Staat dok miljoene op vir ‘wasgoeddraad’ langs grens

Die splinternuwe en peperduur grensdraad tussen Suid-Afrika en Zimbabwe val oënskynlik reeds uitmekaar.

ʼn Wasgoeddraad.

Só het die DA Vrydag die nuwe grensdraad tussen Suid-Afrika en Zimbabwe bestempel wat teen R37 miljoen – oftewel sowat R1 miljoen per kilometer – tussen die twee lande opgerig is.

Die draad is inderhaas opgerig om die verspreiding van Covid-19 tussen dié lande te voorkom.

Samantha Graham-Maré, die DA se woordvoerder oor openbare werke en infrastruktuur, sê daar is eens na die grensdraad as die “Slang van vuur” verwys weens die 2 800 volt wat deur die oorspronklike grensdraad gevloei het. Dié grensdraad was glo bykans ondeurdringbaar, maar weens ʼn gebrek aan instandhouding en patrollies deur die weermag het dit die afgelope paar jaar basies in ʼn sif verander. Dít ten spyte van die 3 m hoë dubbeldraad aan albei kante van die elektriese heining wat die grens tussen Suid-Afrika en Zimbabwe aandui.

Graham-Maré sê die uitbreking van Covid-19 moes dié situasie verander en die aankondiging deur die minister van openbare werke, Patricia de Lille, dat herstel aan 40 km van die grensdraad gedoen gaan word, sou ʼn nuwe era vir die bykans nie-bestaande grens inlui. Dit moes verseker dat die grensdraad, wat gesteel en gebruik word om veekrale in die omgewing op te rig, behoorlik herstel word.

Volgens De Lille is daar aan alle noodverkrygingsmaatreëls voldoen. Die aanstel van ʼn kontrakteur is ook bespoedig om te verseker dat niemand die land onwettig binnekom nie.

“Ongelukkig was daar binne dae foto’s van enorme gate in die nuwe draad. Berigte oor die draad wat gesteel word, het gevolg. Die minister het gesê sekuriteit sou verhoog word om te verseker dit gebeur nie verder nie,” het Graham-Maré gesê.

“Wat vir ʼn grensdraad het ons opgerig wat sy eie sekuriteit benodig? Watter gehalte materiaal is gebruik wat kwalik ʼn draadsnyer kan weerstaan en wie het die spesifikasies vir die draad opgestel? ʼn Wildheining op ʼn gewone wildplaas is tussen 1,8 m en 2,4 m hoog. ʼn Grensdraad soos die een tussen Marokko en Spanje is 6 m hoog. Dié grensdraad, wat R37 miljoen gekos het, moes ondeurdringbaar gewees het. Duidelik is dit nie.”

Graham-Maré het gesê nadat De Lille aanvanklik teruggekrabbel het oor die aanstelling van die kontrakteur deur ʼn benoemingsproses, het sy intussen gevra dat die ouditeur-generaal ʼn omvattende oudit van die projek doen.

Die DA het ook vrae aan De Lille gestel oor die proses wat gevolg is.

Graham-Maré het gesê as die doel van die heining net tydelik was om Suid-Afrika teen Covid-19 te help beskerm, sou dit dalk nog verskoon kon word. “Maar dit was nie – dit is geloof as die nuwe grensdraad tussen Suid-Afrika en Zimbabwe.

“As ons ons grense wil beskerm het ons ʼn ‘Slang van vuur’ nodig, nie ʼn wasgoeddraad wat amper R1 miljoen per kilometer gekos het nie.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Willem

Die vrou sal wegkom met dit, daai draad was nog nooit heel nie. Nou is die troepe wat dit opgepas het seker onttrek om die virus hier te kom beveg

Frans

Beee standard sos als in die land

Frans

Vra vir Trump om jule te help duidlik verstaan sy nie wat beteken dit om iets in plek te sit om mense uit jou land te hou nie

Adam Adriaan

In 1994 het die ANC ‘n ordentlike geëlktrifiseerde grensdraad met ‘n dienspad ontvang wat deur die destydse weermag gepatroleer en instandgehou was. Hulle het dit laat verval, soos alles in die land verval het. Nou kerm en kla hulle. Kan geen simpatie betoon teen die ANC regering, Hulle moet maar vir hulle kry.

Kobus

CR en sy minister verantwoordelik sal seker met “skok” kennis neem.Is dit nie juis ‘n taak vir die SAW nie? Die inwoners van die nedersettings steur hule nie aan die reels nie.Laat die SAPD dan slegs die in en uitgange beheer en ontplooi die SAW waarvoor hulle daar is nl om ons landsgrense te beskerm