Stilfontein ‘kalm’ terwyl taakspan vraestelle hermerk

Werksaamhede van die Hoërskool Stilfontein het tot stilstand gekom terwyl die betogings reeds vier dae lank voortduur. Foto: Facebook

ʼn Taakspan van Noordwes se onderwysdepartement is by die Hoërskool Stilfontein waar hulle gr. 11’s se vraestelle oormerk nadat ouers en inwoners sedert Donderdag betoog omdat sommige leerders gedruip het.

Die leerders en hul ondersteuners dring daarop aan dat hulle deurgesit word na matriek en vanjaar hul skoolloopbaan klaarmaak. Hulle wil ook hê die skoolhoof moet bedank, die beheerliggaam ontbind en detensie afgeskaf word.

Maandag is ʼn groep betogers die skool binnegelaat om ʼn besluit van die onderwysdepartement te hoor, vertel Hillel Coetzer, AfriForum se veiligheidshoof van die Noordstreek, maar hulle het die skool begin plunder.

Die betogers beskuldig die skool van rassisme en diskriminasie.

Geen leerders is beseer nie, maar die polisie se eenheid vir openbare orde is ontbied om die vrede te herstel. Luidens berigte is die persoon wat die betogings aanhits, nie ʼn leerder aan dié skool nie. Die betogers beskuldig die skool van rassisme en diskriminasie.

Coetzer vertel ʼn groot groep voertuie en ontevredenes het Dinsdagoggend weer buite die skool saamgedrom, maar die situasie is “heeltemal kalm”.

Verteenwoordigers van verskeie politieke partye het ook daar saamgekom terwyl die taakspan die vraestelle hermerk het. Die “nuwe” uitslae sal na verwagting binnekort bekendgemaak word.

Michal Groenewald, VF Plus-leier in Noordwes. Foto: Facebook

Die skoolhoof en die voorsitter van die beheerliggaam was nie Dinsdagoggend beskikbaar om kommentaar te lewer nie omdat albei in ʼn vergadering was.

Noordwes se onderwysdepartement het reeds verskeie vergaderings met die skool en ander rolspelers gehad en ʼn ondersoek van stapel gestuur, soos deur toepaslike wetgewing bepaal word.

Die Hoërskool Stilfontein is die jongste politieke speelbal vir die ANC.

Michal Groenewald, provinsiale leier van die VF Plus, sê die Hoërskool Stilfontein se onderwysers en leerlinge is “die jongste politieke speelbal vir die ANC en ander politieke opportuniste in Noordwes”.

Hy vertel die situasie het Maandag handuit geruk toe bakstene deur vensters gegooi is en ʼn ouer glo ʼn onderwyser aangerand het. Verskeie ANC-lede en lede van ander organisasies was onder die oproeriges.

“Die VF Plus veroordeel hierdie optrede ten sterkste,” sê Groenewald. “Dit is onaanvaarbaar dat betogers tot geweld aangehits word sodat die ANC politieke punte deur rasretoriek kort voor die nasionale verkiesing kan aanteken.

“Ouers en leerlinge moet die departement toelaat om sy ondersoek te voltooi en nie in die proses die skool afbreek as gevolg van die onverantwoordelike aanhitsing deur die regerende party nie.”

Die VF Plus sê die departement moet toesien dat oortreders wat skooleiendom beskadig en hul skuldig maak aan enige vorm van misdaad, soos aanranding en intimidasie, behoorlik vervolg word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

53 Kommentare

jongste oudste gewildste
Wouter

Waarvoor leer ons kinders dan nog as die wat nie leer nie en druip deurgesit gaan word. Ek kan my kinders leer wat hulle moet weet om ook hule eie besigheid te kan hê en n sukses van hul lewe maak. Maar nee die people get what they want. Met of sonder opleiding. Ek het my werk verloor agv regstellende aksie in die Lugmag. Maar dit was beter in my geval want nou het ek ook n besigheid sonder BEE. En niemand skryf my voor nie.

Willem

Nou gaan almal wat gedruip het n paar punte meer kry en dan oorgeplaas word en die einde van die jaar gebeur net dieselfde weer en hulle slaag nou matriek en weet heeltemal niks van die vakke nie,sê eerder vir hulle ok julle is deur en spaar die geld vir die hermerk van vrae stelle want dit is wat gebeur in elk geval,die hermerk is net n manier om die oë toe te knyp en hulle deur te sit

Pat

Sit hulle deur wie gee om einde van die jaar is dit net die skool se statistieke wat sal bewys hoe onsinnig dit was. Breek af en dreig is mos die norm. Publiseer hulle name sodat die mense hulle kan weg wys as hulle werk soek.

Katerina

En as die leerders nog steeds druip na die hermerking? Wat dan? Of gaan hulle nou maar deurgesit word om geweld te voorkom? Die land maak my Siek..ek sou n arm of n been gee om tog net te kan wegkom uit die patetiese helhool sirkus.

VanAfrika

Sal interressant wees om weer die uitslae te hoor. Julle wat gedruip het moet nou baie hard bid vir die resultaat van jul uitslae en dat rassisme betrokke was.