Stropers skiet polisie wat na vermiste bootman soek

Die huisboot het Saterdag aan die brand geslaan. (Foto: Bathabile Ndawo/Facebook)

ʼn Bemanningslid word steeds vermis ná ʼn luukse huisboot Saterdag in die Jozinidam in KwaZulu-Natal aan die brand geslaan het. ʼn Polisiebeampte wat na Maxwell Nyawo (36) help soek het, is boonop Maandag deur een van drie vermeende stropers geskiet.

Maroela Media het Maandag berig altesaam nege mense, onder wie passasiers en bemanningslede, was genoop om oorboord te spring toe die huisboot Shayamanzi I in vlamme was.

Michael Mirschel (64), ʼn toeris van Duitsland, en Michael Phiri (51), wat as kok op die boot gewerk het, het in die proses verdrink. Polisiebeamptes van die Empangeni-soek-en-reddingspan soek sedert Saterdag na Nyawo.

Volgens kapt. Thembeka Mbele, polisiewoordvoerder, het die beamptes omstreeks 10:15 die dam gepatrolleer toe hulle drie mans teëgekom het. Die mans was glo stropers en die polisiebeamptes het hulle gekonfronteer.

“Een van die mans het ʼn skoot op die beamptes afgevuur en die koeël het een van die beamptes in die kakebeen getref,” bevestig Mbele.

Die gewonde beampte is na ʼn nabygeleë hospitaal geneem vir verdere mediese behandeling. Die drie mans het gevlug.

“ʼn Saak van poging tot moord is by die Ingwavuma-polisiestasie aanhangig gemaak en die ondersoek duur voort.”

Die oorsaak van die brand op die boot word ook nog ondersoek.

Lindiwe Sisulu, minister van toerisme, het haar innige medelye aan Mirschel en Phiri se families en vriende betuig.

“Ons sal die twee families ondersteun terwyl hulle tot verhaal kom,” sê die minister.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

12 Kommentare

jongste oudste gewildste
Misky

Stropers is volop in daai gebeid en die gemeenskap vra al jare lank vir hulp. 98% van hulle is uitlanders en stroom oor die Mosambiekse grens. Dalk sal hulle nou meer ag slaan daarop as een van hul eie gewond is. Sterkte aan die beseerde SAP lid

petro

hierdie brande wat deesdae so ontstaan word moedswillig gestig

AW

En die Lewe van mense gaan aan, ongeag wat gebeur het…

Sarel

Is die Stropers aangrkeer.lekker plek hierdie Suid-afrika

Jacques

O Afrika … klaar weggedra….