Sportman dalk been kwyt ná spuitvliegtuig hom glo tref

Tiaan Daffie (21) in die hospitaal na die voorval. Hy is intussen ontslaan. (Foto: Verskaf)

Daar is vrese dat ʼn kranige jong sportman sy been kan verloor nadat ʼn spuitvliegtuig se vlerk hom glo op ʼn plaas in die Fochville-omgewing in Gauteng getref het.

Tiaan Daffie (21) was Saterdag op sy vriendin se ouers se plaas toe hy ʼn video van die spuitvliegtuig in die landerye gemaak het. In die video kan gesien word hoe die vliegtuig aankom, laag vlieg en bespuiting doen. Die vliegtuig pyl dan byna reg op Daffie af en die video eindig skielik – vermoedelik op die oomblik dat die vlerk van die Air Tractor 502 die jong man tref.

Die vlieënier was op die plaas om bespuiting vir die boer – op wie se plaas Daffie woon – te doen.

Michael Ellis, ʼn Potchefstroomse prokureur, sê sy kliënt is Dinsdag uit die hospitaal ontslaan. Hy moes egter intussen weer na ʼn hospitaal geneem word nadat sy infeksietelling kommerwekkend hoog gestyg het. Volgens Ellis is Daffie intussen weer ontslaan, maar medici hou hom fyn dop.

“Hy is terug op die plaas en sterk daar aan.”

Daffie sal na verwagting nog verskeie operasies aan sy been moet ondergaan en daar is kommer dat hy die been kan verloor. “Dit is nou die probleemtyd. Die dokter wat hom geopereer het, het gesê hulle het herstel wat hulle kon, maar daar is skade aan sy been en hy sal weer operasies moet ondergaan.

“In hierdie stadium is die dokters egter bekommerd oor die infeksie. Die bloedtoevoer na die been kan ook ʼn probleem wees.”

Daffie is ʼn ywerige sportman en veral ʼn goeie rugbyspeler en Ellis sê die voorval het sy toekoms onherroeplik verander.

“Ons oorweeg moontlike stappe, maar is nou eers besig om ons van die feite te vergewis. Hy is ʼn goeie sportman en sou nou ook begin werk het. Sy hele toekoms het verander en afhangend van wat met sy been gebeur – en dit dalk nie ten volle herstel nie – sal hy nie alles kan doen wat hy vantevore kon nie,” sê Ellis.

“Hy het boonop geweldige trauma ondervind; dit is iets wat hy nooit sal kan vergeet nie.”

Ellis sê Daffie se vriendin is boonop net so erg getraumatiseer. Sy was naby Daffie toe die vliegtuig hom getref het, maar is nie beseer nie.

Marie Bray, woordvoerder van die Burgerlugvaartowerheid (BLO), sê ʼn ondersoek na die voorval is reeds van stapel gestuur en amptenare is besig om inligting in te samel. Die vliegtuig het vroeër op die plaas Elandsfontein, waar die voorval gebeur het, opgestyg en sou weer daar land.

“Die bevindings en oorsaak van die ongeluk sal in die finale verslag bekend gemaak word. Dié verslag sal binne 12 maande ná die voorval bekend gestel word en indien dit nie moontlik is nie, sal ʼn tussentydse verslag bekend gemaak word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Swerwer

Sterkte met die herstel.
Is daar nie ‘n wetgewing wat die afstand uiteensit , wat jy van laagvlieënde vliegtuie se gebied moet wees nie? Dalk het dit ook al verval .

Anel

Nou hoe kan dit die vlieënier se skuld wees? Ek voel jammer vir die jongman, maar hy kon mis sien die vliegtuig kom nader. Die vlieënier kon hom mos nie sien nie en verwag mos nie iemand in ‘n land wat bespuit word nie? Dat mense vandag nie meer hulle gesonde verstand wil gebruik nie en dan as daar iets gebeur die skuld op iemand anders pak. Ai tog!!!

Diline

Genade, dan moes die vlieenier baie laag gevlieg het! Hoop hy word gou gesond en dat sy been volkome sal herstel

Oe la la

Ek weet nie van die res daar buite nie, maar as n vliegtuig om my afgepyl kom gaan ek verseker nie staan en dit af neem nie.. ek gaan hol!

Pieter

Ja. Die vlieenier het baie laag gevlieg. Hy moet want hy is besig om die lande te spuit. Vyf meter hoog en jy kan net sowel nie spuit nie. Hoe laer hoe beter. En enige persoon wat dink dit is ‘n goeie idee om naby die lande te staan terwyl daar GIF gespuit word is dom. Die reels spesifiseer niemand mag daar wees nie, en die vlieenier het dus nie iemand daar verwag nie.. As jy op die hoofweg gaan speel, moenie kla as ‘n trok jou tref nie. Ek dink nie hierdie jong man het ‘n saak nie.