Student sak inmekaar op kampus, sterf

Carla Steytler (Foto: Verskaf)

’n Tweedejaarstudent in radiografie aan die Sentrale Universiteit vir Tegnologie in Bloemfontein (SUT) is vandeesweek onverwags oorlede nadat sy op kampus inmekaargesak het.

Die 24-jarige Carla Steytler van De Aar in die Noord-Kaap se ouers het Dinsdagmiddag in die pad geval Bloemfontein toe nadat hulle van hul enigste kind se siektetoestand in kennis gestel is, net om later op die pad vas te stel dat sy by die kampuskliniek oorlede is.

Dit was nie moontlik om Carla – ’n orgaanskenker – se organe ná haar dood te skenk nie, maar Henry en Carin Steytler is Vrydagoggend in kennis gestel dat hul dogter se weefsel wel geskenk kan word en hulle het ingestem daartoe.

“Dit was haar wens,” vertel haar pa.

Carla en nog ’n student het Dinsdag omstreeks 12:00 na ’n lokaal op kampus gestap toe sy skielik begin sleg voel het. “Sy het gesê sy voel verskriklik moeg en het teen ’n muur gaan staan voordat sy inmekaargesak het. Sy het blykbaar gesê sy kry nie asem nie en is kliniek toe geneem,” verduidelik Henry.

“[Die personeel by die kliniek] het gebel en gevra of ons ’n familielid in Bloemfontein het, want Carla voel nie lekker nie. Ons het gesê ons het geen familie daar nie en sal self deurkom.”

Die egpaar het omstreeks 14:10 uit De Aar gery. Carla was in daardie stadium reeds oorlede, hoewel haar ouers eers later van haar dood in kennis gestel is.

“Ons het op pad probeer bel en hulle het aanvanklik gesê hulle is nog besig met Carla.”

Daar word vermoed dat die personeel nie die ouerpaar wou ontstel nie. Carin het egter buite Colesberg op pad Bloemfontein toe antwoorde van die personeel geëis en dit is toe dat hulle die hartverskeurende tyding oor hul dogter ontvang het.

’n Nadoodse ondersoek is sedertdien gedoen en daar word nog op die uitslae gewag. Die oorsaak van Carla se dood is nog onbekend.

Aangesien Carla reeds ’n ruk lank oorlede was voordat haar ouers kon aandui dat sy ’n orgaanskenker is, was haar organe nie meer geskik vir skenking nie. Dit het egter intussen aan die lig gekom dat orgaanskenking nooit ’n opsie was nie, aangesien Carla nie in ’n hospitaal oorlede is nie.

Henry onthou sy dogter as ’n “go-getter” met ’n sterk persoonlikheid.

“Sy was ’n verskriklike omgeemens en as jy haar vriend was, sou sy enigiets vir jou gedoen het.”

Vir haar ouers was Carla ’n dogter én ’n seun.

“Sy het ’n groot liefde vir die natuur gehad en het saam met my gejag omdat sy geweet het dat dit ’n liefde van my is. Saam met haar ma het sy die fynere dingetjies gedoen. Sy was lief vir kosmaak en onthaal …

“Wat sy ook al gedoen het, het sy voluit gedoen. Sy het nie ’n ding halfhartig aangepak nie,” vertel Henry oor sy lieflingdogter.

Prof. Alfred Ngowi, waarnemende visekanselier by SUT, sê die universiteit treur oor haar dood.

“Carla was ’n aktiewe lid van die universiteitsgemeenskap en toegewyde klasverteenwoordiger in die Fakulteit Gesondheids- en Omgewingswetenskappe.

“Dit is werklik ’n ongekende verlies aangesien die akademiese personeel Carla beskou het as ’n student wat ideale SUT-studente-eienskappe getoon het en aktief betrokke was by die sake van die departement, omdat sy een van die mees toegewyde klasverteenwoordigers was. Ons innige meegevoel met Carla se familie en vriende, want hul verlies is ook ons verlies. Mag haar siel in vrede rus.”

Daar sal tydens ’n roudiens op 4 Maart van Carla afskeid geneem word. Die diens vind omstreeks 11:00 vanuit die NG kerk De Aar-Noord plaas.