Staking duur voort by Gauteng-lykshuise

Argieffoto

Die Gautengse departement van gesondheid moet streng optree teen forensiese beamptes wat onwettig staak en ʼn dringende hofbevel moet teen die onwettige stakers bekom word, het die DA Sondag gesê.

Desperate families het hofbevele bekom om nadoodse ondersoeke te bekom by Gauteng se staatslykshuise sodat die liggame gereed gemaak kan word vir begrafnisse. ʼn Staking deur 180 forensiese assistente duur, sonder ʼn einde in sig, voort, het DA-woordvoerder Jack Bloom gesê.

“Ek weet van drie hofbevele deur Moslem-gesinne wat deur hul geloof vereis word om ʼn liggaam binne 24 uur ná afsterwe te begrawe. Dit is tragies dat ʼn hof genader moes word weens die patetiese hantering van die staking deur die provinsiale departement van gesondheid,” het hy gesê.

Families was vol hoop dat die agterstand van meer as 200 liggame vinnig hanteer sou word sedert gesondheidspersoneel van die weermag verlede week ontbied is om bystand te lewer, maar dit was slegs sewe persone.

Patoloë het oor die langnaweek sonder assistente gewerk, maar nuwe liggame kom gereeld by en hulle kan tans nie die lading hanteer nie. Aangesien daar nie genoeg spasie in die yskaste is nie, word liggame bo-op mekaar gestapel.

“Vakbonde voer aan die assistente staak nie, maar hulle doen slegs dit wat in hul posbeskrywings is, maar dit is vals. Ek het bevestig dat hul pligte spesifiek die volgende insluit, kragtens ʼn beskrywing van ʼn vakante pos vir ʼn graad een forensiese patologie-assistent wat onlangs geadverteer is: “Lewer bystand aan forensiese patoloë tydens ʼn doeltreffende forensiese outopsieproses kragtens die bestaande standaarde en riglyne,” het Bloom gesê.

“Die departement moet nou streng optree teen forensiese beamptes wat onwettig staak. Sommige patoloë is geïntimideer en vrees vir hul veiligheid.”

Die departement het reeds ingestem om die beroepspesifieke bedeling te herroep wat in 2009 tot salarisverminderings vir forensiese beamptes gelei het, het hy gesê.

Daar is nie ʼn spesifieke rede vir die staking nie, aangesien oortollige griewe in die onderhandelingsproses aangespreek kan word, maar die probleem is dat die departement nie baie geloofwaardigheid geniet nie, weens vorige beloftes wat nie vervul is nie.

“Die ANC hanteer vakbonde sagkens, omdat hulle nie kan bekostig om ʼn vriendskaplike vennoot aanstoot te gee nie. Premier David Makhura is onverklaarbaar nie by hierdie krisis betrokke nie. Hy moet pogings koördineer om te verseker dat veiligheid by die 10 staatslykshuise opgeskerp word en dat ander gesondheidswerkers gebruik word om die patoloë by te staan,” het Bloom verduidelik.

“ʼn Dringende hofbevel moet gebring word teen die onwettige stakers wat nie die oorledenes respekteer nie en ongelooflike trauma veroorsaak vir die familielede waarvan sommige al meer as 10 dae wag om hul geliefdes te begrawe.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

12 Kommentare

jongste oudste gewildste
Ekt n Bsc honeurd

Hallo, ekt n biochie honeurs en is werkloos. Ek is meet as bereid om te help en is seker daar is meer mense soos ek. Nie alle werkloses steel en kry toelae nie.
Gefrustreerde werklose waar moet ons gaan aanklop om te help

Kobus V

En wie werk daar….nie n dooie siel nie !

Alida

Siek, pateties en afgryslik!

Spook

Genugtig nou ly tot die dooies onder die lamsakige regering regtig

Scalla

Fire die persone wat verantwoordelik is, stel mense aan wat die job kan en wil doen,