Steve sê Trump-besoek sal ‘voorreg’ wees

steve hofmeyr1

Steve Hofmeyr. Foto: Facebook

Steve Hofmeyr het Woensdag gesê hy het homself beskikbaar gestel om die verkose Amerikaanse president, Donald Trump, te besoek met die oog daarop om sanksies teen die Suid-Afrikaanse regering in te stel.

Hofmeyr het aan Maroela Media gesê dit sal ʼn “voorreg en ʼn onselfsugtige veldtog” wees om namens Suid-Afrika tydens sy besoek “te smeek vir sanksies en ʼn heroorweging van Amerikaanse finansiering wat in Afrika in ʼn swart kolk van toeëiening disintegreer”.

Dit volg nadat Kommando Sorg, ʼn groep wat “wit mense teen volksmoord wil beskerm”, vroeër vir Steve benoem het om dié taak te op hom te neem.

John Rudman, stigter van die groep, het gesê Hofmeyr is gekies omdat hy ʼn “anker in die wit samelewing” is.

Die groep het deur middel van skarefinansiering al bykans R10 000 vir dié besoek ingesamel.

Hofmeyr sê só ʼn besoek aan die VSA is nou meer nodig as vantevore. “Dis belangrik omdat ons opsies in ʼn eenpartystaat daagliks verskraal, ons ekonomie nou by onherstelbare vlakke verbyskiet, ons die 20-jaar-te-laat voorbeeld is van sosialisme se tragiese houvas op ontwikkelende lande, omdat ons ʼn moord- en verkragtingskoers handhaaf wat beskawings sal laat stik en omdat geen land met 114 ekstra rassewette integrasie inspireer nie.”

Hofmeyr meen dié veldtog het ʼn kans op sukses aangesien Trump “lank reeds simpatie met ons [Suid-Afrika] en mense soos ons het”.

“Ek en hy het klaarblyklik albei ʼn gesonde afkeur aan formaliteite. Maar hy ken reeds die feite. Ons verteenwoordig die Weste se grootste vrees: Die kulturele nagmerries van te laat wakker word in jou eie land as gemarginaliseerde, verminkte minderheid, en om dan nog geregeer te word deur apatiese nasies in plekke waar jy jou lewensverwagting, soewereiniteit en selfbeskikking kwyt is en met wetgewing uit die arbeidsektor gehou word op grond van jou velkleur.”

Hofmeyr sê hy sal dié veldtog saam met Henk van de Graaf, voormalige assistent-hoofbestuurder van TLU-SA, aanpak.

Rudman kan nie self deel wees van die besoek nie aangesien ʼn beroerte-aanval sy spraak aangetas het. Hy sal nietemin die afspraak met Trump reël.

Die groep wag nog op terugvoer van die Amerikaanse regering.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

185 Kommentare

jongste oudste gewildste
Danie

Hoop maar dit werp vrugte af. Ten minste doen Steve en Henk iets aan die toestand waarin die Afrikaner verkeer. Hulle sit nie net die heeldag en bekla hulle lot nie.

Sanet

Dankie Steve jy is n yster en ons glo als sal goed verloop. Jy n man met rug graad.

Johan Fourie

Wat is die bank besonderhede vir skenkings?

Ronel

You “GO” Steve ons bid dat jou besoek n reuse sukses sal wees. Dankie wat jy vir ons doen.!!!!!!!

Jo

Dankie Steve!!!