Die Gautengse departement van onderwys het Woensdag drie senior bestuurders aangekla op aanbeveling van ʼn verslag van die spesiale ondersoekeenheid (SOE) in verband met fondse wat gebruik is vir die ontsmetting en skoonmaak van skole in Gauteng.
“Die hoof van die verskaffingsketting, hoofdirekteur van infrastruktuurontwikkeling en waarnemende direkteur vir hulpdienste is aangekla kragtens die bevindings in die verslag,” het Steve Mabona, woordvoerder van die departement, in ʼn verklaring gesê. “Die ondersoek duur voort en aanklagte teen ander persone kan nie uitgesluit word nie.”
Mabona sê die departement is van voornemens om seker te maak dat die proses deur ʼn onafhanklike liggaam, buite die departement, gefasiliteer word. Die kantoor van die staatsaanklaer is gevolglik genader en ʼn ervare advokaat is aangestel.
Die verhore begin vanaf 5 Oktober 2021.
“Ons is dankbaar vir die werk wat die SOE tot dusver gedoen het. Ons bly verbind tot samewerking met die SOE.”
Mabona sê die departement wil nie die uitslag van die dissiplinêre verhoor vooruit loop nie, maar dit is belangrik om te noem dat die beamptes wat die uitgawes veroorsaak het, nie ongestraf gelaat kan word nie.
Lees dit nou want jy gaan nooit weer daarvan hoor nie
Geen verrassing! Daar sal ook dadels kom van enige sinvolle optrede teen die skuldiges want almal van hulle het ‘n hand in die koekieblik.
Dit is ook waarom CR nie kan optree teen sy korrupte maters.
En wat van die geld? Nie dat daar iets oor gaan wees nie. Lankal op Mercedes of Porsche Cayenne gespandeer en dalk n mansion. Pappa is mos nou n belangrike man.
Whats new? Waar daar staatsdepartemente is ,is daar korupsie.Punt
As jy skelms aanstel gaan jy skelmstreke kry.
Daar glip Lesufi en sy kornuite wees deur die net. Om van siek te word!