lyk asof die arbitrasie agter geslote deure en sonder die teenwoordigheid van die Giannacoupolous-groep gedoen is.

“Daar is 970 Spar-winkels in Suid-Afrika, maar nie een ander winkel as dié wat aan die Giannacoupolous-groep behoort, word deurlopend vir arbeidsoortredings geoudit nie. Dit is duidelik dat die groep onbillik geviktimiseer en geteiken word,” het Giannacoupolous gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
Lorayne

Sterkte aan die Giannacoupolous Groep. AS julle wel reggemaak het, soos julle beweer, dan sien ek nie hoekom julle verder geteiken moet word nie. Dalk is daar mense wat voel hulle kwalifiseer vir “monthly free groceries”. . .

henndrik

Een van die winkels wat aan Giannacoupolous groep behoort is naby my huis maar ek verkies om nie daar te koop nie want in vergelyking met ander SPAR winkels is hierdie winkel baie vuil en oor die algemeen slordig. Vars produkte wat ek al daar gekoop het was ook van swak gehalte, ek sal byvoorbeeld glad nie vleis daar koop nie. Ek reken die saak het wel twee kante maar ek sal moet eerlik wees dat ek my gewig agter die vervolging en uitslag sit.

Louwrens

Ek ken vir Harry en het die tyd wat ek in KZN gebly het al my kruideniers daar gekoop. Indien iets met die vleis of groente fout was kon ek dit gaan omruil sonder enige teenkanting. Hulle vleis was ook van goeie gehalte en ek herroep maar een geval waar ek hoender teruggevat het.
Die betrokke winkels was altyd netjies skoon en georden. Die werknemers, van wie ek persoonlik ook ken het nog nooit gekla oor werksure nie.
Die groep en veral Harry het baie al gedoen vir welsyn en selfs die skole in die omgewing.
Ek dink iemand teiken die mense onnodig.

De Villiers

Nee wat, ek weet hoe hierdie Spar eienaars hulle mense hanteer. Ek sien dit gebeur by my plaaslike Spar.

Ek is bly hulle word bietjie in die bek geruk sodat hulle besef almal, selfs hulle werknemers, is mense met gevoelens, drome en families.

Grens

Een van hulle Spar winkels het ek by gereeld gekoop. Voor hulle daar was dit ‘n fantastiese winkel gewees. Hulle het dit verander in ‘n regte ou stinkende spaza winkel. Ek hoop iemand anders koop dit oor en maak dit weer ‘n lekker Spar. Hulle kry nou wat hulle verdien!!