Stormloop toe werkers ‘goud’ vind

Duisende mense stroom tans na die Mbuthumeni-nedersetting buite Harding in KwaZulu-Natal om te grawe vir “goud”. Foto: Gcina Ndwalane/ANA

Owerhede in die suide van KwaZulu-Natal het hul hande vol om ʼn stormloop van mense te beheer wat op ʼn klein nedersetting toegesak het nadat daar na bewering goud in hierdie gebied gevind is.

Duisende mense stroom tans na die Mbuthumeni-nedersetting buite Harding in die hoop op kitsrykdom nadat glinsterende geel klippe hier gevind is gedurende gronduitgrawings.

Dixie Nciki, burgemeester van die Umuziwabantu-munisipaliteit, het gesê die plaaslike stamhoof het reeds die gemeenskap toegespreek oor die gevare daarvan om in die steengroef te myn. Die hoof het gemeenskapslede gevra om ter wille van hul veiligheid uit die gebied te bly.

Dit het blykbaar nie gehelp nie. “As burgemeester het ek ook al verskeie kere die gebied besoek om die gemeenskap toe te spreek oor veiligheidskwessies, maar ons kom agter die getal mense wat op daardie gebied toesak, raak elke dag meer,” het Nciki gesê.

Nciki het gesê die munisipaliteit beraadslaag met die Ugu-distriksmunisipaliteit en sal in samewerking met dié munisipaliteit se rampbestuurspan en die SAPD planne beraam sodat gemeenskapslede verhoed word om in die steengroef te grawe vir goud, aangesien dit onveilig is.

Duisende mense stroom tans na die Mbuthumeni-nedersetting buite Harding in KwaZulu-Natal om te grawe vir “goud”. Foto: Gcina Ndwalane/ANA

“Die rampbestuurspan en die SAPD het intussen doringdraad gebruik om die gebied af te sper totdat toetsresultate aandui of die klippe werklik goud is of nie. Die SAPD het Maandag ʼn monster daarvan  na Pretoria geneem om ontleed te word en ons wag nou op die uitslae.”

Die plaaslike inwoners glo blykbaar dié “goud” wat hulle in die gebied vind, kan hul lewe verander, gegewe die hoë vlak van werkloosheid daar. Die stormloop het begin nadat konstruksiewerkers in die gebied gegrawe het vir steengroefklippe wat hulle wou gebruik om grondpaaie mee te plavei en toe die geel klippe, soortgelyk aan goud, gevind het.

Plaaslike inwoners is al sedert verlede Woensdag doenig in die steengroef om na die goud te soek. Volgens Nciki is daar reeds twee gemeenskapslede beseer terwyl hulle besig was met hul mynbedrywighede in die gebied. “Hulle is na die plaaslike hospitaal gehaas en volgens inligting word hulle steeds daar behandel,” het Nciki gesê.