Steve Hofmeyr maak aankondiging oor AIG

Steve Hofmeyr. Foto: Facebook

Steve Hofmeyr het Woensdag bekend gemaak dat hy nie deel van die Afrikaans is Groot (AIG)-konserte in Kaapstad sal wees nie.

“Na gesprekke met Afrikaans Is Groot se direksie het ek besluit om terug te staan sodat die AIG konserte in Kaapstad in 2020 wel kan plaasvind,”  het Hofmeyr gesê.

“Ek doen dit in belang van die totale produksiespan en my medekollegas. Ek verstaan die enorme uitdagings in terme van infrastruktuur en kostes en wat die verlies aan inkomste aan my medekunstenaars sal doen.”

Hofmeyr sê ook verder dat hy besef Sun International hul lokaal in Kaapstad sal weier vir die vertoning indien hy nie dié besluit gemaak het nie. “Dit sal my altyd grief dat geld, borge en politieke narratief ons kultuur en ons kunste vandag voorskryf. Ek ken nie daardie taal nie en ek het geen behoefte om dit ooit te leer praat nie.

“Ek buig nie die knieg voor die haters van vryspraak nie en geen boikot sal my oor my volk en taal se griewe maak swyg nie. My toere sal voortgaan ongeag en ek sal nie huiwer om die name van ons volk se uitwissers uit te basuin nie, dit terwyl Sun International, Toyota, MTN en Multichoice geen woord rep oor die aanhitsing tot geweld en haatspraak teen my mense nie. As hulle my kan stilmaak kan hulle ons saggies uit die prentjie verwyder.”

Dit het verlede maand aan die lig gekom dat Sun International sy misnoeë oor Hofmeyr se deelname aan die Afrikaans is Groot-konsertreeks te kenne gegee het.

Die konserte vind vanjaar van 22 November tot 1 Desember in die Sun Arena by Time Square in Pretoria plaas. Die datums vir die Kaapstad-konserte is nog nie aangekondig nie.

Anthony Leeming, uitvoerende hoof van Sun International, het in ʼn skrywe aan die organiseerders van Afrikaans is Groot (AIG) gesê Sun International word wetlik verplig om nog vanjaar se konserte by Time Square te huisves.

“Op grond van regsadvies kan ons nie weier om die konsert aan te bied óf eis dat die organiseerders Steve Hofmeyr [van die lys van kunstenaars] verwyder nie. Die kontrakte is ongelukkig ʼn paar maande gelede reeds gesluit,” het Leeming gesê.

Sun International het egter die organiseerders van AIG versoek om Hofmeyr se insluiting by die konserte te heroorweeg.

AIG se organiseerders en Solidariteit Helpende Hand, AIG se gemeenskapsvennoot en amptelik begunstigde niewinsgewende organisasie, het egter toe bevestig dat die konsertreeks vanjaar by Time Square voortgaan en dat Hofmeyr sal optree.

Brendon Hargrove, uitvoerende vervaardiger van die AIG-vertonings, het ook toe gesê Sun International se uitlatings wys wel moontlike implikasies uit vir die toekomstige aanbieding van die vertonings aangesien dit sinspeel op die goedkeuring van inhoud en kunstenaars wat daar optree.

ʼn Herrie het vroeër vanjaar om die AIG-vertonings losgebars toe talle borge onttrek het weens Hofmeyr se deelname aan die konsertreeks.

AIG het intussen in reaksie op Hofmeyr se aankondiging gesê hy respekteer Hofmeyr se besluit en die feit dat hy begrip toon vir die uitdagings wat die AIG-span in die gesig staar.

“Steve sal steeds optree tydens die Pretoria-konserte in November 2019, asook die Somerfees wat op 28 Desember in Mosselbaai plaasvind. Kaartjies vir AIG-Kaapstad sal binnerkort aangekondig word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

171 Kommentare

jongste oudste gewildste
AIG Mosselbaai?

Gaan Steve by die AIG optrede in Mosselbaai wees 28 Desember?

MARIETTE

AIG sal nooit weer dieselfde wees sonder Steve nie. Ek sal ook nie moeite doen om vir volgende jaar se konsert te bespreek as hy nie daar is nie. Groot jammerte

Johan

Mooi en daar eindig my en my gesin se paadjie met AIG. Vaarwel en Steve ons is trots op jou.

Bosman

Steve jy is en sal altyd n wenner wees.
n Man met rugraat en integriteit.
Daar is baie wat reeds hulle siele vir geld een aansien verkoop het.
Jy is nie een van hulle nie en dankie daarvoor.

Outoppie

En ek staan bankvas agter Steve. Nie een van daai borge spoel hul mondecuit oor haatspraak vanaf die anderkant maar ons mense wat staan vir sy taal en volk en land word gekniehalter