Stella-saak neem onverwagse wending

Xander Bylsma in die hof (27 November 2019) (Foto: Tania Heyns/Maroela Media)

Die moordbeskuldigde Xander Bylsma (20) se regspan het Woensdag in die hooggeregshof in Mmbatho in Noordwes verklap dat hulle gaan aanvoer dat die moontlikheid bestaan dat Sharnelle Hough se nuwe kêrel betrokke kon wees by die moorde op haar en haar boesemvriendin Marna Engelbrecht.

Adv. Sakkie Nel vir die verdediging het Woensdagmiddag aan Brandon Victor (19) onder kruisverhoor gesê hy vind dit vreemd dat, indien Bylsma die aand van 25 Mei 2018 dreigemente aan Sharnelle gemaak het, Victor nie die volgende oggend haar gekontak het om te hoor hoe dit met haar gaan nie. Victor was in daardie stadium romanties betrokke met Sharnelle (17) en het beplan om haar uit te vra.

Dít volg nadat Victor vroeër vandag getuig het dat Bylsma die aand van die moorde gedurende ’n telefoongesprek aan Sharnelle gesê het: “Ek hoop jy gaan tevrede wees met wat ek vanaand gaan doen.”

Victor het in die hof gesê hy kan nie onthou of hy vir Sharnelle die oggend ná die inkriminerende oproep gekontak het nie. Hy vertel dat hy wel gekyk het wanneer laas sy op WhatsApp was voordat hy gaan stort en aangetrek het om met die bus na Koster te ry vir ’n rugbywedstryd.

“Ek stel dit aan jou. Jy het haar nie die volgende oggend gekontak nie. Dit was ’n meisie waarvoor jy lief was. Xander het die aand dreigemente gemaak. Die volgende oggend word jy wakker en jy kontak haar nie om te hoor of sy nog reg is nie,” het Nel aan Victor uitgewys. “Ek vind dit vreemd.”

“Sharnelle het gesê sy is fine,” het Victor reageer. “Ons was onder die indruk dat Xander dreig om iets aan homself te doen en dat hy nie meer op pad was koshuis toe om klere te bring nie. Daarom het ek nie iets vir haar gestuur nie.”

Victor verduidelik dat ene mnr. Bredenkamp hom die oggend van 26 Mei vir Marna se selfoonnommer gevra het terwyl hy reggemaak het om Koster toe te vertrek. Bredenkamp wou egter nie dadelik verduidelik waarom hy Marna se nommer wou hê nie. Volgens Victor het hy Bredenkamp in kennis gestel van Bylsma se oproep die vorige aand waarna Bredenkamp fort is.

Toe Sharnelle en Marna later nie vir die bus opdaag waarmee hulle ook veronderstel was om te ry nie en almal Victor ewe skielik troos sonder dat hy in dié stadium van die moorde geweet het, het hy aanvanklik gedink Bylsma het die twee vriendinne ontvoer, verduidelik hy.

“So, iemand wat jy van plan was om uit te vra is ontvoer en jy weet wie het haar ontvoer, maar jy sê nie vir ’n volwassene op die skoolterrein daarvan nie?” wou Nel weet.

Volgens Victor het hy reeds vir Bredenkamp van die gesprekke vertel en kon hy agterkom dat die volwassenes op die skoolterrein reeds meer as hy weet oor waar die twee meisies is. Hy het wel probeer om Sharnelle se pa, Ronnie Hough, te bel. Hy kan egter nie onthou of hy daarin kon slaag om hom in die hande te kry nie.

“Dit is waarom ek oom Ronnie se nommer gekry het. Volgens my was dit die belangrikste mens wat moes geweet het. Ons almal het geweet die ouer mense wat daar was het klaar geweet wat aangaan.”

Bylsma ontken dat die betrokke gesprek waaroor Victor Woensdagoggend getuig het, ooit plaasgevind het. Hy erken wel dat hy die betrokke aand ná 01:00 na die koshuis toe gegaan het en vir Sharnelle gevra het om buite toe te kom om oor hulle probleme te praat. Hy sê hy is toe later weg en Sharnelle is terug in die koshuis in, sê hy.

Om die verdediging se argument verder te staaf, het Nel uitgewys dat Victor se vingerafdrukke ten tye van die moorde op Sharnelle se selfoon gewerk het. Dit volg nadat Victor gedurende kruisondervraging erken het dat hy en Sharnelle hul vingerafdrukke op mekaar se selfone geregistreer het om mekaar se selfoonwagwoord te ontsluit.

Nel voer aan dat hoewel Sharnelle dood was, Victor se vingerafdruk steeds haar wagwoord kon ontsluit om foto’s, wat Ronnie vroeg die oggend van sy dogter se dood gekry het, aan hom te stuur.

“Ek sê nie dat jy betrokke was by die voorval nie. Ek wil dit net aan jou stel dat jy die boodskappe kon stuur. Daar is ten minste ’n moontlikheid dat jy betrokke kon wees,” het Nel verduidelik.

Die verhoor hervat Donderdag.