‘Speel oop kaarte oor Eskom-situasie’

Argieffoto: GCIS

Die DA en die VF Plus het die regering versoek om deursigtig te wees oor die situasie by Eskom.

Mmusi Maimane, leier van die DA, het pres. Cyril Ramaphosa daarvan beskuldig dat hy nie deursigtig is oor die volle omvang van Eskom se kragopwekking- en finansiële krisis nie.

“In ’n tyd waar ons land ’n ongekende elektrisiteitskrisis in die gesig staar – met aanhoudende kragonderbrekings wat die nuwe normaal geword het – weier president Ramaphosa om oop kaarte met die mense van Suid-Afrika te speel,” het Maimane gesê.

Volgens Maimane is Ramaphosa sedert 2014 in beheer van Eskom se lot en is hy nie net vir Suid-Afrika ’n verduideliking verskuldig nie, maar die volle waarheid oor die omvang van die krisis, insluitende sy regering se volle plan om hierdie krisis aan te pak. Hy het gesê die tyd vir verskonings is nou verby.

Maimane het Ramaphosa skriftelik versoek om die volle omvang van die krisis bekend te maak, insluitend Eskom se totale skuld en die afbetalingsooreenkomste daarvan.

Die VF Plus het intussen ʼn dringende beroep op die bestuur van Eskom gedoen om eerlik te wees met die mense van Suid-Afrika oor waar die land werklik staan rakende kragvoorsiening en oor die moontlikheid van ʼn totale ineenstorting  van die kragnetwerk.

Pres. Cyril Ramaphosa. Foto: PresidencyZA/Twitter

Volgens adv. Anton Alberts, VF Plus-voorsitter, sal die party so gou moontlik ʼn gesprek voer met Pravin Gordhan, minister van openbare ondernemings, om hom te versoek om oop kaarte met die publiek oor die Eskom-situasie te speel.

“Indien daar ʼn waarskynlikheid is dat die netwerk wel op ʼn beheersde of onbeheersde wyse in duie kan stort, moet Eskom dit erken. Die publiek het die reg om te weet wat is die persentasie van waarskynlikheid dat so iets kan gebeur om hulle daarop voor te berei.”

Net soos die publiek, moet alle vlakke van regering, provinsiaal en plaaslik, ingelig word sodat hulle betyds gebeurlikheidsplanne kan opstel indien geen krag beskikbaar sou wees nie, meen Alberts.

“So ʼn gebeurlikheid sal onvermydelik ʼn revolusionêre omgewing skep. Die polisie en weermag sal moet voorberei daarop, maar ook die publiek en burgerlike organisasies sal moet voorberei om mekaar by te staan en seker te maak daar word orde gehandhaaf.”

Alberts het gesê dit is in hierdie stadium nie duidelik wat die stand van sake by Eskom is nie. “Daar is kundiges wat meen dat Eskom reeds in fase 5 is en nie meer fase 4 nie. Niemand is egter seker nie en mense moet gis oor die ware stand van sake.

“Indien die land wel op ʼn totale kragvoorsieningsinploffing afstuur en daar breek chaos in die land uit omdat mense nie betyds gewaarsku is nie, sal die regering en Eskom daarvoor aanspreeklik wees.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Penellope Jones

Dis te se as Eskom en die regering die kaarte kan vind en herken . . . . .

Danie

Wel die Ramaphosa en sy kabinet is al paar jaar wete van die sitsuasie wat SA vandag in sit…. En wat erg is dit gaan net donkerder word…. Wet en orde geld net vir sekere mense ander kom skot vry van dit af

Du Plessis

Nie Ramaphosa of die ANC het n plan om hierdie krisi te beredder nie!!

Boeboel

Lyk my ons gaan die winter baie koud kry!

Justice

Die ANC en Eskom voel `n veer vir die publiek en sal aanhou bly patetiese verskonings uitdink om hul kiesers te probeer paai.