Stakende metro-werkers maak wéér amok in hoofstad

Werkers van die Tshwane-metroraad het Pretoria se middestad vir ‘n tweede dag ingevaar, ondanks ‘n hofbevel wat hulle verbied om te staak. (Foto: Oupa Mokoena/ANA)

Werkers van die Tshwane-metroraad het vir ʼn tweede agtereenvolgende dag die strate van die hoofstad ingevaar en amok gemaak, ondanks ʼn hofbevel wat hulle verbied om dit te doen.

Honderde ontevrede werkers verbonde aan die Suid-Afrikaanse Munisipale Werkersvakbond (Samwu) het Maandag die Pretoriase middestad ingevaar en onwettig al die hooftoegangsroetes in die middestad versper. Hulle eis ʼn salarisverhoging van 18% en ʼn einde aan die gebruik van arbeidsmakelaars.

Paaie in die Pretoriase middestad word vir ‘n tweede agtereenvolgende dag deur onwettige stakers versper. (Foto: Oupa Mokoena/ANA)

Die Tshwane-metroraad het inderhaas ʼn hofbevel teen die werkers bekom wat hulle verbied om te staak. Dit het hulle nie gekeer nie.

Sheila Senkubuge, burgemeesterskomiteelid vir paaie en vervoer, het gesê die stad het reeds die A Re Yeng- en Tshwane-busdienste opgeskort nadat busbestuurders die roetes versper het.

“Ons veroordeel die optrede ten sterkste en wil die publiek verseker dat klagte van diefstal aanhangig gemaak gaan word teen die betrokkenes. Tugstappe gaan ook teen hulle gedoen word,” het Senkubuge gesê.

Werkers het die metroraad se voertuie onwettig gebruik om paaie te versper. (Foto: TrafficSA via Twitter)

“Wat ons nie voorsien het nie, was dat ons eie busbestuurders veiligheidsbeamptes sou intimideer en die busse onwettig gebruik om die strate te versper.”

Die minister van vervoer, Fikile Mbalula, het gister al gesê hy is bekommerd oor die staking wat die middestad wesenlik tot stilstand gebring het.

Die minister sê hy steun werkers se reg om te staak, maar dit mag nie inbreuk maak op die regte van ander nie.

“Tshwane is nie net die administratiewe hoofstad van die land nie, dit is ook ʼn belangrike ekonomiese sentrum. ʼn Sluiting van dié aard ondermyn die regte van ánder padgebruikers om te gaan werk en met hulle lewe aan te gaan. Dit kan die ekonomie kwaai knou – ʼn onderbreking wat ons in dié stadium kwalik kan bekostig,” het Ayanda-Allie Paine, Mbalula se woordvoerder, vroeër gesê.

Chaos heers vir ‘n tweede agtereenvolgende dag in die Pretoriase middestad weens ‘n onwettige staking. (Foto: TrafficSA via Twitter)

Die Tshwane-metroraad het motoriste intussen gewaarsku om tot ʼn uur ekstra by hulle reistyd te voeg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Roberto Betta

249 words is not enough to describe the sorry state our country has become.

Pop

Dis wat jy kry as jy skelm vir die grootkoppe 18%verhoging gee en diegene wat die werk doen ignoreer. So gee maar die ekstra 18%. Ons belasting kan mos betaal. Hierdie nuwe kaders het nie n benul van budget nie.

Werner

Wonder wie dink nog n hof het enige seggenskap in hierdie piesng republiek

Willie

Wat ek nie kan verstaan nie, hoekom word die busse uit die loots gegee? Seer sekerlik word dit uitgegee vir Vervoer?

Willie

Ek dink ook dat die DA nie veel beter doen die sogenaamde Tshwane nie… voels van enerse vere… So gaan als ten gronde…