Student in padwoede-voorval aangerand

Francois Erasmus ná die voorval. (Foto: Verskaf)

ʼn Tweedejaarstudent aan die Potchefstroom Akademie in Noordwes sal Maandag te midde van sy eksamen ʼn dokter vir die tweede keer moet besoek om die skade aan sy gesig te bepaal nadat sy neus verlede naweek tydens ʼn padwoede-voorval gebreek is.

Die 19-jarige Francois Erasmus het aan Maroela Media gesê hy is verlede Saterdag na bewering deur twee mans, vermoedelik ook studente, in Malherbestraat in Potchefstroom aangerand.

Dít volg nadat dié studente Erasmus daarvan beskuldig het dat hy voor hulle ingery het in Beyers Naudélaan, sowat 2 km van waar die onderonsie gebeur het. Erasmus hou egter voet by stuk dat dit nié die geval is nie.

Hy vertel dat hy die betrokke dag sy vriend by sy huis in Beyers Naudélaan gaan aflaai het. Hy het vir aangekomende verkeer gewag voordat hy agteruit in sy silwer Hyundai Getz uit die oprit van dié huis gery het. “Ek het ʼn wit motor sien aankom, maar hy was so vier huise weg. Ek het regtig gedink dis veilig om [my motor] in trurat te sit en agteruit te ry.”

Erasmus het in die pad van rat verwissel voordat hy weggetrek het in die teenoorgestelde rigting van vanwaar die wit motor gekom het. Die insittendes van die wit Hyundai i20 het met die verbygaan iets vir Erasmus geskree, maar hy het niks daarvan gehoor nie aangesien die radio in sy motor aangeskakel was. “Ek het nie aandag gegee nie en het weggery.”

Erasmus vertel dat die ander motor egter ongesiens moes omdraai en agter hom aangery het aangesien hy later die Hyundai agter hom vir die eerste keer opgemerk het toe hy omstreeks 15:30 by ʼn stopstraat in Malherbestraat tot stilstand gekom het.

Erasmus het op sy beurt oor die stopstraat gery maar besluit om van die pad af te trek nadat hy die bestuurder van die motor agter hom sien beduie het. “Ek was bang as ek aanhou ry, gaan hulle miskien my kar stamp. Ek het gedink hulle gaan net iets vir my sê,” sê Erasmus.

“Die bestuurder het toe [van agter die stuur] vir my gevra of ek ʼn probleem het. Ek het gesê “Nee, hoekom? Wat is fout?’ waarna hy my gevra het of dit vir my lekker is om voor ander in te ry,” sê Erasmus.

Francois Erasmus se beserings op die betrokke dag. Die foto is deur Maroela Media verbloem weens die grafiese aard daarvan. (Foto: Verskaf)

Dit is tóé dat ʼn jong man van agter in die motor uitgeklim het en Erasmus se motor genader het terwyl die bestuurder hom beledigings toegesnou het. “Daar was ook ʼn meisie in die kar. Sy het half agtertoe geleun terwyl die bestuurder met my gepraat het.”

Erasmus vertel dat sy venster oop was en dat die man hom deur die venster in sy gesig bygedam het. Nog ʼn jong man het van agter uit die motor uitgeklim en wou Erasmus uit sy motor ruk. Hy kon dit egter nie regkry nie aangesien Erasmus steeds sy veiligheidsgordel aangehad het.

“Hulle het seker so vier houe ingekry, toe stop ʼn oom in ʼn wit Toyoata Fortuner by ons. Hulle het weg beweeg en toe ry ek net weg. Ek het nie eers daaraan gedink om na die Hyundai se nommerplaat te kyk nie. Ek het net gedink ek moet wegkom.”

ʼn Bebloede Erasmus het na sy meisie se huis gery waar sy op haar beurt sy ouers in Vanderbijlpark gebel het. Vandaar is die tieners hospitaal toe waar dokters bevestig het dat Erasmus se neus in die voorval gebreek is. Hy het ook kneusplekke aan sy oë en ligte harsingskudding opgedoen.

Erasmus het ook ʼn saak by die polisie aanhangig gemaak.

“Dit is verskriklik as jou kind jou bel en sê hy is nounet aangerand,” vertel Willem Erasmus, Francois se pa, aan Maroela Media.

Willem kon sy seun eers dae later sien aangesien hy moes werk en vertel dat hy en sy vrou, Marietjie, geskrik het toe hulle eindelik hul seun se gesig sien. “Ek glo my seun, maar ongeag daarvan of hy voor iemand ingery het of nie, wie gee hulle die reg om enigiemand aan te rand?” wil Willem weet.

Erasmus het die afgelope week van sy klasse misgeloop weens sy harsingskudding en sal moontlik tydens sy eksamen ʼn operasie moet ondergaan om die skade aan sy neus te herstel.

“Ek is bang hulle doen dit aan iemand anders. Sê nou net iemand ry regtig voor hulle in of stamp hulle kar?” Francois sidder om daaraan te dink.

Kapt. Sam Tselanyane, woordvoerder van die polisie, het die voorval aan Maroela Media bevestig.

Die polisie ondersoek ʼn saak van aanranding. Niemand is nog in verband met die voorval aangekeer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

60 Kommentare

jongste oudste gewildste
sweis

Dit is ongelooflik om te hoor dat mense in 2019 mense aanrand in n padwoede aanval en wat hartseer is die polisie gaan niks doen nie die dossier as hy geopen is is alreeds weggegooi.

Onnie

Die polisie moet net gaan rondluister by die kampus en koshuise, want ongelukkig/ gelukkig kan sulke windbolle/bullies gewoonlik nie hul mond hou oor so iets nie. Hulle sal beslis by vriende “gebrag” het oor hoe hulle die ou “reggesien” het, wat voor hulle ingery het. Hoop hulle word gou opgespoor en kry hul verdiende straf! Die arme laaitie het dit wraggies nie verdien om so geslaan te word nie!

Jerry

Regdenkende Suid Afrikaners gaan redelik dringend die onverdraagsame linkse en regse radikale boelie mentaliteit binne hulle gemeenskappe moet begin aanspreek.

SjN

As daar n ander kleur betrokke was die skuldiges al agter tralies.

Francois Joubert

Heeltemal ‘n ander uitkyk op die berig, en dalk niks daarmee te doen. Waarom ry daar soveel motors, bakkies, lorries ens. voor jou in en as jy in die truspieel kyk is daar geen verkeer agter jou? Dieselfde met voertuie wat binne die geelsreep staan, wegtrek en onmiddelik in die verkeersbaan indraai en daar aansukkel tot op spoed. Mense het nie meer ‘commin sence’ nie.