Staat doen weg met gedwonge kwarantyn

‘n Argieffoto van ‘n kwarantynfasiliteit in die Noord-Kaap.

Die Suid-Afrikaanse regering het van sy planne afgesien om pasiënte wat positief vir Covid-19 toets te dwing om in staatskwarantynfasiliteite te isoleer.

Dít volg nadat AfriForum vroeër vandeesmaand geëis het dat nuwe regulasies – wat in Februarie in die Staatskoerant afgekondig is en voorsiening maak vir die regering om enigiemand vir 48 uur in die fasiliteit van die regering se keuse aan te hou – geskrap word.

Die burgerregteorganisasie het ’n skrywe aan die minister van samewerkende regering en tradisionele sake, Nkosazana Dlamini-Zuma, gerig waarin sy daarop gewys is dat die “drakoniese” regulasies ongrondwetlik en ’n growwe skending van menseregte is.

“Nadat AfriForum met regsaksie gedreig en hofstukke voorberei het, het die minister toegestem en die nodige wysigings aan die regulasies aangebring,” sê Jacques Broodryk, AfriForum se veldtogtebestuurder.

Volgens die jongste gewysigde regulasies mag pasiënte nou weer selfisoleer.

Die regulasies wat bepaal het dat Covid-19-pasiënte kan verplig word om mediese behandeling te ontvang, is ook van die baan.

Broodryk sê nou die minister se besluit om die regulasies aan te pas, wys net weer hoe belangrik dit vir die burgerlike samelewing is om die regering op sy tone te hou. “’n Mens kry die indruk dat die staat toenemend sy mag probeer uitbrei en tensy organisasies soos AfriForum en hul ondersteuners nie terugstoot nie, sal die staat beslis sy mag misbruik, soos ons nou al telkemale gesien het.”

Die organisasie het in Junie 2020 ook ’n oorwinning in die Noord-Gautengse hooggeregshof in Pretoria behaal toe ’n dringende aansoek toegestaan is om Dlamini-Zuma se kwarantynregulasies (wat toe ook selfisolasie verbied het) ongeldig te laat verklaar. Dié regulasies, wat volgens AfriForum irrasioneel en drakonies is, was daarop gemik om almal wat positief vir Covid-19 toets onder verpligte staatskwarantyn te plaas.

Broodryk sê AfriForum is steeds van mening dat mense wat positief toets vir Covid-19 en simptome toon, tuis moet isoleer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Witwax

Dankie AfriForum.

Nie Verbaas

Wonder watter kaders se plek die is? Lyk meer na hoenderhokke?

marius

Laat sy hoes vir die regskoste . In haar PERSOONLIKE hoedanigheid .

Miena

Dit het nie eers gewerk met staats isolasie verblyfplekke tydens die 1e en 2e golf nie – nou dat die mense ingespuit is en als ampertjies normaal se kant toe mik-mik – nou wil hulle staan en mens se bloeddruk opjaag met sulke snert. dink hulle – die goewerment – dit gaan NOU werk??? ag asseblief gee my krag…

domheks

ou kopdoek wil in beheer van alles en almal wees!